وڭتۇستىك كورەيانىڭ كونستيتۋتسيالىق كەڭەسى پرەزيدەنت پاك كىن حەنىڭ يمپيچمەنتىن بەكىتتى, - دەپ حابارلايدى ۆۆس.
ەل پارلامەنتى سىبايلاس جەمقورلىق دەرەكتەرىنىڭ شىعۋىنا بايلانىستى وتكەن جىلدىڭ 9 جەلتوقسانىندا يمپيچمەنت جاريالاعان بولاتىن. كونستيتۋتسيالىق كەڭەستىڭ شەشىمى جۇمادا YTN وڭتۇستىككورەيالىق تەلەارناسىنىڭ تىكەلەي ەفيرىندە جاريالاندى. كەڭەستىڭ سەگىز سۋدياسى پارلامەنت شەشىمىن ماقۇلداۋعا داۋىس بەردى. ەندى پاك كىن حە مەملەكەت باسقارۋدان تۇبەگەيلى شەتتەتىلەدى, ال 60 كۇن ىشىندە مەرزىمىنەن بۇرىن پرەزيدەنت سايلاۋى وتەدى.
يمپيچمەنت جاريالانباسا, پرەزيدەنتتىڭ وكىلەتتىگى 2018 جىلدىڭ اقپانىندا اياقتالار ەدى, ال سايلاۋ بيىل 20 جەلتوقساندا وتەر ەدى. پرەزيدەنتتى بيلىكتەن كەتىرۋگە پاك كىن حە مەن ونىڭ بۇرىنعى تانىسى تسوي سۋن ءسيلدىڭ اينالاسىنداعى جەمقورلىق داۋى سەبەپ بولعان.