قازاقستان دەلەگاتسياسى بۇۇ قاۋىپسىزدىك كەڭەسىنىڭ سيرياداعى احۋالدى ساياسي رەتتەۋ ماسەلەلەرى جونىندەگى وتىرىسىنا قاتىستى. قاۋىپسىزدىك كەڭەسىنىڭ جيىنىندا بۇۇ باس حاتشىسىنىڭ سيريا جونىندەگى ارناۋلى ەلشىسى ستاففان دە ميستۋرا بريفينگ وتكىزدى. بۇل تۋرالى ەلىمىزدىڭ سىرتقى ىستەر مينيسترلىگىنىڭ ءباسپاسوز قىزمەتى حابارلادى.
قاۋىپسىزدىك كەڭەسىنىڭ مۇشەلەرى سيريا اراب رەسپۋبليكاسىنىڭ ەگەمەندىگىن, تاۋەلسىزدىگى مەن اۋماقتىق تۇتاستىعىن قولدايتىنىن ءبىلدىردى. ولار داعدارىستى شەشۋدىڭ جالعىز ءارى ورنىقتى جولى 2012 جىلدىڭ 30 ماۋسىمىندا شىعارىلعان, قاۋىپسىزدىك كەڭەسىنىڭ ءتيىستى قارارىمەن جانە سيريانى قولداۋ حالىقارالىق قورىنىڭ مالىمدەمەسىمەن ماقۇلدانعان جەنەۆا كومميۋنيكەسى نەگىزىندەگى سيريالىقتاردىڭ وزدەرىنىڭ اۋقىمدى ساياسي پروتسەسى دەپ سانايدى.
وتىرىسقا قاتىسۋشىلار بۇۇ اياسىندا جەنەۆادا بيىلعى جىلدىڭ 3 ناۋرىزىندا وتكەن سيريانىڭ ىشكى كەلىسسوزدەرىنىڭ ءۇشىنشى راۋندىنا, ستاففان دە ميستۋرانىڭ بۇۇ قك 2254 قارارىنا سايكەس بولاشاق كەلىسسوزدەردىڭ كۇن ءتارتىبى تۋرالى حابارلاماسىنا جوعارى باعا بەردى.
قاۋىپسىزدىك كەڭەسىنىڭ مۇشەلەرى ايتقانداي, استانا پروتسەسىنىڭ اياسىندا قول جەتكىزىلگەن اتىستى توقتاتۋ رەجىمىنىڭ ارقاسىندا ساياسي كەلىسسوزدەردى جالعاستىرۋعا مۇمكىندىك تۋدى. ولار سيريا داعدارىسىنا قاتىستى تاراپتاردى وسى رەجىمدى تولىقتاي ساقتاۋعا جانە بۇۇ قك قارارى مەن 2016 جىلعى 29 جەلتوقسانداعى كەلىسىمدەرگە ءسايكەس, ەلدى مەكەندەرگە گۋمانيتارلىق كومەكتەر جەتكىزۋدى قامتاماسىز ەتۋگە شاقىردى.
بۇۇ ارناۋلى وكىلى س. دە ميستۋرا سيريا داعدارىسىن شەشۋدىڭ بەيبىت جولدارىن ىزدەۋدەگى استانا پروتسەسىنىڭ ءرولىن ايرىقشا اتاپ ءوتتى. ونىڭ پىكىرىنشە, جەنەۆا كەلىسسوزدەرىنىڭ كەزەكتى راۋندىنان كەيىن استانانىڭ سيريا داعدارىسىن شەشۋ ماسەلەسىندەگى ءرولى ارتا تۇسەدى.
– استانا پروتسەسى بۇۇ اياسىندا سيريادا بەيبىتشىلىك ارحيتەكتۋراسىن قالىپتاستىرۋدىڭ اجىراماس بولىگىنە اينالدى, – دەدى س. دە ميستۋرا.
ءوز كەزەگىندە, قازاقستاندىق دەلەگاتسيا بۇۇ دەلەگاتسياسى باسشىسىنىڭ سيريا ماسەلەلەرىنە قاتىستى ديپلوماتيالىق كۇش-جىگەرىن جوعارى باعالادى. جەنەۆا كەلىسسوزدەرىنىڭ ارقاسىندا تاراپتار ناقتى كۇن ءتارتىبىن قالىپتاستىردى, ەندى بارلىق تاراپتار قولداعان ساياسي رەفورمالار تۋرالى كەلىسىمدى جۇزەگە اسىرۋعا ءتيىس. جۋىردا استانا مەن جەنەۆادا وتكەن كەزدەسۋلەر التى جىلدان بەرى ءتۇيىنى تارقاتىلماعان سيريا داعدارىسىن شەشۋگە, تاراپتاردىڭ ءتۇسىنىستىككە كەلۋىنە, ءوزارا ۇنقاتىسۋلار مەن كەلىسسوزدەردىڭ ارقاسىندا كوزقاراستار قايشىلىعىن جويۋعا ىقپال ەتەدى دەگەن ءۇمىت باسىم.
قازاقستان دەلەگاتسياسى سيريانىڭ ءبىرتۇتاستىعىن, تاۋەلسىزدىگىن جانە ەگەمەندىگىن قۇرمەتتەۋ قاعيدالارىنا نەگىزدەلگەن جەنەۆا پروتسەسىنە تولىقتاي قولداۋ تانىتتى. سونىمەن قاتار, حالىقارالىق قوعامداستىقتىڭ تەرروريزممەن جانە ەكسترەميزممەن كۇرەستەگى بىرلىگىن نىعايتۋدىڭ ماڭىزدىلىعىنا نازار اۋداردى. قازاقستان پرەزيدەنتىنىڭ 2015 جىلعى قىركۇيەكتە بۇۇ باس اسسامبلەياسىنىڭ 70-سەسسياسىنىڭ مىنبەرىنەن ايتىلعان جاھاندىق تەرروريزمگە قارسى كواليتسيا قۇرۋ تۋرالى باستاماسىنىڭ ماڭىزدىلىعى ەرەكشە اتاپ كورسەتىلدى.