كەشە ءماجىلىس توراعاسى نۇرلان نىعماتۋلين باستاعان پالاتا دەپۋتاتتارى «استانا ەكسپو-2017» كورمەسىنىڭ اۋماعىن ارالادى. ولار كورمە نىساندارى جۇمىسىمەن تانىسىپ, حالىقارالىق شارانى ۇيىمداستىرۋعا ارنالعان جيىنعا قاتىستى.
جينالىس بارىسىندا وراسان زور جۇمىستار اتقارىلعانىن العا تارتقان ءماجىلىس توراعاسى تۋرا ءۇش ايدان كەيىن ەلوردامىز «جاسىل ەنەرگەتيكا» سالاسىندا الەمدىك ۇزدىك ازىرلەمەلەردى پاش ەتەتىن ورتالىققا اينالاتىنىن اتاپ ءوتتى. «قازاقستان پرەزيدەنتى نۇرسۇلتان ءابىش ۇلى نازارباەۆتىڭ حالىقارالىق جوعارى بەدەلىنىڭ ارقاسىندا ءبىزدىڭ ەلىمىز وسى عاجايىپ ءارى بىرەگەي شارانى وتكىزۋگە ءمۇمكىندىك الدى», – دەدى ن.نىعماتۋلين.
ونىڭ پىكىرىنشە, اۋقىمدى شارانى ۇيىمداستىرۋدا بەلگىلى ءبىر دەڭگەيدە دەپۋتاتتىق كورپۋستىڭ دا ءوز ۇلەسى بار. ماسەلەن, پارلامەنتتە حالىقارالىق كورمەلەر تۋرالى كونۆەنتسيا راتيفيكاتسيالاندى, ەكسپو-2017 حالىقارالىق مامانداندىرىلعان كورمەسى ماسەلەلەرى جونىندە ارنايى زاڭ قابىلداندى.
ايتا كەتەيىك, «بولاشاقتىڭ ەنەرگياسى» دەپ اتالاتىن ۇلتتىق جوبانىڭ باستى ماقساتى قوعام نازارىن ەلەكتر قۋاتىن ورىندى جۇمساۋ ماسەلەسىنە اۋدارا وتىرىپ, ەنەرگيا قۋاتىن تاۋسىلمايتىن يننوۆاتسيالىق ەنەرگيا قۋاتىمەن الماستىرۋ بولىپ تابىلادى.
القالى كەڭەسكە «استانا ەكسپو-2017» ۇلتتىق كومپانياسى باسقارماسىنىڭ توراعاسى احمەتجان ەسىموۆ پەن باسقا دا جاۋاپتى دەپارتامەنتتەردىڭ باسشىلارى قاتىسىپ, دەپۋتاتتار نازارىنا كورمە جۇمىسى جايىندا تولىققاندى مالىمەتتەر ۇسىندى. سونىمەن قاتار, الداعى جوسپارلار جايىندا دا تىڭعىلىقتى باياندادى. ال كورمە جۇمىسىمەن جاقىننان تانىسۋ كەزىندە ءماجىلىس دەپۋتاتتارى قازاقستاننىڭ ۇلتتىق سفەرا-پاۆيلونى مەن حالىقارالىق دەڭگەيدەگى پاۆيلوندارعا, كونگرەسس-ورتالىققا, بىرىڭعاي قىزمەت كورسەتۋ ورتالىعىنا, ەكسپو-قالاشىق سىندى نىساندارعا ايرىقشا نازار اۋداردى.
ەستەرىڭىزگە سالا كەتەيىك, ۇلتتىق پاۆيلوننىڭ قۇرىلىسى 2017 جىلدىڭ مامىر ايىندا تولىقتاي اياقتالادى دەپ جوسپارلانۋدا. سوندىقتان دا بۇل نىساندا ىشكى قۇرىلىس جۇمىستارى قىزۋ جۇرگىزىلۋ ۇستىندە.
شارا اياسىندا دەپۋتاتتار ەكسپو-2017 حالىقارالىق مامانداندىرىلعان كورمەسىنە بيلەتتەر ساتىپ الدى.
نۇرلىبەك دوسىباي,
«ەگەمەن قازاقستان»