ەلباسى نۇرسۇلتان نازارباەۆ ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆتى قابىلدادى, دەپ حابارلايدى اقوردانىڭ ءباسپاسوز قىزمەتى. كەزدەسۋ بارىسىندا مەملەكەت باسشىسىنا ءدىن ىستەرى جانە ازاماتتىق قوعام مينيسترلىگىنىڭ قىزمەتى مەن الداعى جۇمىس جوسپارى تۋرالى ەسەپ بەرىلدى. قازاقستان پرەزيدەنتى ءدىن سالاسىندا قالىپتاسىپ وتىرعان جاعدايعا توقتالىپ, مينيسترلىكتىڭ ءرولىن, وعان جۇكتەلگەن مىندەتتەردى ەرەكشە اتاپ ءوتتى.
- بۇعان دەيىن بىزدە مۇنداي مينيسترلىك بولعان جوق. ءدىني قوعامداستىقتارمەن, ۇكىمەتتىك ەمەس سەكتورمەن جانە جاستار ۇيىمدارىمەن جۇمىستى جولعا قويىپ, ونى ءارى قاراي جالعاستىرۋ قاجەت, - دەدى نۇرسۇلتان نازارباەۆ. ەلباسى مەملەكەتتىڭ دىنگە جانە ءدىني ۇيىمدارعا, ءدىني ەكسترەميزممەن كۇرەس شارالارىنا قاتىستى جۇرگىزىپ وتىرعان ساياساتىنا ايرىقشا نازار اۋداردى.
- ەلىمىزدە كەز كەلگەن ءدىني بىرلەستىكتىڭ جۇمىس جۇرگىزۋىنە بارلىق جاعداي جاسالعان, ءدىن ۇستانۋ بوستاندىعىنا كەپىلدىك بەرىلگەن. بۇل سالادا بىزگە بايىپتىلىق كەرەك. سونىمەن بىرگە ءدىني ەكسترەميزم ماسەلەلەرىن رەتتەپ, زاڭنامانى قايتا قاراستىرۋ قاجەت. مينيسترلىك الدىندا اۋقىمدى جۇمىستار تۇر, - دەدى مەملەكەت باسشىسى.
ن.ەرمەكباەۆ قازاقستان پرەزيدەنتىنە ءوزى باسشىلىق ەتەتىن سالاداعى جاعدايدىڭ تۇراقتى ەكەنىن تۋرالى حابارلاپ, بۇگىندە ەلىمىزدە قىزمەتىن جۇرگىزىپ وتىرعان 18 كونفەسسيانىڭ 3600-دەن استام ءدىني بىرلەستىگى بار ەكەنىن ايتتى. ءمينيستردىڭ اقپاراتى بويىنشا, بىرلەستىكتەردىڭ كوبى يسلام دىنىنە تيەسىلى. سونداي-اق, ن.ەرمەكباەۆ نۇرسۇلتان نازارباەۆقا مينيسترلىكتىڭ ەتنوسارالىق جانە كونفەسسياارالىق تاتۋلىق پەن كەلىسىمدى ساقتاي وتىرىپ, مەملەكەت پەن ءدىني بىرلەستىكتەردىڭ قازاقستاندىق ءوزارا ءىس-قيمىل مودەلىن قالىپتاستىرۋ باعىتىنداعى جۇمىسى تۋرالى باياندادى. كەزدەسۋ قورىتىندىسى بويىنشا ەلباسى بىرقاتار ناقتى تاپسىرما بەردى.