وتكەن جىلى وڭىردەگى شەتەلدىك جانە وتاندىق كومپانيالار اراسىنداعى وندىرىستىك كورسەتكىشتەر سالىستىرمالى تۇردە العاندا قاناعات تۇتۋعا تۇراتىنداي دەڭگەيدە بولىپتى. ءتىپتى, بۇگىنگى الەمدىك قارجى-ەكونوميكالىق داعدارىستاردىڭ تيگىزىپ كەلگەن سالقىنى مەن كەرى اسەرىن ەسەپكە العاندا مۇنى ءتاۋىر ناتيجە دەسە دە ارتىقتىق ەتپەيدى. ال بۇل قۇرىلىمدارداعى نەگىزگى الەۋمەتتىك-ەكونوميكالىق كورسەتكىشتەر بىلتىرعى دەڭگەيدەن ءبىر مىسقال كەم بولماۋى كەرەكتىگى تاعى دا ايان. ءتىپتى, مۇنىڭ ءوزى جەتكىلىكسىز. اقتوبەلىك كومپانيالاردا يننوۆاتسيا مەن جاڭا تەحنولوگيالاردى ەنگىزۋ, جوعارى بىلىكتى ماماندار دايارلاۋ جانە قازاقستاندىق ۇلەستى كوتەرۋ جونىندە جاڭا باعدارلامالار بەلگىلەنۋى تىپتەن قۇبا-قۇپ.
وسى ورايدا, رەسپۋبليكامىزداعى مونوقالالار قۇرامىنا كىرەتىن حرومتاۋ قالاسىندا كەشەندى ءىس-شارالار شوعىرى قولعا الىنعان. جۋرناليستىك ءىسساپار بارىسىندا مۇنداعى «ۆوسحود-ariel», «اقتوبە مىس كومبيناتى» جانە «كوپپەرتەحنولودجي» جشس-لار بيىلعى جىلى دا ءوندىرىس قارقىنىن تومەندەتپەۋگە باعىت ۇستاي بىلگەنىنە كوز جەتكىزە تۇستىك. بۇلاردىڭ ءبارى دە جەرگىلىكتى اتقارۋشى بيلىك وكىلدەرىمەن تىعىز قارىم-قاتىناستا قىزمەت اتقارىپ كەلەدى ەكەن. شىنتۋايتىنا كەلگەندە, ءوڭىردىڭ الەۋمەتتىك-ەكونوميكالىق كورسەتكىشتەرى بىرقاتار جاعدايلاردا وسىنداي ءىرى كاسىپورىنداردىڭ ناتيجەلى قىزمەتىنە دە بايلانىستى ەكەنى كامىل.
اتالعان ءوندىرىس وشاقتارىنىڭ بۇگىنگى جاي-كۇيى تۋرالى نە دەۋگە بولادى؟ اشىعىن ايتقاندا, كەيبىر كريتەريلەر بويىنشا قاراستىرعاندا جەكەلەگەن قۇرىلىمدىق بولىمشەلەردە وندىرىستىك كورسەتكىشتەردىڭ تومەندەپ كەتكەنى جاسىرىن ەمەس. سونىڭ ىشىندە «ۆوسحود-ariel» جشس-دا حروم كەنىن ءوندىرۋ مەن حرومدى كونتسەنترات وندىرىسىندە ءونىم كولەمىنىڭ تومەندەۋ كورىنىستەرى كەزدەسكەن. سونىمەن بىرگە, تاۋارلاردى تۇتىنۋدا جانە قىزمەتتەر كورسەتۋدە جەرگىلىكتى قۇرامنىڭ مولشەرى ازايعان. سوعان قاراماستان بۇل كومپانيالار ۇجىمدىق شارت تالاپتارىن ورىنداعان. تۇتاستاي العاندا, ەڭبەكاقىنى ۋاقىتىندا تولەۋ كەستەسى مەن مەرزىمى بۇزىلماعان. ءتىپتى وسى ارالىقتا ورتاشا جالاقى مولشەرى «اقتوبەمىس» كومپانياسىندا 3,4 پايىزعا جانە «كوپپەر-تەحنولودجي» جشس-دا 3,7 پايىزعا ۇلعايعان. سونىمەن بىرگە, جۇمىسشىلارعا الەۋمەتتىك تولەمدەر تولەۋ ىسىندە دە ءبىراز ىلگەرىلەۋشىلىكتەر بولعان.
ايتسە دە, مەدالدىڭ ەكى جاعى بار دەگەندەي, وندىرىستىك كومپانيالار وسى كەزگە دەيىن بيزنەستىڭ الەۋمەتتىك جاۋاپكەرشىلىگىن تەرەڭ سەزىنبەي كەلگەنىن قوستاي قويۋ قيىن-اق. بۇعان ولاردىڭ مەملەكەت-جەكەمەنشىك ارىپتەستىگى جوبالارىنا قاتىسپاي كەلگەنى ايقىن ايعاق. دەگەنمەن, كەشەگى ءبىر كۇندەرى بۇل باعىتتاعى ءىس ورنىنان جىلجىپ, سەڭ قوزعالىپ كەتكەنى وسى ولقىلىقتىڭ ورنى تولعانىن تانىتقانداي. ونىڭ جارقىن مىسالى, اتالعان كومپانيا باسشىلارى سەرىك يباتوۆ پەن الەكساندر سيزيكوۆ حرومتاۋ قالاسىندا مادەنيەت ءۇيى مەن زاماناۋي سپورت كەشەنىن جانە اقتوبە قالاسىندا بالالار باقشاسىن سالىپ بەرۋ جونىندە وبلىس اكىمدىگىمەن كەلىسىم جاساعانى بولماق.
بۇل جوبالاردىڭ قۇرىلىسى جوعارىدا ايتىلعانداي, بيزنەستىڭ الەۋمەتتىك جاۋاپكەرشىلىگى اياسىندا بيىلعى جىلى باستالماق. سونىمەن بىرگە, وبلىس اكىمدىگى, كاسىپورىن باسشىلارى جانە اۋماقتىق كاسىپوداق ءبىرلەستىگى اياسىندا قول قويىلعان مەموراندۋم دا تەڭ قۇقىلى ارىپتەستىك قارىم-قاتىناستاردىڭ جاڭا قىرلارىن قالىپتاستىرادى دەپ سەنگىمىز كەلەدى. مۇندا ءۇش جاقتى ەڭبەك قاتىناستارىن رەتتەۋ, جۇمىسشى-قىزمەتكەرلەر ءۇشىن الەۋمەتتىك كەپىلدىكتەردى قامتاماسىز ەتۋ جانە كەلىسىلگەن ءىس-ارەكەتتەر مەن ءوزارا تۇسىنىستىك تۋرالى ماڭىزدى ماسەلەلەر كورىنىس تاپقان.
تەمىر قۇسايىن,
«ەگەمەن قازاقستان»
اقتوبە وبلىسى