ەندى قىتايدان وندىرىستىك قۇرال-سايماندار ساتىپ الاتىن كاسىپكەرلەر ونلاين تۇردە تاپسىرىس بەرىپ, بانك كارتاسى ارقىلى تولەم جاساي الادى.
بۇگىن الماتىدا وتكەن ءباسپاسوز كونفەرەنتسياسىندا قازكوممەرتسبانك (Qazkom), حالىقارالىق UnionPay International (قحر) تولەم جۇيەسى مەن سينتسزياندىق Yazhong (Cemarket, قحر) كومپانياسى ەلەكتروندىق cemarket.kz ساۋدا الاڭى مەن جەكە كاسىپكەرلەرگە ارنالعان Cemarket كوبرەندينگتىك كارتاسىن تانىستىردى, دەپ جازادى 7kun.kz.
قازكوم ۇسىنىپ وتىرعان كوبرەندينگتىك كارتادا زاڭدى تۇلعالارعا تۇرلى جەڭىلدىكتەر قاراستىرىلعان. بارلىق قاجەتتى قۇرالداردى cemarket.kz سايتىندا ونلاين تولتىرۋعا بولادى. ودان بولەك ءاربىر ساتىپ الىنعان تاۋار ءۇشىن بونۋستار قوسىلادى.
Cemarket كوبرەندينگتىك كارتا قازاقستاندىق كاسىپكەرلەر ساتىپ العان تاۋارلاردىڭ قۇنىن تەڭگەمەن تولەۋگە مۇمكىندىك بەرەدى. ال تولەم قىتايلىق جەتكىزۋشى كومپانيالارعا بىردەن يۋانمەن تۇسەدى. بۇل جەردە ۆاليۋتا كونۆەرتاتسياسى اقش دوللارى ارقىلى ەمەس, بىردەن تەڭگەدەن يۋانعا اۋىسادى.
Qazkom-نىڭ باسقارۋشى ديرەكتورى نۇرلان جاعىپاروۆ سوڭعى كەزدەرى قىتايدان ەلىمىزگە تاسىمالداناتىن وندىرىستىك-قۇرال سايمانداردىڭ يپمورت كولەمى ارتقانىن ايتتى.
«بىراق سوعان قاراماستان, ترانسشەكارالىق ساۋدانىڭ ءوسۋىن تەجەيتىن بىرقاتار ماسەلەلەر ءالى دە ءوز شەشىمىن تاپقان جوق. ولاردىڭ ىشىندە ۆاليۋتالىق كەلىسىمشارتتاردى تولتىرۋ جانە تەڭگەنى يۋانعا اقش دوللار ارقىلى اۋىستىرۋداعى شىعىنداردى ايتۋعا بولادى. بىزدىڭ قىتايلىق UPI جانە Yazhong سەرىكتەستەرمەن بىرىگىپ ءىس-جۇزىنە قوسقان جوبامىز يمپورتتىق كەلىسىمشارتتارعا بايلانىستى نەگىزگى ماسەلەلەردى شەشەدى», — دەدى.
Cemarket كارتاسىن ءۇش ءتۇرلى ۆاليۋتادا: يۋانمەن, تەڭگەمەن, دوللارمەن 5 جىلدىق مەرزىمگە اشۋعا بولادى. بانكتىڭ قىزمەت كورسەتۋ قۇنى ءبىرىنشى جىلى 990 تەڭگە, ودان كەيىنگى جىلدارى 800 تەڭگە بولادى.
قىتايلىق Cemarket ەلەكتروندىق ساۋدا الاڭى 2016 جىلى قۇرىلعان. بۇگىنگى كۇنى ول ءتۇرلى قۇرال-سايمانداردى (وندىرىستىك, تاۋ-كەن شاحتا, قايتا ءوندىرۋشى, قۇرىلىس, قويما, اۋىلشارۋشىلىق جانە تابيعات قورعاۋ) شىعارۋشى جانە ساتۋشى كومپانيالاردى بىرىكتىرەتىن سايت, ءارى ءتۇرلى ەلەكترومەحانيكالىق, قۇرىلىس قۇرالدارى مەن جابدىقتاردىڭ ينتەرنەت-پلاتفورماسى.