دوستىق ۇيىندە وبلىستىق قازاقستان حالقى اسسامبلەياسى ءمۇشەلەرىنىڭ, ەتنومادەني بىرلەستىكتەر جەتەكشىلەرىنىڭ, عىلىمي-ساراپتامالىق كەڭەس, جاستار جانە زيالى قاۋىم وكىلدەرىنىڭ قاتىسۋىمەن ءىس-شارا ءوتتى. ول كونستيتۋتسيالىق رەفورمالاردى قولداۋ بىرىڭعاي كۇن اياسىندا ۇيىمداستىرىلىپ, جاڭعىرۋ جولىنداعى ىرگەلى قادامدار اڭگىمە ارقاۋىنا اينالدى.
وبلىستىق قحا-نىڭ حاتشىلىق مەڭگەرۋشىسى نايل ساليموۆ «كونستيتۋتسيالىق رەفورمالار جانە وبلىستىق قازاقستان حالقى اسسامبلەياسىنىڭ دامۋ باعىتتارى» دەگەن تاقىرىپتا بايانداما جاسادى. شەشەن ءوز سوزىندە قازاقستان رەسپۋبليكاسىنىڭ كونستيتۋتسياسىنا ەنگىزىلگەن وزگەرىستەر مەن تولىقتىرۋلار ەل دامۋىنىڭ جاڭا پاراعىنا جول اشاتىنىن, دەموكراتيالىق ۇدەرىستەر قوعامىمىزدى بىرىكتىرە تۇسەتىنىن, مەملەكەتتىك بيلىكتىڭ جاڭا ۇلگىلەرىن قالىپتاستىراتىنىن جەتكىزدى.
پرەزيدەنت ەلدى ساياسي جاڭعىرتۋدىڭ بۇگىنگىدەي ماڭىزدى كەزەڭىندە ۇكىمەت پەن پارلامەنتتىڭ ءرولى مەن دەربەستىگىن كۇشەيتۋگە ەرەكشە نازار اۋداردى. وسى ورايدا, پرەزيدەنتتىك باسقارۋ فورماسى ساقتالا وتىرىپ, سونىمەن بىرگە, بيلىكتىڭ باسقا تارماقتارىنىڭ وكىلەتتىكتەرى ارتىپ, كاسىبيلىگى نىعاياتىنىن اتاپ وتكەن ءجون. قازىردىڭ وزىندە جۇرتشىلىق زاڭ شىعارۋشى جانە اتقارۋشى ورگاندارعا ۇلكەن سەنىم ءبىلدىرىپ, قوعامدى دەموكراتيالاندىرۋدىڭ ماڭىزدى كەزەڭىنە بەت العانىمىزدى قۋاتتاپ وتىر, دەدى ول.
وبلىستىق ءماسليحاتتىڭ دەپۋتاتى راشبيل ەۆداەۆ جەرگىلىكتى مەملەكەتتىك باسقارۋ, وعان قاتىسۋعا حالىق قالاۋلىلارى مەن تۇرعىنداردىڭ بەلسەندىلىگىن ارتتىرۋ جايىن ءسوز ەتتى. زاڭدار ارقىلى بيلىك تارماقتارى مەن ولاردىڭ دەڭگەيلەرى اراسىنداعى وكىلەتتىكتەردى بارىنشا ءتيىمدى ەتىپ, قايتا بولەمىز. وسىنىڭ ءبارى جاھاندىق جانە وڭىرلىك سىن-قاتەرلەرگە ۋاقتىلى جاۋاپ بەرىپ, الدىن الۋ ءۇشىن جاسالعان دەگەن ەلباسى ءسوزىن كەلتىرە وتىرىپ, جينالعانداردى ساياسي جاڭعىرتۋلاردىڭ بەل ورتاسىنان كورىنۋگە شاقىردى.
«ۇرپاق» قوعامدىق ۇيىمىنىڭ ءتورايىمى گۇلباقشا مۇساباەۆا, «باربانگ» كۇرد قاۋىمداستىعى جەرگىلىكتى ءبولىمشەسىنىڭ جەتەكشىسى راشيد ناديروۆ «بەرەكە باسى – ءبىرلىكتە» دەگەن حالىق دانالىعىن ەسكە تۇسىرە وتىرىپ, بىرەگەي ينستيتۋت دەڭگەيىنە كوتەرىلگەن قازاقستان حالقى اسسامبلەياسىنىڭ ەتنوسارالىق جانە كونفەسسياارالىق كەلىسىمنىڭ باستى تەتىگى رەتىندەگى ءرولى مەن ماڭىزىن اتاپ كورسەتتى.
ونىڭ قازاقستاندىقتاردى بەيبىتشىلىك پەن كەلىسىمگە ۇندەۋدەگى, تولەرانتتىلىقتى قالىپتاستىرۋداعى ورنى ەرەكشە. ءبۇگىنگى كۇننىڭ كۇردەلى ماسەلەلەرىنە باتىل ارالاسىپ, كونستيتۋتسيالىق زاڭ شەڭبەرىندە سان-سالالى جۇمىستار اتقارىپ كەلەدى. ەلباسى ۇسىنعان كونستيتۋتسيالىق رەفورمالاردى جان-جاقتى قولداپ, ساياسي وزگەرىستەردى قۋاتتايدى.
وزگە دە سويلەۋشىلەر ۇسىنىلعان كونستيتۋتسيالىق رەفورمالاردىڭ جالپىحالىقتىق قولداۋعا يە بولعانىنا ەرەكشە ەكپىن ءتۇسىردى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى