استانا قالاسىنداعى «Festival Avenue» عيماراتىندا قازاقستاندىق تاۋارلار پاۆيلونى اشىلدى. ەكسپو-2017 حالىقارالىق مامانداندىرىلعان كورمەسىنە وراي تانىستىرىلعان ساۋدا نۇكتەسىن «حالىق ماركاسى» فەدەراتسياسى مەن ەۋرازيالىق ىسكەرلىك وداعى ۇيىمداستىرعان. سالتاناتتى جاعدايدا كوپشىلىك نازارىنا ۇسىنىلعان پاۆيلوندا ۇزدىك دەپ تانىلعان ءجۇز شاقتى وتاندىق تاۋار ءوندىرۋشىنىڭ ونىمدەرى قويىلادى.
«ءبىزدىڭ بار ماقساتىمىز ءوزىمىزدىڭ تاۋار وندىرۋشىلەرگە قولداۋ كورسەتۋ بولىپ تابىلادى. قازىرگى تاڭدا پاۆيلونعا جيىرمادان استام برەند ءوز ونىمدەرىن ۇسىنىپ وتىر. ال ەكسپو-2017 حالىقارالىق كورمەسىنە دەيىن جالپى ۇزدىك 100 برەند ءوز ءونىمىن كورسەتەدى دەپ جوسپارلاۋدامىز. كوپشىلىك نازارىنا ۇسىنىلعان تاۋارلاردىڭ الەۋەتى جوعارى, ەكسپورتقا باعىتتالعان», دەيدى فەدەراتسيا پرەزيدەنتى ريمما تاجىباەۆا. ونىڭ ايتۋىنشا, تاڭدالعان كومپانيالارعا ءوز جۇمىستارىن ودان ءارى بەلسەندى جۇرگىزۋگە بارلىق جاعداي جاسالعان. ولار وسىندا ءوز ءونىمىن قويۋ ءۇشىن ءبىر جىلعا بار-جوعى 300 مىڭ تەڭگە تولەيدى. بۇل قارجى ءتيىستى قىزمەت كورسەتەتىن ازاماتتارعا بەرىلەتىن كورىنەدى. ياعني, ءاربىر كاسىپكەردەن تۇسكەن قاراجات ساتۋشىعا, قاۋىپسىزدىك قىزمەتىنە تولەنەدى.
شارانى ۇيىمداستىرۋشىلار پاۆيلونعا قويىلعان وتاندىق ونىمدەرگە شەتەلدىك قوناقتار تاراپىنان سۇرانىس جوعارى بولاتىندىعىنا سەنىمدى. «استانا اكىمدىگى ەلىمىز ءۇشىن ماڭىزدى كورمەنىڭ تۋريستىك كارتاسىن جاساعان ۋاقىتتا ءبىز ءوتىنىشىمىزدى بىلدىردىك. بۇل نۇكتە دە حالىقارالىق كورمەنىڭ تۋريستىك كارتاسىنا كىردى. سوندىقتان شەتەلدىك قوناقتار وسى اۋماققا دا ات باسىن بۇرادى. سەبەبى, مۇندا قازاقتىڭ ۇلتتىق ونىمدەرى مەن تاعامدارى جانە ساپالى تاۋارلار قويىلادى», دەدى ريمما تاجىباەۆا.
پاۆيلونعا ءونىمىن قويعان كاسىپكەرلەردىڭ ءبىرى – «جارىلقاسىم» شارۋا قوجالىعىنىڭ ديرەكتورى ناعيما جارىلقاسىموۆا. زەينەتكە شىققان ۇستاز جاڭا تەحنولوگيا ارقىلى قۇرتتىڭ بەس ءتۇرىن جاساعان. «مۇندا تابيعي ونىمدەردەن – قىزىلشا, قىمىزدىق, اسقاباق, جاڭعاق جانە ىرىمشىكتەن جاسالعان قۇرت تۇرلەرىن اكەلدىم. ونىمدەرىمدى ەندى عانا پاتەنتتەدىم. ەكسپو-2017 كورمەسى كەزىندە ءوز ءونىمىمدى, ياعني قازاقتىڭ ۇلتتىق تاعامىن برەندكە اينالدىرعىم كەلەدى. سەبەبى, بۇل اتا-بابامىزدان كەلە جاتقان اسىل مۇرا», دەيدى ول. ساۋدا ورنىندا بۇدان بولەك, «ءومىر ارت ستۋديو» جشس-ءنىڭ بۇيىمدارى, ايدا قاۋمەنوۆانىڭ ۇلتتىق كيىمدەرى, «دۋداراي» جشس-ءنىڭ كونديتەرلىك ونىمدەرى, «بالاۋسانىڭ» اشەكەي بۇيىمدارى قويىلعان.
اسحات رايقۇل,
«ەگەمەن قازاقستان»