قازاقستان پرەزيدەنتى نۇرسۇلتان نازارباەۆ 10 ناۋرىزدا «كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى» زاڭعا جاريا تۇردە قول قويۋ ءراسىمىندە ءسوز سويلەدى, دەپ حابارلادى پرەزيدەنتتىڭ باسپاسوز قىزمەتى. «ەگەمەن قازاقستان» ەلباسى ءسوزىنىڭ تولىق ءماتىنىن ۇسىنادى.
قادىرلى قاۋىم!
قۇرمەتتى قازاقستاندىقتار!
ءبىز بۇگىن مەملەكەتىمىز ءۇشىن ءمانى زور تاريحي شەشىمنىڭ جۇزەگە اساتىن ساتىنە كۋا بولامىز. مەن كونستيتۋتسياعا وزگەرىستەر مەن تولىقتىرۋلار ەنگىزۋ تۋرالى زاڭعا جاريا تۇردە قول قويعالى تۇرمىن.
بۇل – قازىرگى باسقارۋ جۇيەسىن جاڭعىرتۋعا باستايتىن ماڭىزدى قادام.
زاڭ بيلىك تارماقتارى اراسىنداعى قارىم-قاتىناستى كونستيتۋتسيالىق دەڭگەيدە تەڭگەرىمدى ەتۋگە باعىتتالعان. ونىڭ جوباسى ءبىر اي بويى قىزۋ قوعامدىق تالقىلاۋدان وتكەنىن بىلەسىزدەر. سونىڭ ناتيجەسىندە جۇرتشىلىق تاراپىنان 6 مىڭنان استام ۇسىنىس كەلىپ ءتۇستى.
ارنايى قۇرىلعان جۇمىس توبى بۇل ۇسىنىستاردىڭ بارلىعىن ساراپتاپ قاراپ, ءبىر تۇجىرىمعا كەلدى.
ءبىز كوپشىلىكتىڭ اتا زاڭداعى 26-باپقا وزگەرىس ەنگىزۋ جونىندەگى ۇسىنىسقا قاتىستى پىكىرىنە ەرەكشە ءمان بەردىك. ۇسىنىستاردىڭ ءبارى مۇقيات قارالعان سوڭ مەن ءتۇپكىلىكتى جوبانى پارلامەنت قاراۋىنا ەنگىزدىم.
پارلامەنتتىڭ بىرلەسكەن وتىرىسىندا ەكى رەت قارالىپ, قابىلدانعان بۇل زاڭ بيلىك تارماقتارى اراسىندا وكىلەتتىكتەردى قايتا بولەدى. سول ارقىلى زاڭ شىعارۋشى بيلىك پەن ۇكىمەتتىڭ مەملەكەتتىك باسقارۋ جۇيەسىندەگى جاڭا ءرولى ايقىندالادى.
ءبىز وكىلدى ورگاننىڭ قۇزىرىن كەڭەيتىپ, ۇكىمەتتىڭ دەربەستىگى مەن جاۋاپكەرشىلىگىن ارتتىردىق.
مەن قوعامدىق تالقىلاۋعا بەلسەنە اتسالىسقان ەل ازاماتتارىنىڭ بارىنە شىنايى ريزاشىلىعىمدى بىلدىرەمىن. سونداي-اق, جۇمىس توبىنا زور العىس ايتامىن. جۇمىس توبىنا مەملەكەتتىك قىزمەتشىلەر, پارلامەنت دەپۋتاتتارى, زاڭگەرلەر, ۋنيۆەرسيتەتتەر باسشىلارى قاتىستى. پارلامەنت دەپۋتاتتارى كوپ ۇسىنىس ەنگىزىپ, ناقتى جۇمىس ىستەدى. بارلىق شارالار ءۇشىن راحمەت ايتامىن. زاڭمەن جۇمىس ءجۇرگىزىپ, ماڭىزدى مىندەت اتقارعان پارلامەنت دەپۋتاتتارىنا دا كوپ راحمەت. وسىلايشا, وتانىمىزدىڭ باستى قۇجاتى كەمەلدەنە ءتۇستى.
كونستيتۋتسيادان كەيىن قولدانىستاعى زاڭدارعا وزگەرىستەر ەنگىزىلەدى. وسىعان وراي ءتيىستى جۇمىستار جۇرگىزىلەدى.
ەنگىزىلگەن زاڭدى مەن كونستيتۋتسيانىڭ تالابى بويىنشا كونستيتۋتسيالىق كەڭەسكە جىبەرىپ, بۇل زاڭنىڭ كونستيتۋتسياعا جانە قازاقستاننىڭ زاڭدارىنا ساي ەكەنى جونىندە تاعى دا دالەلدەمە الدىم.
ەندى زاڭعا قول قويىپ, ىسكە اسىرۋعا بولادى.
قۇرمەتتى قازاقستاندىقتار!
بۇگىنگى رەفورما – مەملەكەتىمىز دامۋىنىڭ زاڭدى ءناتيجەسى. ءبىز – ءوز مەملەكەتتىلىگىن قۇرۋ ۇستىندەگى جاس ەلمىز. بىزگە وزگەرىس ۇستىندەگى دۇنيە تالاپتارىنا ەكونوميكادا دا, سونداي-اق, ساياساتتا دا جاۋاپ بەرۋىمىز قاجەت.
پرەزيدەنت وكىلەتتىكتەرىنىڭ بىرقاتارى بيلىكتىڭ باسقا تارماقتارىنا بەرىلەدى. ۇكىمەت قابىلدايتىن شەشىمدەرى ءۇشىن ءوزىنىڭ جاۋاپكەرشىلىگىن كۇشەيتەدى. پارلامەنت ۇكىمەت پەن اتقارۋشى ورگانداردىڭ قىزمەتتەرىن باقىلاۋ ءۇشىن جاڭا وكىلەتتىكتەرگە يە بولادى. ەلىمىزدىڭ كونستيتۋتسيالىق قۇرىلىسى, ەگەمەندىگى مەن تاۋەلسىزدىگى مىزعىماستىعىنىڭ كەپىلدىگى نىعايا تۇسەتىن بولادى.
ساياسي جۇيە دەموكراتيالىلىق پەن ورنىقتىلىقتىڭ ۇلكەن دەڭگەيىنە قول جەتكىزەدى. سونىمەن ءبىر مەزگىلدە, باسقارۋدىڭ پرەزيدەنتتىك فورماسى قازاقستان رەسپۋبليكاسىنىڭ بازالىق ىرگەتاسى بولىپ قالادى. زاڭ جوباسىن تالقىلاۋ بارىسىندا جۇرتشىلىق پرەزيدەنتتىك بيلىكتىڭ ءالسىرەۋىنە قاتىستى وزدەرىنىڭ الاڭداۋشىلىقتارىن ءبىلدىردى. بارشانى ەلىمىزدىڭ تۇتاستىعى, مەملەكەتىمىزدىڭ تۇراقتىلىعى, حالقىمىزدىڭ بىرلىگى مەن دوستىعى تولعاندىرادى. بيلىك تەڭگەرىمدىلىرەك, يكەمدىرەك جانە تيىمدىرەك بولا تۇسەدى. قابىلداناتىن وزگەرىستەر ءوزىنىڭ ءمانى جونىنەن جۇيەلى, ولار كەڭ قوعامدىق رەزونانس تۋعىزىپ, قولداۋعا يە بولدى.
جۇمىس توبىنىڭ مۇشەلەرىنە, پارلامەنت دەپۋتاتتارى مەن بارشا قازاقستاندىقتارعا كونستيتۋتسيالىق رەفورمالاردى جۇزەگە اسىرۋداعى قولداۋى مەن باعا جەتكىزگىسىز ۇلەستەرى ءۇشىن شىن كوڭىلدەن شىققان ريزاشىلىعىم مەن قۇرمەتىمدى بىلدىرەمىن. مەن سونداي-اق, وتان يگىلىگى جولىنداعى ەڭبەگىمدى حالىق قالاۋلىلارىنىڭ كونستيتۋتسياعا ەرەكشە تۇزەتۋمەن اتاپ ءوتۋدى ۇسىنعانىن وڭ باعالايمىن. بۇل حالقىمىزدىڭ مۇددەسى ءۇشىن رەفورمالاردى ءارى قاراي جۇرگىزۋگە ىنتالاندىرىپ, سەنىمدىلىك پەن كۇش-قۋات بەرەدى.
جولداۋدا ايتىلعانىنداي, بۇگىنگى كۇنگى جەدەل تەحنولوگيالىق رەۆوليۋتسيا جاھاندىق ەكونوميكادا جاڭا شىنايى ءومىر قالىپتاستىرىپ وتىر. جاڭارتىلعان كونستيتۋتسيا – بۇل ۋاقىت سىن-تەگەۋرىنىنە ءبىزدىڭ جاۋابىمىز. ستراتەگيالىق ماقسات – الەمدەگى اسا دامىعان 30 ەلدىڭ قاتارىنا ەنۋگە قول جەتكىزۋ ءۇشىن قازاقستاننىڭ بارلىق ازاماتتارىنا وزدەرىنىڭ كۇش-جىگەرلەرىن بىرىكتىرۋ ماڭىزدى.
ءبارىمىز بىرگە ءححى عاسىردا ەلىمىزدىڭ تابىستى دامۋىن, حالقىمىزدىڭ ءوسىپ-وركەندەۋىن قامتاماسىز ەتە الاتىنىمىزعا سەنىمدىمىن. رەفورمانىڭ نەگىزگى ماقساتى دا وسى – بىرلىگىمىزدى, دوستىعىمىزدى, ءوزارا ءتۇسىنىستىگىمىزدى, ازاماتتاردىڭ ەتنوستىق, تىلدىك جانە كونفەسسيالىق قاعيداتتار بويىنشا تەڭدىگىن ساقتاۋ. وسى توپتاسقاندىعىمىزدىڭ ارقاسىندا ءبىز تالاي مارتە جەڭىستەرگە جەتتىك. وسى پوستۋلاتتارعا سۇيەنە وتىرىپ, ءبىز جاڭا جەڭىستەرگە جەتەتىن بولامىز.
بارلىق قازاقستاندىقتاردى ءبىزدىڭ ەگەمەندى ساياسي تاريحىمىزدا جاڭا كەزەڭ اشاتىن نەگىزگى زاڭعا وزگەرىستەر قابىلدانۋىمەن قۇتتىقتايمىن.
سۋرەت پرەزيدەنتتىڭ ءباسپاسوز قىزمەتىنەن الىندى