اقوردادا مەملەكەتتىك حاتشى گۇلشارا ابدىقالىقوۆانىڭ تورايىمدىعىمەن مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندەگى مەملەكەتتىك كوميسسيانىڭ وتىرىسى ءوتتى.
كوميسسيا باسقوسۋىندا مادەنيەت جانە سپورت مينيسترلىگىنىڭ جاۋاپتى حاتشىسى ق.ۋاليەۆتىڭ قازاقستان رەسپۋبليكاسى مەملەكەتتىك رامىزدەرىنىڭ 25 جىلدىعىن اتاپ ءوتۋ بويىنشا جوسپارلانعان ءىس-شارالارعا قاتىستى اقپاراتى تىڭدالدى. مەملەكەتتىك حاتشى:
– وزدەرىڭىزگە بەلگىلى, بيىلعى جىلى مەملەكەتتىك رامىزدەرىمىز – مەملەكەتتىك تۋ مەن ەلتاڭبامىزدىڭ قابىلدانعانىنا 25 جىل تولادى. بۇل – ەلدىكتى جانە ەگەمەندىكتى ايقىندايتىن اتاۋلى داتا. سوندىقتان وسى مەرەكەلەر اياسىندا استانا, الماتى قالالارى ارنايى ءىس-شارالار وتكىزۋگە ءتيىس. مەملەكەتتىك رامىزدەردىڭ 25 جىلدىعىن مەرەكەلەۋدەگى باستى ماقسات – ماڭگىلىك ەل مۇراتتارىن, قازاقستاندىق ءپاتريوتيزمدى ناسيحاتتاۋ, وسكەلەڭ ۇرپاقتى تاۋەلسىزدىكتى قورعاۋعا, باعالاۋعا تاربيەلەۋ, – دەدى.
سونىمەن قاتار, كوميسسيا مۇشەلەرى قورعانىس مينيسترلىگى بەكىتۋگە ءتيىستى «ەل قورعانى» ۆەدومستۆولىق ناگراداسىن بەكىتۋ تۋرالى ۇسىنىستى قارادى. قورعانىس ءمينيسترى ساكەن جاسۇزاقوۆتىڭ ايتۋىنشا, بۇل ناگرادا ەرلىگىمەن, ەڭبەگىمەن ەرەكشەلەنگەن اسكەريلەرگە بەرىلۋگە ءتيىس.
– ءبىز بۇل مەدالدى ەرلىگىمەن, ەڭبەگىمەن ەرەكشەلەنگەن اسكەريلەردى – گەنەرالدار قۇرامىن, وفيتسەرلەردى, سەرجانتتار مەن سولداتتاردى ماراپاتتاۋدى جوسپارلاپ وتىرمىز. سونىمەن قاتار, قورعانىس كۇشتەرىنىڭ الەۋەتىن كۇشەيتۋگە سۇبەلى ۇلەس قوسقان باسقا دا ازاماتتار ماراپاتتالادى. مەنىڭشە, قاتارداعى جاۋىنگەرلەردەن باستاپ, گەنەرالدارعا دەيىن ءاسكەري قىزمەتتە كوزگە ءتۇسكەنى ءۇشىن ءوزىمىزدىڭ ءتول ۆەدومستۆولىق مەدالدى يەلەنگەنى دۇرىس بولادى, – دەدى گەنەرال-پولكوۆنيك س.جاسۇزاقوۆ.
مەملەكەت باسشىسى «ەل قورعانى» مەدالىن تاعايىنداۋ تۋرالى ۇسىنىسقا قولداۋ بىلدىرگەن. جاڭا ناگرادا بيىلعى جىلى اتالىپ وتىلەتىن قورعانىس كۇشتەرىنىڭ 25 جىلدىعى قارساڭىندا تاپسىرىلادى دەپ جوسپارلانىپ وتىر.
ارنۇر اسقار,
«ەگەمەن قازاقستان»