قاراعاندى مەملەكەتتىك تەحنيكالىق ۋنيۆەرسيتەتىنىڭ ستۋدەنتتەرى تاكسي جۇرگىزۋشىسىن ءولتىرىپ, اۆتوكولىگىن زاڭسىز يەمدەنگەندەرى ءۇشىن 3-تەن 19 جىلعا دەيىنگى مەرزىمگە باس بوستاندىقتارىنان ايىرىلدى, دەپ حابارلايدى قازاقپارات
بۇگىن قاراعاندى وبلىستىق قىلمىستىق ىستەر بويىنشا مامانداندىرىلعان اۋدانارالىق سوتىنىڭ ۇكىمىنە سايكەس, ماديار تۇستىكباەۆ, دياس تۇمەستاەۆ پەن ساعىن ىقىلاس ايىپتى دەپ تانىلدى.
ولار ماس كۇيىندە تاكسيگە وتىرعان. تاكسي جۇرگىزۋشىسى جىگىتتەردەن جول اقىسىن الدىن الا تولەۋلەرىن سۇراعان. وسىعان بايلانىستى جۇرگىزۋشى سايات سۇلتانبەكوۆ پەن سوتتالۋشى ساعىن ىقىلاستىڭ اراسىندا جانجال تۋىنداعان. سوڭعىسى اشۋعا بۋلىعىپ, جۇرگىزۋشىنىڭ يىعى مەن موينىنان پىشاق ۇرعان.
قازا تاپقان جۇرگىزۋشىنى ورىندىعىنان ءتۇسىرىپ تاستاپ, مەرسەدەس كولىگىنىڭ تىزگىنىنە سوتتالۋشىلاردىڭ ءبىرى وتىرادى. كولىكتىڭ تەرەزەسىنەن جۇرگىزۋشىنىڭ ەكى ۇيالى تەلەفونى مەن پىشاقتى لاقتىرىپ جىبەرگەن. كەيىن رەسپۋبليكا داڭعىلىندا ورنالاسقان تۇرعىن ءۇيدىڭ اۋلاسىنا كەلىپ, كولىكتىڭ ۇستىندەگى تاكسيگە تيەسىلى «9 رەگيون» بەلگىسىن جانە مەملەكەتتىك ءنومىرىن الىپ تاستاعان. قۇجاتتاردى ورتەپ, بۇقار جىراۋ اۋدانى بوتاقارا كەنتىنە قاراي جول تارتادى. اۋىلدىڭ ماڭىنا كولىكتى قالدىرىپ, ىلعالدى مايلىقتارمەن رولدەگى ساۋساق ىزدەرىن وشىرگەن.
قاراعاندى وبلىستىق قىلمىستىق ىستەر بويىنشا مامانداندىرىلعان اۋدانارالىق سوتىنىڭ سۋدياسى يسلامحان ەسەنباەۆ ايىپتالۋشىلاردىڭ ءبىرىن قر قك 99-بابى «ادام ءولتىرۋ» بويىنشا كىنالى دەپ تاۋىپ, 19 جىلعا باس بوستاندىعىنان ايىردى.
قالعان ەكەۋىن اۆتوكولىكتى زاڭسىز يەمدەنگەنى جانە رەسمي قۇجاتتاردى جويعانى ءۇشىن قر قك 200-بابى مەن 384-بابى بويىنشا ءۇش جىلعا سوتتادى.
سوت زارداپ شەككەن تاراپتىڭ ازاماتتىق شاعىمىن قاناعاتتاندىرىپ, سوتتالۋشىلاردى 2 ملن تەڭگە وتەماقى تولەۋگە مىندەتتەدى.