ۋەفا-نىڭ جىل سايىن وتكىزەتىن كلۋبتار اراسىنداعى 1/8 فينالىنداعى قارىمتا كەزدەسۋلەر الەم چەمپيوناتىنان كەم تۇسپەيدى.
قاتاردىڭ ناسسەر گانيم ءال-حەلايفي ەسىمدى بيزنەسمەنى ساتىپ العان پسج كلۋبى وسىدان ءۇش اپتا بۇرىن ءوز الاڭىندا اتاقتى «بارسەلونانى» 4:0 ەسەبىمەن ويسىراتا ۇتقان ەدى. پاريج كومانداسى كاتولونيالىقتاردى جارىستان ەرتە شىعارىپ تاستايتىن بولدى عوي دەپ ءبىراز تاڭداي قاققانبىز.
بۇل جەڭىلىس «بارسەلونانىڭ» باس باپكەرىنە قاتتى باتقان سەكىلدى. ماۋسىم اياقتالعان سوڭ, كەلىسىمشارتتى سوزبايتىنىن, كوماندادان كەتەتىنىن مالىمدەپ ۇلگەرگەن بولاتىن لۋيس ەنريكە ساباز...
ارينە, چەمپيوندار ليگاسىنىڭ پلەي-وفف باسەكەسىندە ءبىرىنشى ويىندا 0:4 ەسەبىمەن ۇتىلعان كوماندالاردىڭ ەشقايسىسى كەلەسى كەزەڭگە شىعا الماعان. بىراق كوپتەگەن ساراپشىلار مۇنداي كامبەكتى الەمدە جاساي الاتىن جالعىز كوماندا بولسا – ول «بارسەلونا» دەگەن. مەسسي باستاعان جىگىتتەر سول تاڭعاجايىپتى ءىس ءجۇزىندە دالەلدەي الدى.
بۇل كەزدەسۋدە الاڭ يەلەرىنىڭ ويىنىن وربىتكەن, تاريحي جەڭىسىنە باستى سەبەپكەر ادەتتەگىدەي مەسسي ەمەس, برازيليالىق نەيمار بولدى. اتتەڭ, پەلەنىڭ ءىزباسارى سانالاتىن فۋتبولشىعا تۇراقتىلىق جەتىسپەيدى. كەي ويىنداردا مۇلدەم الاڭدا بار-جوعىن بايقاماي قالاسىڭ. ايتپەسە, «التىن دوپ» الۋعا دا قاۋقارى بار جىگىت. دەگەنمەن, بۇل ماتچتا ول ءوزىنىڭ كارەراسىنداعى ەڭ ۇزدىك ويىندارىنىڭ ءبىرىن وتكىزدى.
«بارسەلونا» مەن پسج اراسىنداعى تارتىستىڭ «كامپ نوۋداعى» بولىمىندە 7 گول سوعىلدى. ونىڭ التاۋى «بارسەلونا» فۋتبولشىلارىنا تيەسىلى. ءتىپتى, كاۆاني گول سوققاندا دا «بارسەلونا» فۋتبولشىلارىنىڭ سالى سۋعا كەتپەدى, قايتا شيراي ءتۇستى. فۋتبولدا تورەشىنىڭ سوڭعى ىسقىرىعىنا دەيىن ويناۋ كەرەكتىگىنە تاعى كوزىمىز جەتكەندەي بولدى. جەڭىس دوبىنىڭ اۆتورى – سەرحيو روبەرتو 93-مينۋتتا مەرگەندىك تانىتتى.
پسج ءۇشىن ۇلكەن وكىنىش. كاۆاني, دي ماريا, دراسكلەر سەكىلدى جۇلدىزدارى بار كوماندا ەكى ماتچتا 5 دوپ سوقسا دا, باسىمدىقتى ۇستاپ قالا المادى. فۋتبول سونىسىمەن قىزىق, سونىسىمەن اسەرلى. ارينە, تورەشىنىڭ پسج قاقپاسىنا پەنالتي بەلگىلەۋى كۇماندى كورىنۋى مۇمكىن. بىراق, بۇل جاعداي «بارسەلونانىڭ» جەڭىسىنە كۇمان كەلتىرە قويماس دەپ ويلايمىز.
ال انگليانىڭ «ارسەنال» كلۋبىندا مىنەز جوق ەكەنىنە, ءتىپتى باپكەرى ۆەنگەردىڭ شاۋ تارتا باستاعانىنا ەتىمىز ابدەن ۇيرەنىپ كەتتى.
«زەڭبىرەكشىلەرگە» جەرەبە بۇل جولى دا جولداس بولمادى. كەزەكتى رەت «باۆارياعا» قارسىلاس اتانىپ كورىپ ەدى. ەكى ويىندا قاقپاسىنا 10 گول جىبەردى. ءوز الاڭىنداعى جەڭىلىسى تىپتەن ۇيات بولدى.
«ارسەنالدا» لوران كوسەلني دەگەن قورعاۋشى بار. وسى فرانتسۋز ويىنشىسىنا كوپ نارسە بايلانىستى. ءبىرىنشى ماتچتا 49-مينۋتتا جاراقات الىپ, الاڭنان ەرتە كەتىپ ەدى. «نەمىس ماشيناسى» قاتارىنان 4 گول سوققان ساباز. بۇل جولى ەكىنشى رەت سارى قاعاز الىپ, كومانداسىن تىپتەن قيىن جاعدايعا قالدىردى. ءسويتىپ, انچەلوتتي شاكىرتتەرى 5 دوپتى بىرىنەن سوڭ ءبىرىن توپىرلاتتى.
ايتا كەتۋ كەرەك, ماتچتا تورەشى اناستاسيوس سيديروپۋلوستىڭ جىبەرگەن قاتەلىكتەرى دە از ەمەس. بىراق «ارسەنالدىڭ» تىم شاراسىزدىعى جەڭىلىسكە سىلتاۋ بولا قويماس. ال «ارسەنال» باپكەرى ارسەن ۆەنگەردىڭ ازىرگە كوماندادان كەتە قوياتىن جوسپارى جوق سەكىلدى.
«باۆاريا» مەن «بارسەلونادان» بولەك, شيرەك فينالعا «رەال مادريد» پەن «بورۋسسيا د» كوماندالارى دا جولداما الدى.
دورتمۋندتىڭ «بورۋسسياسى» ءوز الاڭىندا «بەنفيكانى» ءىرى ەسەپپەن ۇتتى. بۇل ويىندا پەر-ەمەريك وبامەيانگ حەت-تريك جاسادى. ءبىر گولدى كريستيان پۋليشيچ سوقتى.
«رەال» قارىمتا ويىندا دا «ءناپوليدى» 3:1 ەسەبىمەن تىزە بۇكتىردى. «باسى التىن» قورعاۋشى سەرحيو راموس ەكى رەت ستاندارتتان قاقپا تورىن بۇلك ەتكىزگەن ەدى. بىراق, بىرەۋى قورعاۋشى دريس مەرتەنسكە ءتيىپ كەتىپ, اۆتوگول بولىپ جازىلدى.
ماتچ ناتيجەلەرى:
«ارسەنال» – «باۆاريا» – 1:5;
گولدار: تەو ۋولكوتت, 20 (1:0). روبەرت لەۆاندوۆسكي, 55 – پەنالتيدەن (1:1). ارەن روببەن, 68 (1:2). دۋگلاس كوستا, 78 (1:3). ارتۋرو ۆيدال, 80 (1:4). ارتۋرو ۆيدال, 85 (1:5).
«ناپولي» – «رەال» – 1:3;
گولدار: دريس مەرتەنس, 24 (1:0). سەرحيو راموس, 51 (1:1). دريس مەرتەنس, 57 – ءوز قاقپاسىنا (1:2). الۆارو موراتا, 90+1 (1:3).
«بارسەلونا» –پسج – 6:1;
گولدار: لۋيس سۋارەس, 3 (1:0). لەيۆين كيۋرزاۆا, 40 – ءوز قاقپاسىنا (2:0). ليونەل مەسسي, 50 – پەنالتيدەن (3:0). ەدينسون كاۆاني, 62 (3:1). نەيمار, 88 (4:1). نەيمار, 90+1 – پەنالتيدەن (5:1). سەرحي روبەرتو, 90+5 (6:1).
«بورۋسسيا د» – «بەنفيكا» – 4:0;
گولدار: پەر-ەمەريك وبامەيانگ, 4 (1:0). كريستيان پۋليشيچ, 59 (2:0). پەر-ەمەريك وبامەيانگ, 61 (3:0). پەر-ەمەريك وبامەيانگ, 85 (4:0).
بەك تولەۋوۆ,
جۋرناليست