الماتىدا 18 جاستاعى ستۋدەنت قىز بوسانعان نارەستەسىن قوقىس جاشىگىنە تاستاپ كەتكەن. تاستاندى ءسابيدى تاڭعى ۋاقىتتا قالاداعى جوعارى وقۋ ورىندارىنىڭ ءبىرىنىڭ جاتاقحاناسى ماڭىنان ءوتىپ بارا جاتقان ادام كورىپ قالعان, دەپ حابارلايدى tengrinews.kz
باسىلىمنىڭ مالىمەتىنشە, ءسابي شامامەن تاڭعى ساعات التىدا بايتۇرسىنوۆ كوشەسىندە تولە بي مەن قاراساي باتىر كوشەلەرىنىڭ اراسىنان تابىلعان. ءوتىپ بارا جاتقان ادام پوليتسەيلەر مەن جەدەل جاردەمدى شاقىرعان. دارىگەرلەر جاڭا تۋعان ءسابيدى اۋرۋحاناعا جەتكىزگەن.
بىرنەشە ساعاتتان كەيىن پوليتسيا قىزمەتكەرلەرى ءسابيدىڭ اناسىن جاقىن ماڭداعى جاتاقحانادان تاپتى. ول قىزىلوردا وبلىسىنىڭ تۋماسى بولىپ شىقتى, الماتىداعى جوو-لاردىڭ بىرىندە 2-كۋرستا وقيدى ەكەن. قىز اۋىر جاعدايدا بولعاندىقتان, وعان مەديتسينالىق كومەك قاجەت بولعان. سودان ول جاقىن ماڭداعى قالالىق اۋرۋحانانىڭ جانساقتاۋ بولىمىنە جەتكىزىلگەن. الدىن الا بولجام بويىنشا, ول ءسابيدى جاتاقحانا بولمەسىندە ءوزى بوسانعان.
الماتى قالالىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمەتىنشە, دارىگەرلەر ءسابيدى امان الىپ قالۋ ءۇشىن بارىن سالعان. الايدا, وكىنىشكە قاراي, ءسابيدىڭ ءومىرىن امان الىپ قالۋ مۇمكىن بولماعان. جاڭا تۋعان ءسابي قاتتى السىرەپ, اۋرۋحاناعا جەتكىزىلگەن سوڭ كوز جۇمعان. تەرگەۋ امالدارى جۇرگىزىلىپ جاتىر.