ءبىلىم جانە عىلىم مينيسترلىگىندە بارلىق ايماقتارمەن تىكەلەي بايلانىستا, بەينە كونفەرەنتسيا رەجىمىندە بالالار ۇيلەرى جانىنداعى بىرىڭعاي رەسپۋبليكالىق قامقورشىلار كەڭەسىنىڭ وتىرىسى ءوتتى.
بالالار ۇيلەرىندە تاربيەلەنۋشى بالالاردىڭ ءومىرىن جاقسارتۋ, ولاردىڭ قۇقىقتارىنىڭ بۇزىلۋىنا جول بەرمەۋ, سونداي-اق بالالاردى قازاقستان ازاماتتارىنىڭ وتباسىلارىنا بەرىپ, اتا-انانىڭ جىلىلىعى مەن مەيىرىمىن كورىپ وسەتىن وتباسىعا قايتارۋ بويىنشا جۇمىستاردى جەتىلدىرۋدى باستى نازارىندا ۇستايتىن كەڭەس وتىرىسىندا ءبىلىم جانە عىلىم ۆيتسە-ءمينيسترى بيبىگۇل اسىلوۆا: «بۇگىننەن باستاپ جەتىم بالالارعا ارنالعان ءبىلىم بەرۋ مەكەمەلەرى جانىنداعى قامقورشىلىق كەڭەستەرى ءوز جۇمىسىن باستادى دەۋگە بولادى. كەڭەستەر قۇرامىنا ۇكىمەتتىك ەمەس ۇيىمدار, مەملەكەتتىك ورگاندار, ساياسي پارتيالار, بيزنەس وكىلدەرى, دەمەۋشىلەر مەن مەتسەناتتار ەندى» دەي كەلە, بالالاردىڭ وتباسىندا تاربيەلەنۋ قۇقىعىن جۇزەگە اسىرۋ ءۇشىن جۇمىستاردىڭ بەلسەندى تۇردە ءجۇرگىزىلۋىنە ءمان بەرۋ كەرەكتىگىن باسا ايتقان. بۇل رەتتە, قامقورشىلار كەڭەسى ۋاكىلەتتى ورگاندارمەن بىرلەسە وتىرىپ, بالا قابىلدايتىن وتباسىلاردى دايىنداۋ بويىنشا تالاپتاردى, سونداي-اق بالالاردى بالالار ۇيىنەن قابىلدايتىن وتباسىعا بەرۋدى دايىنداۋدىڭ ءتيىمدى ءتاسىلدەرىن جەتىلدىرۋدە ىزدەنىستەرگە قولداۋ كورسەتۋ بويىنشا كوپتەگەن ويدى ورتاعا سالدى.
جيىندا ايتىلعانداي بۇگىنگى تاڭدا بالانى ءوز وتباسىندا تاربيەلەۋگە العىسى كەلەتىن وتباسىلار ءۇشىن, اتا-انا قامقورلىعىنسىز قالعان بالالار مەن جەتىم بالالاردىڭ رەسپۋبليكالىق مالىمەتتەر بازاسى قۇرىلىپ, بالالاردى وتباسىنا ورالتۋدا زاڭنامامەن ورنالاستىرۋدىڭ جاڭا تۇرلەرى انىقتالعان ەكەن. ول – بالا قابىلدايتىن وتباسى, بالا قوناقتايتىن وتباسى (كانيكۋل كەزەڭدەرىندە, دەمالىس جانە مەرەكە كۇندەرى بالالاردى ۋاقىتشا ورنالاستىرۋ ءتۇرى) سىندى زاڭنامالىق تۇرعىدا بەلگىلەنگەن تارتىپتەر. ايتا كەتۋ كەرەك, ەلىمىزدە اتا-انا قامقورلىعىنسىز قالعان بالالار سانى جىلدان-جىلعا ازايۋدا, وتكەن جىلى بالالار مەن جەتىم بالالارعا ارنالعان ۇيىمداردا 8066 بالا تاربيەلەنسە, 2017 جىلدىڭ 1 قاڭتارىندا ولاردىڭ سانى 7236 بولىپ, بالالار سانىنىڭ ازايۋىنا بايلانىستى ارنايى مەكەمەلەر جەلىسى دە قىسقارعان. ياعني جەتىم بالالارعا ارنالعان ۇيىمدار جۇيەسى 48 بىرلىككە ازايعان كورىنەدى (188-دەن 140-قا دەيىن).
وتىرىس باستالماس بۇرىن جۋرناليستەر ساۋالىنا جاۋاپ بەرگەن ءمينيستردىڭ بالالار قۇقىقتارىن قورعاۋ بويىنشا كەڭەسشىسى ءباليا اكىمبەكوۆا قامقورشىلىق كەڭەس مۇشەلەرىنىڭ 40 پايىزىن ۇكىمەتتىك ەمەس ۇيىمدار كۇراۋى قاجەتتىگىن, كەڭەستىڭ توراعاسى دا ۇكىمەتتىك ەمەس ۇيىمنىڭ وكىلى بولعانى ءجون ەكەنىن ايتقان. «قازىرگى ۋاقىتتا ءبىلىم جانە عىلىم مينيسترلىگى قامقورشىلىق كەڭەستەرىن قۇرۋ بويىنشا ءتيىستى ەرەجەلەردى ازىرلەپ قويدى. جاقىن ارادا اتالعان ەرەجەلەردى بەكىتۋ جوسپارلانىپ وتىر. جالپى, زاڭنامادا ءبىلىم بەرۋ مەكەمەلەرى جانىنان قامقورشىلىق كەڭەستەرىن قۇرۋ نورماسى بار» دەگەن ول كەڭەس جۇمىسىنىڭ جالپى قوعامعا اشىق بولاتىنىن, اقپاراتتاردىڭ جاريالىلىعى قامتاماسىز ەتىلەتىنىن جەتكىزگەن.
كەڭەس قۇرامىنا قوعامدىق ۇيىمداردىڭ وكىلدەرى, بالالاردىڭ قۇقىقتارىن قورعاۋ قورى, قابىلداۋشى اتا-انالار اسسوتسياتسياسى, باسقارۋ ورگاندارى (ونىڭ ىشىندە قۇقىق قورعاۋ ورگاندارى), پارتيا جانە «اتامەكەن» ۇكپ ءمۇشەلەرى ەنىپ, بىرىڭعاي رەسپۋبليكالىق قامقورشىلار كەڭەسىنىڭ كەلەسى وتىرىسى ەندى 6 ايدان سوڭ وتكىزىلىپ, وتىرىستا كەڭەستىڭ سول ۋاقىت ارالىعىندا اتقارعان جۇمىسىنىڭ قورىتىندىسى تىڭدالىپ, بارلىق بۇقارالىق اقپارات قۇرالدارى مەن بعم جانە بالالاردىڭ قۇقىقتارىن قورعاۋ كوميتەتىنىڭ سايتىندا, ينتەرنەت-رەسۋرستاردا جاريالانادى دەپ شەشىلدى.
انار تولەۋحانقىزى,
«ەگەمەن قازاقستان»