قوستاناي وبلىسىنىڭ تۇرعىنى كولىك ۇرلاپ, ونىمەن تاكسي قىزمەتىن كورسەتىپ كەلگەن, دەپ حابارلايدى baq.kz
قوستاناي وبلىسىنا قاراستى قوستاناي اۋدانىنداعى زاتوبول اۋىلىنىڭ تۇرعىنى كولىك ۇرلاعانى ءۇشىن بۇرىن دا سوتتالعان بولىپ شىقتى. ناۋرىزدىڭ 7-نەن 8-نە قاراعان ءتۇنى ارنايى جاساق وكىلدەرى مەن جول پوليتسياسى قىزمەتكەرلەرى كولىك ۇرلاعان ازاماتتى قولعا ءتۇسىردى. كۇدىكتى كولىكتى قولدى قىلعانىمەن قويماي, ونىمەن ءبىرشاما ناپاقا تابۋدى دا ءجون ساناپ, وبلىس ايماعىندا تاكسي قىزمەتىن كورسەتىپ جۇرگەن ەكەن.
«كولىك ۇرالانعانى تۋرالى حاباردى ەستىگەن سوڭ تۇنگى ساعات 02:00 شاماسىندا جەرگىلىكتى ءدامحانالاردىڭ ءبىرىنىڭ جانىنان ۇرلانعان كولىككە ۇقساس ءاۆتوموبيلدى كوردىك. كولىكتى توقتاتقانىمىزدا ونى جۇرگىزىپ كەلە جاتقان ازامات زاتوبول قالاسىندا تۇراتىنىن, تاكسي جۇرگىزۋشىسى ەكەنىن جانە قالا سىرتىنا قاراي كەتىپ بارا جاتقاندىعىن ايتتى. ول بۇرىن دا كولىك ۇرلاعانى ءۇشىن بىرنەشە مارتە سوتتالعان بولىپ شىقتى», – دەپ اتاپ ءوتتى قوستاناي وبلىستىق ءىىد ارنايى جاساعىنىڭ اعا لەيتەنانتى الەكساندر پوپوۆ.
ۇستالعان ازامات ءوزىنىڭ جاساعان زاڭسىز ارەكەتتەرىن الدىمەن مويىنداماي قويعان. پوليتسيا قىزمەتكەرلەرى ونى «ارمان» ستاتسيونارلىق بەكەتىنە الىپ كەلىپ, ءىستىڭ ءمان-جايىن انىقتاۋ ءۇشىن جەدەل-ىزدەستىرۋ توبىن شاقىرعان.
ايتا كەتەيىك, جىل باسىنان بەرى قوستاناي وبلىسىندا 22 كولىك ۇرلىعى اشىلعان.