ەلباسى نۇرسۇلتان نازارباەۆتىڭ ەرلىگىنە بالاناتىن باس قالانىڭ الاتاۋ باۋرايىنان ارقاعا قونىس اۋدارۋى ەل تاۋەلسىزدىگىنىڭ ايعاعى ەكەنى تالاسسىز. ەركە ەسىل جاعاسىندا ەڭسە كوتەرگەن ەلوردامىز بۇگىندە بۇكىل دۇنيە جۇزىنە بەلگىلى. ەل ومىرىندەگى ەڭ ەلەۋلى وقيعالاردىڭ بارلىعى وسىندا وتەدى.
ال ەندى ەرەكشە ەكپىنمەن ءوسىپ-وركەندەگەن استانانىڭ مادەني-رۋحاني كەلبەتىن قالىپتاستىرۋعا الاشقا اتى ءماشھۇر قانشاما اياۋلى تۇلعالارىمىز اتسالىستى. ويتكەنى, كەز كەلگەن شاھاردىڭ اتاعىن الىس-جاقىنعا جاياتىن ونىڭ ساۋلەتتىك تۇرعىدان ءساندى عيماراتتارى عانا ەمەس. ول ەڭ اۋەلى اق نيەتتى ادامدارىمەن ادەمى. حالقىمىزدىڭ قايماعى سانالاتىن ساناتكەر زيالىلارىمەن قادىرلى.
كورەگەن ۇلت كوشباسشىسىنىڭ تىكەلەي شاقىرۋىمەن ماقتان تۇتىپ, ماڭدايعا باسار نەبىر مارعاسقالارىمىز مۇندا كوشىپ كەلگەنى ءمالىم. ولار تاۋەلسىز مەملەكەتىمىزدىڭ جاڭا ورداسىنىڭ قازىعىن قاعىسىپ, شاڭىراعىن كوتەرىسۋگە كوپ ۇلەس قوستى. سولايشا قازاقستاندى سونى سوقپاقپەن وركەنيەت ورىنە باستاعان تۇڭعىش پرەزيدەنتىمىزدىڭ يگى يدەيالارىنا قىزۋ قولداۋ ءبىلدىردى. وكىنىشكە قاراي, سول جاقسى-جايساڭدارىمىزدىڭ ءبىرازى ومىردەن ءوتىپ كەتتى.
پرەزيدەنت سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, بەلگىلى جۋرناليست جۇماگۇل ساۋحاتتىڭ قۇراستىرۋىمەن جۋىردا جارىق كورگەن «ساعىندىرعان اسىلدار» اتتى كىتاپ قازىر ارامىزدا جوق بولسا دا ەسىمدەرى ەلدىڭ ەسىنەن كەتپەس كاكىمبەك سالىقوۆ, ەركەعالي راحماديەۆ, ساكەن ءجۇنىسوۆ, ءازىربايجان مامبەتوۆ, ءابىش كەكىلباەۆ, فاريزا وڭعارسىنوۆا, رىمعالي نۇرعالي, دۇكەنباي دوسجان, اقسەلەۋ سەيدىمبەك, اشىربەك سىعاي, نۇرعوجا وراز سەكىلدى اياۋلى جانداردىڭ جارقىن بەينەلەرىن جادىمىزدا قايتا ءبىر جاڭعىرتۋعا ارنالعان. جىلى ەستەلىكتەرگە تولى جيناققا, سونداي-اق مارقۇمداردىڭ كوزدەرى تىرىسىندە جازعان مازمۇندى-ماعىنالى ماقالالارى, سىر-سۇحباتتارى, وي-تولعاۋلارى ەنىپتى.
اتالارىمىزدىڭ ايتۋىنشا, ارۋاق ايتقان سايىن اۋنايتىن كورىنەدى. ەندەشە, بۇل ەڭبەكتىڭ ءوز مىندەتىن مەيلىنشە وتەپ, وقىرماننىڭ رۋحاني ولجاسىنا اينالارىنا شەك كەلتىرمەيمىز.
تالعات باتىرحان,
«ەگەمەن قازاقستان»