ينۆەستيتسيالار جانە دامۋ ۆيتسە-ءمينيسترى ر.سكلياردىڭ توراعالىعىمەن ەلىمىزدەگى جەتەكشى اۋە تاسىمالداۋشىلاردىڭ قاتىسۋىمەن ۇشۋلاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا جەدەل كەڭەس ءوتتى, دەپ حابارلايدى مينيسترلىكتىڭ ءباسپاسوز قىزمەتى.
كەڭەس كەيىنگى ۋاقىتتا قازاقستاندىق اۋە كومپانيالاردىڭ ۇشاقتارىنداعى اقاۋلاردىڭ جيىلەپ كەتۋىنە بايلانىستى وتكىزىلدى.
شاراعا «Air Astana», «Bek Air» جانە «Qazaq Air» كومپانيالارىنىڭ وكىلدەرى شاقىرىلدى. جيىن قورىتىندىسى بويىنشا ازاماتتىق اۆياتسيا كوميتەتى توراعاسىنىڭ ورىنباسارى تالعات لاستاەۆ كەلەڭسىز وقيعالاردىڭ قايتالانۋىنا جول بەرمەۋ ءۇشىن مينيسترلىك جۇرگىزىپ جاتقان جۇمىستارعا قاتىستى تۇسىنىك بەردى.
«ۇشاق قوزعالتقىشىنىڭ توقتاپ قالۋىنان جانە ناۆيگاتسيالىق قۇرال-جابدىقتارداعى اقاۋدان تۋىنداعان وقيعانىڭ سەبەپتەرىنە قاتىستى, سونداي-اق قازىرگى ۋاقىتتا اۋە كومپانيا قابىلداعان شارالار تۋرالى جان-جاقتى ەسەپ تىڭدالدى. وسىعان بايلانىستى جۇمىستاردى كۇشەيتۋ جانە كەلەشەكتە مۇنداي كەلەڭسىز وقيعالارعا جول بەرمەۋ تۋرالى ءتيىستى تاپسىرما بەرىلدى. قازىرگى ۋاقىتتا ءتيىستى بۇيرىق شىقتى. كولىكتەگى وقيعالاردى تەكسەرۋ جونىندەگى دەپارتامەنت وسى ءۇش وقيعانى مۇقيات تەكسەرۋدە. تەكسەرۋگە قاتىستى مالىمەتتەر دايىن بولعان كەزدە حابارلايمىز» – دەپ اتاپ ءوتتى ت.لاستاەۆ.
ونىڭ ايتۋىنشا, وقيعانىڭ سەبەپتەرىن كومپانيانىڭ ءوزى دە, سونداي-اق, مينيسترلىكتىڭ كولىك وقيعالارىن تەكسەرۋ جونىندەگى دەپارتامەنتى دە جان-جاقتى تەكسەرىپ جاتىر. بارلىق جاعدايلار تىركەلگەن. سونىمەن قاتار, بارلىق كومپانيالاردا ۇشۋلاردىڭ قاۋىپسىزدىگىن باسقارۋ جونىندەگى جۇيە ەنگىزىلدى.