ورتالىق كوممۋنيكاتسيالار قىزمەتىندە ءبىلىم جانە عىلىم مينيسترلىگى وكىلدەرىنىڭ قاتىسۋىمەن بريفينگ ءوتتى. وعان ۆيتسە-مينيستر ەلميرا سۇحانبەرديەۆا, جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى دارحان احمەد-زاكى, مينيسترلىكتىڭ مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جانىل جونتاەۆا مەن زاڭ قىزمەتى جانە حالىقارالىق ىنتىماقتاستىق دەپارتامەنتىنىڭ ديرەكتورى نۇرسەيىت بايجانوۆ قاتىستى.
بريفينگتە ۆيتسە-مينيستر ەلميرا سۇحانبەرديەۆا الەۋمەتتىك جەلىلەردە ۆەدومستۆونىڭ قىزمەتىنە قاتىستى تاراپ جاتقان اقپارات تۋرالى مالىمدەمە جاسادى. ول الدىمەن وسىدان ءبىر اي بۇرىن ەلىمىزگە بەلگىلى ءبىر توپ عالىمداردىڭ جوعارى وقۋ ورىندارىندا قازاق ءتىلى مەن ادەبيەتى جانە باسقا دا پاندەردىڭ الىنىپ تاستالۋىنا بايلانىستى ءمينيستردىڭ اتىنا جازعان حاتىنا بايلانىستى تۇسىنىكتەمە بەردى. وندا ۆيتسە-مينيستر حاتتىڭ قالاي پايدا بولعانى بەلگىسىز ەكەنىن, اتالعان پاندەردىڭ ءبىلىم وردالارىندا وقىتىلىپ جاتقانىن, ولاردىڭ الداعى ۋاقىتتا دا ساقتالاتىنىن اتاپ ءوتتى.
-«قازاق ءتىلى مەن ادەبيەتى», «تاريح», «لينگۆيستيكا» مەن «شىعىستانۋ» ءوز ورنىندا. ەشتەڭە وزگەرگەن جوق, وزگەرمەيدى دە. بولاشاقتا پاندەردىڭ ءبارى ساقتالادى. ولاردى ۋنيۆەرسيتەتتە جابۋ تۋرالى اقپارات جالعان. ەلىمىزدە قازاق ءتىلى مەن ادەبيەتىنىڭ قافەدرالارى قالىپتى جاعدايدا جۇمىس ىستەپ جاتىر. سوندىقتان وسى كافەدرالاردىڭ جابىلۋى تۋرالى مالىمدەمەلەر جوسپارلانعان جالعان اقپاراتتى تاراتۋ, - دەدى ول.
ودان كەيىن ول الىپپە وقۋلىعىن الماستىرۋ مەن «سەرپىن» باعدارلاماسىنا قاتىستى الىپ-قاشپا اڭگىمەنىڭ شىندىققا جاناسپايتىنىن ايتتى. ونىڭ ايتۋىنشا, بىلتىر پەداگوگتارمەن كەلىسە وتىرىپ الىپپەنى 0-ءشى سىنىپتا وقىتىلاتىنى تۋرالى شەشىم قابىلدانعان. قازىرگى ۋاقىتتا مەكتەپكە باراتىن بالالار ءارىپ تانىپ, وقي الادى. سوندىقتان «الىپپە» مەكتەپالدى دايارلىق دەڭگەيىندە وقىتىلۋ ءتيىس, ياعني, بالالاردى مەكتەپكە دايارلايتىن 0-ءشى سىنىپتارعا بەرىلەدى. ال «انا ءتىلى» ءپانى 1-ءشى سىنىپتان باستاپ وقىتىلادى.
جيىندا مينيسترلىك وكىلدەرى الەۋمەتتىك جەلىدە كوپتەن بەرى قىزۋ اڭگىمە بولىپ جاتقان «سەرپىن» باعدارلاماسىنا قاتىستى دا تۇسىنىكتەمە بەردى.
مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جانىل جونتاەۆا «سەرپىن» باعدارلاماسىنىڭ جوسپارلى تۇردە جۇرگىزىلىپ جاتقانىن, بيىل وعان قوسىمشا 500 ورىن بولىنگەنىن ايتىپ, قازىر جوباعا 9 مىڭنان استام ادام قاتىسىپ وتىرعانىن ايتتى.
-بيىل بولىنگەن قوسىمشا 500 ورىن ماگيسترانتتار مەن دوكتورانتتارعا باعىتتالدى. بۇل ماسەلە پەداگوگ قاۋىمىمەن جانە جەرگىلىكتى اتقارۋشى ورگاندارمەن كەڭىنەن تالقىلاندى, - دەدى ول.
داستان كەنجالين, "ەگەمەن قازاقستان".