تاياۋدا قازاقستاننىڭ بەرليندەگى ەلشىلىگىنىڭ ۇيىمداستىرۋىمەن, پرەزيدەنت ن.ءا.نازارباەۆتىڭ بيلىك تارماقتارى وكىلەتتىكتەرىن قايتا ءبولۋ جونىندەگى ۇندەۋى مەن 31 قاڭتارداعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنىڭ نەگىزگى ەرەجەلەرىن ءتۇسىندىرۋ ماقساتىندا ءباسپاسوز ءماسليحاتى ءوتتى.
قوعامدىق-ساياسي ورتانىڭ وكىلدەرى, ديپلوماتتار, ساياساتكەرلەر, ساراپشىلار جانە گەرمانيانىڭ باق وكىلدەرى قاتىسقان باسقوسۋدا ەلىمىزدىڭ گفر-داعى ەلشىسى بولات ءنۇسىپوۆ كىرىسپە ءسوز سويلەپ, قازاقستاننىڭ 25 جىل ىشىندە ەكونوميكاسى دامىعان, تۇراقتى ساياسي جۇيەسى قالىپتاسقان ەلگە اينالعانىن ايتا كەلىپ, بۇل قول جەتكىزىلگەن تابىستار مەملەكەتكە ساياسي جۇيەنى رەفورمالاۋعا مۇمكىندىك بەرەتىنىن اتاپ ءوتتى. قازاقستاندىق ديپلوماتتىڭ سوزىنە قاراعاندا, كونستيتۋتسيالىق رەفورمانى ەنگىزۋ جولىمەن بيلىك وكىلەتتىگىن قايتا ءبولۋ قازاقستاننىڭ دەموكراتيالىق تۇرعىدا دامۋىن جىلدامداتادى.
بۇدان كەيىن ەلشى مەملەكەت باسشىسىنىڭ بيىلعى جولداۋىنىڭ نەگىزگى ەرەجەلەرىنە توقتالدى. ب.ءنۇسىپوۆتىڭ ايتۋىنشا, جولداۋدا كورسەتىلگەن باسىمدىقتار قازاقستاندى 30 وزىق ەلدىڭ قاتارىنا قوسىلۋ جولىنداعى ءىس-ارەكەتتەرىنە سەرپىن بەرەدى, ەل ەكونوميكاسىنىڭ ودان ءارى دامۋىنا وڭتايلى اسەر ەتەدى, سونداي-اق بۇعان دەيىن قابىلدانعان ستراتەگيالىق باعدارلامالاردىڭ ورنىقتى جۇزەگە اسىرىلۋىنا جول اشادى.
ءباسپاسوز ءماسليحاتى بارىسىندا قاتىسۋشىلار قازاقستان پرەزيدەنتى نۇرسۇلتان نازارباەۆتىڭ بيلىك تارماقتارى اراسىنداعى وكىلەتتىلىكتى قايتا ءبولۋ جونىندەگى ءۇندەۋى ەلدەگى دەموكراتيالىق پروتسەستى نىعايتۋداعى ماڭىزدى قادام بولىپ تابىلاتىنىن, ونىڭ ەل ەكونوميكاسىنىڭ دامۋىن, حالىقتىڭ ءال-اۋقاتىنىڭ ءوسۋىن قامتاماسىز ەتەتىنىن, اتالعان باستامالار دەر كەزىندە كۇن تارتىبىنە شىعارىلعانىن ءسوز ەتتى.
ءباسپاسوز ءماسليحاتىنىڭ سوڭىندا قازاقستان ەلشىسى قازاقستان مەن گەرمانيانىڭ ەكىجاقتى قارىم-قاتىناسىنىڭ وزەكتى اسپەكتىلەرىنە بايلانىستى نەمىس اۋديتورياسىن قىزىقتىراتىن سۇراقتارعا جاۋاپ بەردى. سونىمەن بىرگە, گەرمانيالىقتاردى قازاقستاننىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندەگى قىزمەتىنىڭ باسىمدىقتارىمەن جانە استانادا وتەتىن ەكسپو-2017 حالىقارالىق كورمەسىن ۇيىمداستىرۋ الدىنداعى جۇمىستاردىڭ بارىسىمەن تانىستىردى.