جاڭاوزەندىك وقۋشى رامازان قويشىباەۆ – بولاشاعىنان ۇلكەن ءۇمىت كۇتتىرەتىن ىزدەنىمپاز جاس, جوقتان بار جاساۋدى ماقسات ەتكەن ونەرتاپقىش. بۇعان دەيىن ادامنىڭ ارالاسۋىنسىز-اق پەردەلەرى اشىلىپ, جارىق جاناتىن «اقىلدى ءۇي» جوباسىن ويلاپ تاپقان ول ەندى داياشى قىزمەتىن اتقاراتىن جانە ادامدارمەن سويلەسىپ, تىلەك تىلەي الاتىن قۇلتەمىردى ويلاپ تاپتى.
بيىكتىگى 40 سم بولاتىن قۇلتەمىر تاماقتى الىپ كەلەدى, تاماقتىڭ دايىن بولعاندىعىن حابارلايدى جانە تاماقتى قولىنا العان ادامعا «اس ءدامدى بولسىن» دەگەن تىلەگىن ارناۋدى دا ۇمىتپايدى.
قۇلتەمىر جاساۋدى كوپتەن ويىندا جەتىلدىرىپ, دامىتىپ جۇرگەن وقۋشى ءبىر جىل سىزبالارىن سىزىپ, ەكى اپتادا ءوز ماقساتىنا قول جەتكىزەدى. ونەرتاپقىش تىلەك تىلەپ, سۇحباتتاسا الاتىن قۇلتەمىردىڭ سوزدىك قورىن مولايتۋدى ويلاپ ءجۇر. رامازاننىڭ ۇستازى ب.مۇحاممەد شاكىرتىنەن زور جەتىستىكتەر كۇتەدى.
– از ۋاقىتتا ماعان ميىن جاساپ, سويلەتىپ, قالاي جاسايتىنىن, قالاي جۇرەتىنىن كورسەتتى. ودان كەيىن سىرتىن جاساۋعا كىرىسىپ كەتتى. بۇل ءبىرىنشى نۇسقاسى, ونى ودان ءارى جەتىلدىرىپ, نەگىزگى ديزاينىنا دەيىن جەتكىزۋ جوسپارلانۋدا, – دەيدى ۇستاز.
ال رامازان بولسا جاپون ۇلگىسىندە دايىندالعان قۇلتەمىر بولاشاقتا مەيرامحانالاردا قىزمەت ەتەتىنىنە سەنىمدى. ول وسى سالادا ءبىلىمىن جەتىلدىرىپ, باسقا دا ينتەللەكت يەلەرىن ويلاپ تاپپاق. قازىر ول كوكتەمدەگى ىرىكتەۋدەن ءوتىپ, الماتى قالاسىندا وتەتىن ۇلكەن سايىستارعا قاتىسۋدى جوسپارلاپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى