وتاندىق كاسىپقوي بوكسشى گەننادي گولوۆكين مەن قازاقستان تۋى WBC بەلبەۋىنە بەينەلەنەدى. مۇنداي وزگەرىستەر گەننادي گولوۆكيننىڭ الەمدىك سپورت قاۋىمداستىعىنداعى ورنى مەن وعان دەگەن سىي-قۇرمەتتىڭ بەلگىسى بولىپ تابىلادى, دەپ حابارلايدى قازاقپارات
بۇكىلالەمدىك بوكس كەڭەسىنىڭ (WBC) جاسىل-التىن تۇستەس بەلدىگى سوڭعى 37 جىلدا بىرقاتار وزگەرىسكە ۇشىرادى. سوڭعىسى – وعان قازاقستاننىڭ كوك تۋىنىڭ ەنۋى.
WBC بەلبەۋىندە بوكس تاريحىنداعى ەڭ ۇزدىك ءارى ەڭ مىقتىلار بەينەلەنىپ كەلەدى. ولاردىڭ قاتارىندا مۇحاممەد الي, مايك تايسون, لەننوكس ليۋيس, رەي لەونارد, روبەرتو ديۋران, حۋليو سەزار چاۆەس, لارري حولمس, ۆيتالي كليچكو, مارۆين حاگلەر, توممي حەرنس, وسكار دە لا حويا جانە فلويد مەيۆەزەر بار.
ەندىگى كەزەكتە, ءوز حالقىنىڭ ابىرويىن اسقاقتاتقان گەننادي گولوۆكينگە قۇرمەت رەتىندە ەلىمىزدىڭ جالاۋىمەن بىرگە ونىڭ بەينەسى الەم مىقتىلارىنىڭ بەلبەۋىندە كورىنىس تاباتىن بولادى.
ەسكە سالا كەتەيىك, 18 ناۋرىز كۇنى گەننادي گولوۆكين ءوز تيتۋلىن قورعاۋ ءۇشىن امەريكالىق دەنيەل دجەيكوبسپەن جۇدىرىقتاسادى. ايقاس نيۋ-يوركتىڭ مەديسون سكۆەر گاردەن ارەناسىندا وتەدى. جەكپە-جەك قازاقستاندىق تەلەارنالاردان 19 ناۋرىز كۇنى تاڭەرتەڭگى ساعات 08.00-دە تىكەلەي ەفيردەن كورسەتىلەدى.