وتكەن دەمالىس كۇندەرى استانا قالاسىنىڭ اۋماعىندا كوكتەمگى سۋ ءجۇرۋدىڭ جانە تاسقىننىڭ الدىن الۋعا باعىتتالعان اۋقىمدى جالپىقالالىق سەنبىلىك ءوتتى, وعان 24 مىڭ قالا تۇرعىنى, سونىڭ ىشىندە «الماتى» اۋدانىندا – 10 253, «ەسىل» اۋدانىندا – 1 736, جانە «سارىارقا» اۋدانىندا 11 857 ادام قاتىستى, دەپ حابارلايدى قالا اكىمدىگىنىڭ رەسمي سايتى.
قار جيناۋ جۇمىستارىنا ەلوردانىڭ 3000-نان اسا كاسىپورنى, ۇيىمى جانە مەكەمەلەرى تارتىلدى. قار پوليگوندارىنا 87 672 تەكشە مەتر قار شىعارىلدى.
شارا شەڭبەرىندە قالالىق باسقارمالار اۋدان اكىمدىكتەرىنە بەكىتىلىپ, قالالىق كوممۋنالدىق قىزمەتتەرمەن بىرلەسىپ ورامىشىلىك اۋماقتى, تۇرعىن الاپتاردىڭ اۋماقتارىن جانە تومەندە ورنالاسقان وزگە دە ۋچاسكەلەردى تازارتتى.
اتاپ ايتقاندا, «الماتى» اۋدانىنداعى اۆتوكولىك جولدارىندا, مەملەكەتتىك ساۋلەت-قۇرىلىس باقىلاۋ باسقارمالارى وڭتۇستىك-شىعىس تۇرعىن ءۇي اۋدانىندا, ۇزاقتىعى 25 كم بولاتىن 53 كوشەدە جانە تۇيىق كوشەلەردە قار تازالاۋ جۇمىستارىن جۇرگىزدى, 28006 تەكشە مەتر قار شىعارىلدى.
سونداي-اق, سەنبىلىك شەڭبەرىندە بۇعان دەيىن قار ۇيىلگەن گۇلزارلار قاردان تازارتىلىپ, جولدار, جاياۋ جۇرگىنشى جولدارى, ساياباقتارداعى شاعىن ارحيتەكتۋرالىق فورمالار, سۋبۇرقاقتار, ءمۇسىن كومپوزيتسيالارى تازارتىلدى.
قازىرگى ۋاقىتتا قالانىڭ ءۇش اۋدانىنىڭ اكىمدىكتەرى قاردى جيناۋ, شىعارۋ جۇمىستارىن كۇشەيتىلگەن تارتىپپەن جۇرگىزۋدە.