كۇنپاراعىمىزعا كوكتەمنىڭ العاشقى ايى – ناۋرىز كەلىپ كىردى. سونىمەن بىرگە, بيىلعى فۋتبول ماۋسىمى دا ەسىك قاعىپ تۇر. وتكەن جىلى جۇلدەگە ىلىگە الماعان «اقتوبە» فۋتبول كلۋبىنىڭ بيىلعى ماۋسىمعا ازىرلىگى قانداي دەڭگەيدە؟ بۇل ساۋالدى باس باپكەر يگور راحاەۆقا قويعان ەدىك.
ونىڭ ايتۋىنشا, اقتوبەلىك فۋتبولشىلار وسىنىڭ الدىندا تۇركيادا وقۋ-جاتتىعۋ جۇمىستارىنا قاتىسىپ قايتىپتى. ءبىز بارعان كەزدە ولار كاسىبي شەبەرلىكتەرىن ودان ءارى شىڭداۋ ماقساتىندا شىمكەنت قالاسىنا اتتانعالى جاتىر ەكەن. «اقتوبە» فۋتبول كلۋبى بيىلعى ماۋسىمداعى العاشقى كەزدەسۋىن الماتىنىڭ «قايراتىمەن» وتكىزەتىنى جونىندەگى دەرەككە دە وسى جەردە قانىقتىق.
كلۋبتىڭ وتكەن جىلعى قۇرامى اجەپتاۋىر وزگەرىسكە ۇشىراعانىن ايتا كەتكەن ءجون. سونىڭ ىشىندە نەگىزگى ويىنشىلار تۇگەلگە جۋىق جاڭارتىلعان. ءدال بۇگىنگى كۇنى كوماندا قۇرامىنىڭ ۇلكەن توبى ەلىمىزدەن تىس جەردەن شاقىرتىلعان فۋتبولشىلار بولعانىمەن, وبلىس اكىمدىگى بەلگىلەگەن باعىت پەن باعدارعا سايكەس, «اقتوبەنىڭ» قۇرامىن جەرگىلىكتى جاستارمەن تولىقتىرۋ جۇمىستارى دا قاتار ءجۇرگىزىلۋدە. بۇل ءۇشىن بولاشاق كاسىبي فۋتبولشىلاردى تاربيەلەۋ ءىسى قولعا الىنعان. ءوڭىردىڭ بارلىق اۋداندارىندا وبلىستىق فۋتبول ورتالىعىنىڭ فيليالدارى قىزمەت ىستەيتىنى دە وسى سوزىمىزگە دالەل بولا الادى.
قازىر جاڭارتىلعان كوماندا قۇرامىندا جەرگىلىكتى توعىز فۋتبولشى بار. سولاردىڭ ءبىرى – وتكەن جىلى شەبەر ويىنىمەن جانە ءدال سوققىلارىمەن كوزگە ءتۇسىپ, جانكۇيەرلەردىڭ ريزاشىلىعىنا ءبولەنگەن باعدات قايىروۆ. وسى ارادا ءوزىنىڭ «اقتوبەسىنە» قايتا ورالعان اندرەي سيدەلنيكوۆتىڭ اتىنا دا وڭ پىكىر, جىلى لەبىز بىلدىرە كەتكەننىڭ ارتىقشىلىعى جوق.
ءسوز سوڭىندا «اقتوبە» فۋتبول كلۋبىنىڭ ويىنشىلارى جاڭا ماۋسىمدا ءوز جانكۇيەرلەرىن جاقسى ناتيجەلەرىمەن قۋانتادى دەپ سەنىم بىلدىرگىمىز كەلەدى.
تەمىر قۇسايىن,
«ەگەمەن قازاقستان»
اقتوبە