استانادا قازاقستان سىرتقى ىستەر ءمينيسترى قايرات ءابدىراحمانوۆ بۇۇ باس حاتشىسىنىڭ ساياسي ماسەلەلەر جونىندەگى كومەكشىسى ميروسلاۆ يەنچپەن كەزدەستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
كەزدەسۋ بارىسىندا ەلىمىزدىڭ سىرتقى ساياسات ۆەدومستۆوسىنىڭ باسشىسى بۇۇ-نىڭ جوعارى لاۋازىمدى وكىلىنە ەلىمىزدە قولعا الىنعان كونستيتۋتسيالىق رەفورمالار مەن مەملەكەت باسشىسى نۇرسۇلتان نازارباەۆتىڭ قازاقستان حالقىنا ارناعان بيىلعى جولداۋىندا قامتىلعان باسىم باعىتتار جونىندە اڭگىمەلەپ بەردى.
ءمينيستردىڭ ايتۋىنشا, ەلىمىزدە جۇزەگە اسىرىلىپ جاتقان كونستيتۋتسيالىق رەفورمالار بۇۇ-نىڭ ورنىقتى دامۋ ماقساتتارىمەن سايكەس كەلەدى. بۇل رەفورمالار ەل تاۋەلسىزدىگىن نىعايتا تۇسۋگە, مەملەكەتتىك ينستيتۋتتاردىڭ تيىمدىلىگىن ارتتىرۋعا, ساياسي تۇراقتىلىق پەن ەكونوميكالىق ورنىقتى دامۋدى قامتاماسىز ەتۋگە تىكەلەي اسەر ەتەدى.
ميروسلاۆ يەنچ ءوز كەزەگىندە قازاقستان كونستيتۋتسياسىنا ەنگىزىلگەن وزگەرىستەر ەلدىڭ ساياسات جانە ەكونوميكا سالاسىندا ۇلكەن تابىستارعا قول جەتكىزۋىنە تىكەلەي اسەر ەتەتىنىن ايتتى. سونداي-اق, ول ايماقتىق جانە حالىقارالىق وزەكتى ماسەلەلەردى شەشۋ ىسىندە ەلىمىزدىڭ ءرولىن جوعارى باعالاي كەلىپ, سيريا جونىندەگى كەلىسسوزدەردى ىلگەرىلەتۋدە استانا پروتسەسىنىڭ ماڭىزدىلىعىنا توقتالدى. ونىڭ ايتۋىنشا, قازاقستاننىڭ بۇل ءىس-قيمىلدارى بۇۇ باس حاتشىسىنىڭ الەمدەگى ءتۇرلى داۋ-جانجالداردى رەتتەۋدە بەيبىت كەلىسىمدەرگە باسىمدىق بەرۋ جونىندەگى يدەياسىمەن استاسىپ جاتىر.
كەزدەسۋدە قازاقستان جاعى ورتالىق ازياداعى ەكىجاقتى جانە كوپجاقتى ىنتىماقتاستىقتىڭ ءوز دەڭگەيىندە دامىپ وتىرعانىن, ايماق ەلدەرى كوپتەگەن وزەكتى ماسەلەلەردى ءوزارا كەلىسىممەن شەشۋگە مۇددەلىلىك تانىتىپ كەلە جاتقانىنىڭ ناتيجەسىندە ەڭسەرىلۋى قيىن تۇيتكىلدەر جوق ەكەنىن اتاپ كورسەتتى. قازاقستاننىڭ باس ديپلوماتى, سونداي-اق, ەلىمىز بۇۇ قاۋىپسىزدىك كەڭەسىنىڭ مۇشەسى رەتىندەگى قىزمەتىندە ورتالىق ازيا مەملەكەتتەرىنىڭ ءوزارا ىنتىماقتاستىعىنىڭ الەۋەتىن ورنىمەن پايدالاناتىنىن اتادى. بۇل جەردەگى ماسەلە اۋعانستانعا جانە وزگە دە ايماقتارعا بۇۇ قاۋىپسىزدىك كەڭەسى مۇشەلەرى دەلەگاتسياسىنىڭ ساپارىن, سونداي-اق, وڭىردەگى قاۋىپسىزدىكتى قامتاماسىز ەتۋ باعىتىندا مۇددەلى ەلدەردىڭ قاتىسۋىمەن ايماقتىق كونفەرەنتسيالار ۇيىمداستىرۋ جونىندە بولىپ وتىر.
بۇدان بولەك, تاراپتار ورتالىق ازيا مەن اۋعانستاننىڭ قاۋىپسىزدىگىن قامتاماسىز ەتۋدىڭ ماڭىزدىلىعىن ايتا كەلىپ, الەمدىك جانە ايماقتىق بەيبىتشىلىكتى نىعايتۋ باعىتىندا جوعارى دەڭگەيلى پىكىرتالاستار ۇيىمداستىرۋعا, سونداي-اق, نەگىزگى مىندەتتەردى جۇزەگە اسىرۋ بارىسىندا بىرلەسە جۇمىس ىستەۋگە ىنتالى ەكەندەرىن ءبىلدىردى.
كەزدەسۋدە ق.ءابدىراحمانوۆ بۇۇ-نىڭ تەرروريزمگە قارسى كۇرەسكە قاتىستى رەفورماسىنا, بۇۇ باس حاتشىسى ورىنباسارىنىڭ باسقارۋىنداعى تەرروريزمگە قارسى كۇرەس ءوفيسىنىڭ قۇرىلعانىنا قولداۋ ءبىلدىردى.
قورىتا ايتقاندا, كەزدەسۋ ادەتتەگىدەي دوستىق راۋىشتە ءوتتى جانە ول قازاقستان مەن بۇۇ-نىڭ ەكىجاقتى ىنتىماقتاستىعىنىڭ جوعارى دەڭگەيىن كورسەتىپ بەردى.