تەلەۆيزيالىق ونەر سالاسىندا جوعارى جەتىستىكتەرى ءۇشىن بەرىلەتىن «تۇمار» ءبىرىنشى ۇلتتىق تەلەۆيزيالىق بايگەسىنە 214 جۇمىس كەلىپ ءتۇستى. بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ فەيسبۋكتەگى ءوزىنىڭ پاراقشاسىندا جازدى.
«قىمباتتى دوستار, 7 ناۋرىزدا «تۇمار» تەلەۆيزيالىق سىيلىعى ءۇشىن وتىنىشتەر قابىلداۋ اياقتالدى. بۇعان دەيىن ايتىلعانداي, بۇل جوبانىڭ ماقساتى - جۋرناليستەر قاۋىمىن شىعارماشىلىق ىزدەنىسكە ىنتالاندىرىپ, وسى سالانىڭ دامۋىنا سەرپىن بەرۋ. سونىمەن, 12 اتالىم بويىنشا ەلىمىزدىڭ تۇكپىر-تۇكپىرىنەن بارلىعى 214 جۇمىس كەلىپ ءتۇستى. الداعى ۋاقىتتا بۇل جۇمىستار اقپارات سالاسىنداعى تانىمال تۇلعالاردان قۇرالعان قازىلار القاسىنىڭ ىرىكتەۋىنەن وتەدى», - دەپ جازدى مينيستر.
داۋرەن اباەۆتىڭ ايتۋىنشا, «تۇمار» تەلەۆيزيالىق سىيلىعى ءۇشىن ماراپاتتاۋ ءراسىمى 17 ناۋرىزعا بەلگىلەنىپ وتىر.
ەستەرىڭىزگە سالا كەتسەك, تەلەۆيزيالىق ونەر سالاسىندا جوعارى جەتىستىكتەرى ءۇشىن بەرىلەتىن «تۇمار» ۇلتتىق تەلەۆيزيالىق جۇلدە تەلەكومپانيالار قىزمەتكەرلەرىنىڭ, شىعارماشىلىق ۇجىمداردىڭ, پروديۋسەرلىك ورتالىقتاردىڭ شىعارماشىلىق الەۋەتىن جۇزەگە اسىرۋعا, قازاقستاننىڭ كوپۇلتتى حالقىنىڭ سالتتارىن ساقتاۋ جانە بىرلىگىن قالىپتاستىرۋعا باعىتتالعان.