اقتوبە وبلىسىندا 600 ملن تەكشە مەتردەن استام سۋدى قابىلداۋعا مۇمكىندىگى بولاتىن 10 سۋ قويماسى سالىنباق, دەپ حابارلادى وبلىس اكىمدىگىنىڭ ءباسپاسوز قىزمەتى.
وڭىردە سۋارمالى جەرلەر الاڭىن كەڭەيتۋ ءۇشىن سۋ قويمالارىن قايتا قۇرۋ جۇمىستارى جالعاسۋدا
ەسكە سالا كەتەيىك, 2016 جىلى بەردىبەك ساپارباەۆتىڭ باستاماسىمەن سۋارمالى جەرلەر الاڭىن كەڭەيتىپ, اقتوبە قالاسىنداعى جاسىل جەلەكتەردى سۋ رەسۋرستارىن وڭتايلى پايدالانا وتىرا ۇنەمى سۋارۋعا مۇمكىندىك بەرەتىن جوبانى جۇزەگە اسىرۋ باستالعان بولاتىن. اقتوبە وبلىسىنىڭ اكىمى بەردىبەك ساپارباەۆ سازدى سۋ قويماسىنىڭ قايتا قۇرۋ بارىسىن قاراپ شىقتى. «قازسۋشار» رمك اقتوبەدەگى بولىمشەسىنىڭ باسشىسى بەكزات نامەتوۆ قازىرگى تاڭدا 49 جىل پايدالانىنىلىپ, توزىعى جەتكەن سۋ قۇرىلىسىنىڭ كەيبىر بولىگىنىڭ قايتا جاساقتالاتىنىن ايتتى. جۇرگىزىلگەن جۇمىستاردىڭ ناتيجەسىندە سۋ قويماسىنىڭ سىيىمدىلىعى قازىرگى 6 ملن تەكشەمەتردەن 7,5 ملن. تەكشە مەترگە دەيىن, ال سۋ قويماسىنىڭ سۋارۋشى مۇمكىندىگى 400 گەكتاردان, 1 000 گەكتارعا دەيىن ارتپاق. ارتىق سۋ سازدى وزەنىنە قۇيىلىپ, اقتوبە قالاسىنداعى جاسىل جەلەكتەردى, گۇلزارلاردى اۋىزسۋدى شىعىنداماي-اق ۇنەمى سۋارىپ وتىرۋ ماسەلەسى شەشىلەدى. سۋ قويماسىن ۇيىندىلەر مەن شوگىندىلەردەن تازارتۋ, سۋ ەسەپتەگىش قۇرالدارىن قوندىرۋ, توعانداردى, كۇزەت بەكەتتەرى مەن بەينەباقىلاۋلاردى سىرتقى جارىقتاندىرۋ جانە ىشكى ەلەكترمەن جابدىقتاۋ شارالارى جالعاسۋدا. اعىمداعى جىلى توعانداردىڭ جوتالارىنا دابىل باعاندارىن ورناتا وتىرىپ, اسفالتتاۋ جانە ت.ب. جوسپاردا بار. قايتا قۇرۋعا بولىنگەن 131, 8 ملن. تەڭگەنىڭ 118,3 ملن تەڭگەسى قۇرىلىس-مونتاجداۋ جۇمىستارىناجۇمسالادى. 2016 جىلى 30 ملن تەڭگە يگەرىلسە, وسى جىلى قۇنى 88,1 ملن تەڭگە بولاتىن ءىس-شارالاردى جۇزەگە اسىرۋ جوسپارلانۋدا. - وڭىردەگى جۇمىس جاساپ تۇرعان سۋ قويمالارىنىڭ تەحنيكالىق جاعدايىن ءارى قاراي جاقسارتۋ شارالارىن قولعا الىپ, اوك سالاسىنداعى 2017-2021 جىلدارعا ارنالعان مەملەكەتتىك باعدارلاماسى اياسىندا سالىناتىن 10 جاڭا سۋ قويماسىنىڭ قۇرىلىسىنىڭ ماسەلەسىن تەزىرەك شەشۋ قاجەت. بۇل سۋارمالى جەرلەر الاڭىن, سۋ قورىن كەڭەيتۋگە مۇمكىندىك بەرەدى,-دەپ بەردىبەك ساپارباەۆ جاۋاپتى جەرگىلىكتى اتقارۋشى ورگاندارعا تاپسىرما بەردى. بەلگىلى بولعانداي, ءبىرىنشى كەزەڭدە سۋارمالى جەرلەر الاڭى 18700 گەكتاردان 40 مىڭعا دەيىن, ەكىنشى كەزەڭدە الاڭ 70000-80000 گەكتارعا دەيىن ارتپاق. سونىمەن قاتار, 10 جاڭا سۋ قويماسى 600 ملن تەكشە مەتر قاردى قابىلداي الاتىن بولادى. ايماق باسشىسىنىڭ باستاماسىمەن اقتوبەدە سونىمەن بىرگە سازدى وزەنىن اقتوبە سۋ قويماسىمەن جالعايتىن 11 شاقىرىمدىق سۋ بۇرعىشتىڭ قۇرىلىسى بويىنشا جۇمىستار جالعاسۋدا. سۋ بۇرعىش ارقىلى ارتىق سۋ وزەنگە قۇيىلىپ, قوسىمشا سۋ تاراتقىشتى ورناتۋ ارقىلى وبلىس ورتالىعىنداعى جاسىل جەلەكتەردى كۇتىپ-باپتاۋ ءۇشىن پايدالانىلماق. اقتوبە قالاسىنىڭ اكىمدىگى جۇمىس جوباسىن جاساۋدا. اقتوبە قالاسىنداعى جالىق اۋماقتى كەڭەيتۋ مەن جونەلتۋدىڭ باعدارلى قۇنى 2,5 ملرد تەڭگەنى قۇرايتىن بولادى. قارجىلاندىرۋ كوزى – ەۋروپالىق قايتا قۇرۋ جانە دامۋ بانكى. سونىمەن قاتار, ءوڭىر باسشىسى قاردى توقتاتۋ جۇمىستارىن كۇشەيتۋدى تاپسىردى.