قازاقستاننىڭ بۇۇ جانىنداعى وكىلدىگىندە (نيۋ-يورك) ەلىمىزدىڭ اتالعان ۇيىمعا مۇشەلىككە قابىلدانۋىنىڭ 25 جىلدىعىنا ارنالعان ءىس-شارا وتكىزىلدى. كەزدەسۋگە اقش-تىڭ جەتەكشى تالداۋ ورتالىقتارىنىڭ, حالىقارالىق باق وكىلدەرى – بۇۇ-نىڭ جۋرناليستەر قاۋىمداستىعىنىڭ مۇشەلەرى قاتىستى.
ءىس-شارا بارىسىندا قازاقستان رەسپۋبليكاسىنىڭ بۇۇ جانىنداعى تۇراقتى وكىلى قايرات وماروۆ قاتىسۋشىلاردى ەلدىڭ بۇۇ-مەن قارىم-قاتىناسىنداعى نەگىزگى باعىتتارى: قاۋىپسىزدىك, يادرولىق تاراتپاۋ, تەرروريزم مەن ترانسۇلتتىق قىلمىس, تۇراقتى دامۋ, كليماتتىڭ وزگەرۋى بويىنشا قازاقستاننىڭ ءوتكەن جىلدارداعى جەتىستىكتەرى, ماڭىزدى كەزەڭدەرى تۋرالى اقپاراتپەن تانىستىرىپ ءوتتى.
بۇدان بولەك, جيىن قوناقتارى وكىلدىك ازىرلەگەن بەينەفيلم ارقىلى قازاقستاننىڭ يادرولىق قارۋسىزدانۋ سالاسىنداعى باستامالارى – سەمەي پوليگونىن جابۋ, توقسانىنشى جىلدارداعى يادرولىق الەۋەتتەن باس تارتۋ, ورتالىق ازيانى يادرولىق قارۋدان ازات ايماق دەپ جاريالاۋ, دىنارالىق ۇنقاتىسۋ – الەمدىك جانە ءداستۇرلى دىندەر ليدەرلەرىنىڭ وتىرىسىن شاقىرۋ, ازياداعى ءوزارا ءىس-قيمىل جانە سەنىم شارالارى جونىندەگى كەڭەس وتكىزۋ تۋرالى مالىمەتتەرمەن تانىستى.
سونداي-اق, بۇۇ قاۋىپسىزدىك كەڭەسىندەگى تۇراقتى ەمەس مۇشەلىگى اياسىنداعى قازاقستاننىڭ باسىم باعىتتارى, كەڭەستىڭ نەگىزگى كوميتەتتەرىنىڭ توراعاسى رەتىندەگى مىندەتتەرى بولەك تالقىلاندى. بۇعان قوسا, جيىندا قازاقستاننىڭ قاۋىپسىزدىك كەڭەسىنىڭ مۇشەسى رەتىندەگى قىزمەتى ەلباسى نۇرسۇلتان نازارباەۆتىڭ بۇۇ قك مۇشەلەرىنە ارناعان «قاۋىپسىز, ءادىل جانە ءوركەندەگەن الەم قۇرۋ ءۇشىن جاھاندىق ارىپتەستىكتى نىعايتۋ جونىندەگى قازاقستاننىڭ تۇجىرىمدامالىق كوزقاراسى» اتتى ساياسي ۇندەۋى جانە «الەم. ءححى عاسىر» مانيفەسىنىڭ نەگىزگى قاعيداتتارىنا سۇيەنىپ جۇرگىزىلەتىنى اتاپ كورسەتىلدى.
سونىمەن قاتار, باسقوسۋدا ەنەرگەتيكالىق قاۋىپسىزدىك جانە الداعى ۋاقىتتا استانادا وتەتىن ەكسپو-2017 حالىقارالىق كورمەسى مەن باسقا دا تاقىرىپتار قوزعالدى.
كەزدەسۋ بارىسىندا بۇۇ باس حاتشىسىنىڭ ورىنباسارى كەڭسەسىنىڭ باسشىسى, بۇۇ-نىڭ ناشار دامىعان ەلدەر جانە تەڭىزگە شىعار جولى جوق ەلدەر بويىنشا وكىلى سانداگدورودج ەردەنبيلەگ, Global Security Institute حالىقارالىق ۇەۇ پرەزيدەنتى دجوناتان گرانوفف قازاقستاننىڭ بۇۇ-نىڭ باعدارلامالارى مەن جوبالارىن ىسكە اسىرۋداعى جانە الەمدىك شيەلەنىستەردىڭ الدىن الۋداعى, دامۋ باعدارلاماسىنىڭ اياسىنداعى ماقساتتار مەن مىندەتتەردى جۇزەگە اسىرۋداعى ماڭىزدى ۇلەسىن اتاپ ءوتتى, دەپ حابارلادى قازاقستان رەسپۋبليكاسى سىرتقى ىستەر مينيسترلىگىنىڭ ءباسپاسوز قىزمەتى.