قازاقستاندىق كاسىپقوي بوكسشى ءالي احمەدوۆ (5-0, 4KO) ۆارشاۆا قالاسىندا بريتانيالىق پاتريك مەنديگە (17-11-2,1KO) قارسى وتەتىن جەكپە-جەگىنە دايىندالىپ ءجۇر.
«العاشىندا ايقاسىم 11 ناۋرىز كۇنى لوندون قالاسىندا ءوتۋى ءتيىس ەدى. بىراق ۇيىمداستىرۋشىلار بۇل كەشتى ءساۋىر ايىنا اۋىستىرعاندىقتان, مەن دە جوسپارىمدى وزگەرتتىم. پولشا ەلىندە شارشى الاڭعا شىعاتىن مۇمكىندىگىم پايدا بولدى. گامبيا جەرىنەن شىققان بريتانيالىق پاتريك مەنديمەن جۇدىرىقتاساتىن بولدىم. ماعان قاراعاندا تاجىريبەسى الدەقايدا كوبىرەك بوكسشى. بىرنەشە تيتۋلدى جەكپە-جەك وتكىزگەن. الەمدەگى ۇزدىك ەلۋ بوكسشىنىڭ قاتارىنا كىرەدى», – دەدى احمەدوۆ.
«مەن ءبىراز ۋاقىتتان بەرى دايىندالىپ ءجۇرمىن. قازىر جاتتىعۋ جۇمىستارىم قاۋىرت ءجۇرىپ جاتىر. بىرنەشە سپاررينگ وتكىزدىم. دايىندىعىمنىڭ نەگىزگى بولىگىن اياقتادىم دەسەم دە بولادى. ەندىگى ماڭىزدىسى شارشى الاڭعا سەنىمدى تۇردە شىعۋ», – دەدى 21 جاستاعى بوكسشى.
«قارسىلاسىم پاتريك مەنديدىڭ ءبىراز ايقاسىن كوردىم. جەكپە-جەكتەرىن نەگىزىنەن انگليا مەن گەرمانيادا وتكىزەدى ەكەن. بۇعان دەيىن رەسەيلىك دميتري چۋدينوۆپەن تيتۋلدى ۇرىس وتكىزگەن. 12 راۋندتىڭ قورىتىندىسى بويىنشا تورەشىلەردىڭ شەشىمىمەن تەڭ اياقتالىپتى. كەيىنىرەك, بريتانيالىق كاللۋم سميتپەن قولعاپ تۇيىستىرگەن. وليمپيادا ويىندارىنا قاتىسقان فرانتسيالىق حاسسان ن’جيكاممەن دە كۇش سىناسقان. وسىعان قاراپ-اق تاجىريبەلى سپورتشى ەكەنىن اڭعارۋعا بولادى», – دەدى قازاقستاندىق بوكسشى.
«قولدارىن تومەن ۇستاپ, بوكستاسادى. بارلىعىنا دايىن, 12 راۋندقا تولىقتاي شىداس بەرەتىن بىلىكتى بوكسشى. قازىر تىڭعىلىقتى دايىندالىپ ءجۇرمىن. وزىمە دەگەن سەنىمدىلىگىم دە جوعارى. پاتريكتى جەڭۋ ءۇشىن بويىمدا بارلىق قابىلەت بار. ءوزىمدى جاقسى قىرىمنان كورسەتە الامىن دەپ ويلايمىن», – دەدى ول.
ۆارشاۆادا وتەتىن ۇرىسىنان كەيىن ءالي احمەدوۆ انگليادا ۇيىمداستىرىلاتىن بوكس كەشىندە دە شارشى الاڭعا شىعۋدى جوسپارلاپ وتىر.
«بۇعان دا دايىنمىن دەپ ويلايمىن. ءبىر ايدا ەكى بىردەي جەكپە-جەك وتكىزىپ, ستۋدەنتتەر اراسىندا الەم چەمپيوناتىنا قاتىسقان كۇندەرىم دە بولدى. سوندىقتان بۇل ماعان تاڭسىق ەمەس», – دەدى ءالي احمەدوۆ.