جوعارى حوككەي ليگاسىنىڭ پلەي-وفف كەزەڭىندە قاراعاندىنىڭ «سارىارقاسى» چەحوۆ قالاسىندا جەرگىلىكتى «زۆەزدا» كومانداسىمەن ءۇشىنشى مارتە كەزدەسىپ, 3:2 ەسەبىمەن باسىم ءتۇستى.
«زۆەزدا» ءوز جانكۇيەرلەرىنىڭ الدىندا ونەر كورسەتكەندىكتەن بارىنشا وتكىر شابۋىلدار ۇيىمداستىرۋعا تىرىستى. كەزدەسۋدەگى العاشقى گول 22-مينۋتتا سوعىلدى. الەكساندر شاروۆتىڭ سوققىسىنان كەيىن ايدىن يەلەرى العا شىقتى. قارقىندارىن ۇدەتكەن ولار 37-مينۋتتا جەرلەستەرىمىزدى تاعى ءبىر مارتە قاپى قالدىردى. بۇل تۇستا اندرەي كۋزمەنكو مەرگەندىگىمەن كوزگە ءتۇستى. نامىسقا باسقان قاراعاندىلىقتار ەكىنشى كەزەڭنىڭ سوڭىندا ميحايل ءانيسيننىڭ كومەگىمەن ەسەپ ايىرماشىلىعىن قىسقارتتى.
ءۇشىنشى كەزەڭدە باس باپكەر ۆاديم ەپانچينتسەۆتەن جاڭا نۇسقاۋلار العان «سارىارقا» ويىنشىلارى تارازى باسىن تەڭەستىرۋ ءۇشىن بارىن سالدى. ءناتيجەسىندە, ماتچتىڭ سوڭعى مينۋتىندا ارتۋر سارۆاروۆ ەسەپتى 2:2-گە جەتكىزدى. ال وۆەرتايم كەزىندە ولەگ لوماكونىڭ مەرەيى ۇستەم بولىپ, جەرلەستەرىمىزدىڭ كەزەكتى جەڭىسىنە سەپتىگىن تيگىزدى. قوس كوماندانىڭ اراسىنداعى جالپى ەسەپتە «سارىارقا» 3:1 ەسەبىمەن الدا كەلەدى. كەلەسى ماتچ قاراعاندىدا وتەدى.
ءدال وسى كەزەڭدە وسكەمەننىڭ «تورپەدوسى» دا جەڭىسكە جەتتى. يجەۆسكىدە «يجستال» كومانداسىمەن سىنعا تۇسكەن شىعىسقازاقستاندىقتار 2:1 ەسەبىمەن باسىم ءتۇستى.
جانكۇيەرلەر قىزىقتى ويىننىڭ كۋاسى بولعانىمەن, ەسەپ تەك سوڭعى كەزەڭدە عانا اشىلدى. ايدىن يەلەرى تاراپىنان ءبىر ويىنشىنىڭ كەمدىگىن ۇتىمدى پايدالانعان وسكەمەندىكتەر اينالاسى ون مينۋتتىڭ ىشىندە ەكى بىردەي شايبا سوعىپ ۇلگەردى. اندرەي بەلوزەروۆ 42-مينۋتتا العاشقى گولىن سالسا, 52-مينۋتتا دۋبل يەسى اتاندى. ال «يجستال» كومانداسىنان دەنيس پوليۋدوۆ 55-مينۋتتا كوزگە ءتۇستى.
«تورپەدو» سەريالى ماتچتا ءۇش رەت جەڭىسكە جەتىپ, ءبىر مارتە ەسە جىبەردى. قوس كوماندا اراسىنداعى كەلەسى كەزدەسۋ وسكەمەندە وتەدى.
ايان ءابدۋالي,
«ەگەمەن قازاقستان»