ءسىز ويلاعانداي ەمەس, ارقاعا كوكتەم ەرتە كەلەدى. 8 ناۋرىز – حالىقارالىق ايەلدەر كۇنىنە وراي قاراعاندىنىڭ ءىرى جىلىجاي كەشەنىندە 240 مىڭ 750 قىزعالداق ءوسىرىلدى.
ءتىپتى, استانا مەن اقتاۋدىڭ جىگىتتەرى سۇلۋلارعا قاراعاندىلىق قىزعالداقتاردى تارتۋ ەتكەن بولار. گۇلدەردى قاراعاندىداعى «Green Technology» جشس جىلىجاي كەشەنىندە وسىرگەن.
«جەلتوقسان ايىندا ءبىز گوللانديادان اكەلىنگەن قىزعالداقتاردىڭ بادانالارىن وتىرعىزدىق. تىكەلەي جەتكىزىلىممەن كەلدى. بارلىعى – 12 سۇرىپ, سونىڭ ەكەۋى جاڭا», دەيدى «Green Technology» جشس-ءنىڭ باس اگرونومى گالينا كيزيلوۆا.
جىلىجايدان كەز كەلگەن تالعامعا ساي تۇستەر تابىلادى. قىزىل, سارى, جيەگى القىزىل اق ءتۇستى, كوكشىل, قىزعىلت دەيسىز بە, كوزدىڭ جاۋىن الادى. بۇل كۇندە جاڭاعى ەكى ءجۇز مىڭنان استام گۇلدەردىڭ بارلىعى ساتىلىپ كەتكەن.
بيىل كاسىپورىننىڭ جەتكىزۋ باعىتتارىنا باتىس ءوڭىرى قوسىلعان. ولاردىڭ ايتۋىنشا, بۇگىندە 50 مىڭنان اسا قىزعالداق اقتاۋعا, 20 مىڭى استاناعا جونەلتىلگەن. پاۆلوداردا دا كوتەرمە ساتىپ الۋشىلار بار.
نەگىزىنەن وسىرىلگەن قىزعالداقتاردىڭ جارتىسىنان استامى جەرگىلىكتى نارىقتا ساتىلاتىن كورىنەدى.
سونىمەن قاتار, جىلىجاي كەشەنى قيار وسىرۋگە ماماندانعان. ال گۇلدەر نەگىزىنەن – قوسالقى ءونىم. قىزعالداقتار كەسىلىپ الىنعان كوشەتكە ەندى قيار وتىرعىزىلماق. نازىك جاندىلار قاۋىمىنا تريۋمف-قىزعالداقتار, لالاتۇستەس قىزعالداقتار, شاشاقتى, جاسىل ءتۇستى, دارۆيندىك, گيبريد جانە وزگە دە قىزعالداق تۇرلەرى قۋانىش سىيلايتىن بولادى.
باس اگرونوم سونداي-اق, كەسىپ الىنعان قىزعالداقتاردىڭ ءومىرىن ۇزارتۋدىڭ قۇپياسىن دا اشا كەتتى. ەڭ ءبىرىنشى گۇلدى سۋعا سالماس بۇرىن مىندەتتى تۇردە ساباعىن قيعان دۇرىس. سۋ وتە سۋىق بولۋى ءتيىس, سوندا قىزعالداقتار ۇزاق ۋاقىت سولمايدى ەكەن. جانە گۇل تۇرعان قۇتىنى كۇن ساۋلەسىنەن الىس ۇستاعان ءجون جانە سۋعا قانت نەمەسە اسپيرين قوسۋعا بولادى. سۋىن تولتىرىپ تۇرسا, گۇل ءبىر اپتادان ارتىق ءوزىنىڭ تابيعي قالپىن ساقتاپ تۇرا بەرمەك.
ميراس اسان,
«ەگەمەن قازاقستان»
قاراعاندى