قىتايلىق انشىلەر تاماعى اۋىرىپ قالعان ديماش قۇدايبەرگەنگە قولداۋ كورسەتتى, دەپ حابارلايدى قازاقپارات
«Singer 2017» بايقاۋىنىڭ سەگىزىنشى كەزەڭى كەشە ەفيردەن كورسەتىلگەن بولاتىن. وتانداسىمىز تاماعىنىڭ اۋىرعانىنا قاراستان ءساتتى ونەر كورسەتىپ, قىتاي تىلىندەگى «تاڭ اتتى» انىمەن بەسىنشى ورىندى يەلەندى. ايتا كەتەرلىگى, تۇماۋراتىپ تاماعى اۋىرىپ قالعان ديماشقا جوعارى دەڭگەيدە ورىنداۋدى تالاپ ەتەتىن «تاڭ اتتى» ءانىن ورىنداۋ وڭايعا سوقپاعان. جارىس جولىنان شىعىپ قالماۋ ءۇشىن ديماش تاماعىنا ەكى رەت اۋرۋدى باساتىن ءدارى ەگىپ ساحناعا شىققان.
ديماشتىڭ اۋىرعانىن ەستىگەن «تاڭ اتتى» ءانىنىڭ اۆتورى, قىتايدىڭ تانىمال ءانشىسى ءارى «Singer» بايقاۋى ءۇشىنشى ماۋسىمىنىڭ جەڭىمپازى حان حۋن ديماشقا حابارلاسىپ ءوز كەڭەستەرىن ايتقان. ال جەتىنشى كەزەڭدە قاتارعا قوسىلعان قىتاي ەستراداسىنىڭ جۇلدىزى لي تسزيان ديماشقا باعالى ءدارى شوپتەن جاسالعان جوتەلگە جانە تاماقتىڭ اۋىرۋىنا قارسى ءدارىنى اكەلىپ بەرىپ, قولداۋ كورسەتتى. بارلىق قاتىسۋشىلار ديماشتىڭ تەز جازىلىپ كەتۋىنە تىلەكتەستىك ءبىلدىرىپ, قولداۋلارىن بىلدىرگەن. ديماش ءوز كەزەگىندە بارلىعىنا العىس ايتىپ, وسى قولداۋدىڭ ارقاسىندا قيىندىقتاردى جەڭگەنىن جەتكىزدى.
ەسكە سالا كەتەيىك, ديماش جەتىنشى كەزەڭدە «دايديداۋ» انىمەن ءۇشىنشى, سەگىزىنشى كەزەڭدە قىتايشا «تاڭ اتتى» انىمەن بەسىنشى ورىندى يەلەنىپ, ءتورتىنشى اينالىمنىڭ قورتىندىسى بويىنشا بەسىنشى بولىپ كەلەسى كەزەڭگە وتكەن. توعىزىنشى كەزەڭدە وتانداسىمىز «All by Myself» ءانىن شىرقاپ ەكىنشى ورىننان كورىندى.