«بارىس» شيرەك فينالعا شىقتى

قۇرلىقتىق حوككەي ليگاسىنىڭ پلەي-وفف كەزەڭىندە باق سىناپ جۇرگەن استانانىڭ «بارىس» حوككەي كلۋبى كەزەكتى تابىسىمەن جانكۇيەرلەرىن قۋانىشقا بولەدى. چەليابىنىڭ «تراكتور» كومانداسىمەن 1/8 فينالدىڭ التىنشى ويىنىندا كۇش سىناسقان جەرلەستەرىمىز 2:1 ەسەبىمەن جەڭىسكە جەتىپ, جالپى ەسەپتىڭ قورىتىندىسى بويىنشا ءتۋرنيردىڭ شيرەك فينالىنا جولداما الدى. «بارىستى» جارىستىڭ كەلەسى كەزەڭىنە الىپ شىققان التىنشى ماتچتا ەسەپتى قوناقتار اشتى. ويىن­نىڭ 10-شى مينۋتىندا كي­ريلل كولتسوۆ ءدال سوققىمەن «تراكتوردى» العا شىعارعان بو­لاتىن. ەكىنشى كەزەڭنىڭ باسىندا «بارىستىڭ» حوككەيشىسى ۆلا­دي­مير ماركەلوۆ قارىمتا گول سوعىپ, تارازى باسىن تەڭەستىردى. ال سوڭعى كەزەڭدە قوناقتاردىڭ از قۇراممەن ويناعان ءساتىن ۇتىمدى پاي­دالانا بىلگەن استانالىقتار جەڭىس شايباسىنا قول جەتكىزدى. گولدىڭ اۆتورى – داستين بويد (43-مينۋت). ءسويتىپ, التى ويىن قورى­تىندىسى بويىنشا جالپى ەسەپتە 4:2 ەسەبىمەن جەڭىسكە جەتكەن «بارىس» ءتۋرنيردىڭ شيرەك فينالىنا جولداما الدى. ەندى ولار 1/8 كەزەڭىندە قىتايدىڭ «كۋنلۋن رەد ستار» كومانداسىن جارىس جولىنان شىعارعان ماگنيتوگورسكىنىڭ «مەتاللۋرگ» كلۋبىمەن پلەي-وففتىڭ 1/4 فينالىندا كۇش سىناساتىن بولادى. قايرات ءابىلدينوۆ, «ەگەمەن قازاقستان»