ەلىمىزدە كونستيتۋتسيالىق رەفورمالاردىڭ جۇزەگە اسۋى, پارلامەنت پالاتالارىنىڭ بىرلەسكەن وتىرىسىندا «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» زاڭنىڭ قابىلدانۋى بارشا قازاقستاندىقتاردىڭ ويى مەن كوڭىلىنەن شىعىپ وتىر. وسى تاريحي شەشىمگە بايلانىستى قازاقستان حالقى اسسامبلەياسى ۇسىنعان رەسپۋبليكالىق بىرىڭعاي كۇن كەستەسىنە وراي اقتوبە قالاسىندا «كونستيتۋتسيالىق رەفورمانىڭ نەگىزگى ماقساتى» دەگەن تاقىرىپتا دوڭگەلەك ۇستەل وتكىزىلدى. اقتوبە وبلىسى اكىمدىگى اپپاراتى قوعامدىق كەلىسىم مەملەكەتتىك مەكەمەسى ۇيىمداستىرعان باسقوسۋعا عالىمدار, ەتنومادەني بىرلەستىكتەر مەن قوعامدىق ۇيىمداردىڭ جانە عىلىمي-ساراپتامالىق توپتىڭ مۇشەلەرى, زاڭگەرلەر مەن مەملەكەتتىك قىزمەتشىلەر قاتىستى.
دوڭگەلەك ۇستەلدە العاشقى ءسوز العان ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى ەكونوميكا جانە قۇقىق ينستيتۋتى ديرەكتورىنىڭ ورىنباسارى, زاڭ عىلىمىنىڭ ماگيسترى نۇرگۇل ءوربىسىنوۆا اتا زاڭعا ەنگىزىلگەن وزگەرىستەر ۋاقىت تالابىنان تۋىنداعانىن اتاپ كورسەتتى. ءارى بۇگىنگى قازاقستاندىق قوعامنىڭ جەدەل قارقىنمەن دامۋ ءۇردىسى دە وسىنداي قادامعا بارۋ قاجەتتىگىن تالاپ ەتكەنىنە توقتالدى. پرەزيدەنتتىڭ قولىنداعى اسا جاۋاپتى بىرقاتار وكىلەتتىكتەردىڭ پارلامەنت پەن ۇكىمەتكە
اۋىسۋى – مەملەكەتىمىزدىڭ وزگەگە ۇقسامايتىن دامۋ جولى مەن مودەلىنە ەشقانداي نۇقسان كەلتىرە المايدى. مۇنداي جاعدايدا بيلىكتىڭ اتالعان تارماقتارىنىڭ وكىلەتتىگى كەڭەيىپ, ءرولى ارتا تۇسەدى دەپ قورىتتى ول ءوز ويىن.
سونداي-اق, اقتوبە وبلىسى بويىنشا مەدياتسيانى دامىتۋ ورتالىعىنىڭ جەتەكشىسى ساۋلە سەيداحمەتوۆا كونستيتۋتسيالىق رەفورمانىڭ ءبىتىم-بولمىسى مەن سيپاتىنا تالداۋلار جاسادى. حالىق پەن بيلىكتىڭ اراقاتىناسىن ايقىندايتىن باستى زاڭ رەتىندە سوڭعى وزگەرىستەردەن كەيىن ەل كونستيتۋتسياسى قاساڭدىقتان ارىلىپ, ودان ءارى اجارلانا تۇسكەنىن ايتتى. كەيىنگى كەزدە ەلىمىزدە ساياسي جاڭعىرتۋلارعا باسا ءمان بەرىلۋدە. ونى ويداعىداي ىسكە اسىرۋعا دا كونستيتۋتسيالىق رەفورما بەرىك نەگىز قالايدى, – دەپ ءتۇيىن جاسادى ساۋلە رادۋلوۆنا. كەزدەسۋ كەزىندە قازاقستان حالقى اسسامبلەياسى جانىنداعى عىلىمي-ساراپتامالىق ورتالىق توراعاسىنىڭ ورىنباسارى, فيلوسوفيا عىلىمدارىنىڭ كانديداتى ۇمبەتحان سارسەنبين كونستيتۋتسيالىق رەفورمانىڭ باستى ماقساتى, بيلىك تارماقتارىن ءوزارا تەڭدەستىرۋ, ەل الدىنداعى اۋىر جۇكتى تەڭ تارتىسۋ ەكەنى جونىندە وي تارقاتتى. ءارى ول پرەزيدەنتتىك بيلىك ۆەرتيكالى ساقتالا بەرەتىنى, سونىمەن ءبىر مەزگىلدە پارلامەنتتىڭ باسقارۋ فۋنكتسياسى كۇشەيە تۇسەتىنى, ەكونوميكالىق ماسەلەلەر جونىندەگى مىندەتتەر ۇكىمەتكە جۇكتەلگەنى اتالعان رەفورمانىڭ باستى ءمانى بولىپ تابىلاتىنىن جەتكىزدى.
دوڭگەلەك ۇستەلگە قاتىسۋشىلار كونستيتۋتسيالىق رەفورمانىڭ باستى ماقساتى مەن ارتىقشىلىقتارىن اتاپ كورسەتىپ, ونى ءبىراۋىزدان قولدايتىندىقتارىن ءبىلدىردى.
تەمىر قۇسايىن,
«ەگەمەن قازاقستان»
اقتوبە وبلىسى