ارينە, ماقالادا ايتىلعان فاكتىلەر ناقتى, دۇرىس كورسەتىلگەن. سەمەي قالاسىن اۋىز سۋمەن قامتىپ وتىرعان سۋ تازالاۋ قوندىرعىسى ابدەن توزىپ كەتكەنى راس. ول جارىلىپ, ىستەن شىعىپ قالسا ءبىر ەمەس, بىرنەشە مەملەكەتتىڭ اۋىز سۋى لاستانادى. ديۋكەردەن شىققان لاس قالدىق ەرتىسكە قۇيىلىپ, وزەننىڭ تابيعاتى مەن تىرشىلىگىنە, بالىق, جان-جانۋارلار الەمىنە اپات كەلەدى. رەسپۋبليكالىق گازەتتىڭ كوتەرىپ وتىرعان تاقىرىبىن قولدايمىز. رەسپۋبليكا تاراپىنان بيۋدجەتكە ەنەتىن پروبلەمالى ماسەلە ەدى, بيىل وبلىستىق اكىمدىكتىڭ ۇمىتىپ كەتۋى سالدارىنان نازارعا الىنباعان. ناقتى ايتساق, ۇلتتىق ەكونوميكا مينيسترلىگىنىڭ قۇرىلىس ءجانە تۇرعىن ءۇي-كوممۋنالدىق شارۋاشىلىق جۇمىستارى كوميتەتىنىڭ توراعاسى بەيبىت شاحانوۆتىڭ مالىمدەۋىنشە, «2017-2019 جىلدارداعى رەسپۋبليكالىق بيۋدجەتكە بۇل ءماسەلە ءجونىندە ەشقانداي دا ۇسىنىس وبلىس اكىمدىگى تاراپىنان ءتۇسپەگەن. سوندىقتان دا بيۋدجەتكە كىرگىزىلمەي قالعان». وسىنداي جاۋاپتار الىنعاننان كەيىن ءجانە رەسپۋبليكالىق گازەتكە جاريالانعاننان سوڭ دا, ديۋكەر ءبىزدىڭ تىكەلەي نازارىمىزدا تۇردى. ايتا كەتۋ كەرەك, «نۇر وتان» پارتياسىنىڭ سەمەيدەگى فيليالى جىل قورىتىندىسى بويىنشا ءوز جۇمىستارىن ءجۇرگىزۋدە استانا جانە الماتى قالالارىنان كەيىن ءۇشىنشى ورىندى يەلەنىپ وتىرمىز. جاقىندا وسكەمەن قالاسىندا وبلىس اكىمى دانيال احمەتوۆتىڭ ەسەبى تىڭدالعان ەدى, سەمەي قالاسىنان ارنايى بارىپ, تۇرعىندارىنىڭ اتىنان ءسوز العان مەن ول كىسىگە وسى ديۋكەر ماسەلەسىنە قاتىستى سۇراق قويدىم. قالادا ەرتىس وزەنى ارقىلى وتەتىن كارىز ديۋكەرى جىلدار بويى ۇلكەن ماسەلەگە اينالىپ كەلە جاتقانىن, اتالعان ماسەلەنىڭ بارلىق ءتيىستى اتقارۋشى بيلىك ورىنداردا كوتەرىلگەنىن, پروبلەمانىڭ گازەت بەتىنە جازىلعانىن ايتىپ, قاشان وڭ شەشىلەتىنىن سۇرادىم. بۇل ساۋالىما وبلىس اكىمى دانيال احمەتوۆ سەمەي قالاسىنداعى ديۋكەرگە قاتىستى ماسەلەنىڭ شەشىمى سوڭعى ەكى جىلدا دۇرىس تابىلماي كەلە جاتقانىن, جالپى جوبانىڭ قۇنى ازىرشە 980 ملن تەڭگە بولاتىندىعىن, جۇمىستار كەلەر 2018 جىلى باستالاتىنىن ايتتى. دەگەنمەن, كەزدەسۋ اياقتالعان سوڭ, وبلىس باسشىسى بۇل ديۋكەردىڭ كەلەسى جىلعا دەيىن شىداماۋى دا مۇمكىن ەكەندىگىن ەسكەرىپ, جوندەۋ جۇمىستارىنىڭ مەيلىنشە تەز ارادا باستالۋىن تىكەلەي نازارىنا الىپتى.
زۋلفيا جامالاتدينوۆا,
«نۇر وتان» پارتياسىنىڭ سەمەي قالالىق فيليالى توراعاسىنىڭ ورىنباسارى