الماتىنىڭ «قايرات» فۋتبول كلۋبى قازاقستان سۋپەركۋبوگى سىنىندا «استانا» كومانداسىن 2:0 ەسەبىمەن ۇتىپ, بيىلعى ماۋسىمداعى العاشقى جۇلدەسىنە يە بولدى.
كەزدەسۋدىڭ العاشقى مينۋتتارىنان-اق الماتىلىقتاردىڭ باسىمدىعى بايقالىپ تۇردى. اندرەي ارشاۆين باستاپ, يساەل قوستاعان شابۋىل شەبىندەگى فۋتبولشىلار ەريچ قورعاعان قاقپاعا دۇركىن-دۇركىن قاۋىپ ءتوندىرىپ وتىردى. «استانا» كوبىنە قارىمتا شابۋىلعا يەك ارتىپ, قورعانىسقا ءمان بەرىپ, اسا ساقتىقپەن وينادى. تۆۋماسي, كابانانگا سىندى شابۋىلشىلاردىڭ اراگىدىك قاقپاعا ۇمتىلعان ارەكەتتەرى «قايراتتىڭ» تاس قامال قورعانىسىنان اسا الماي جاتتى. كەيبىر ساتتەردە قاقپاشى پلوتنيكوۆ تا سەنىمدى وينادى.
جالپى, ويىننىڭ جانكۇيەردى جالىقتىرمايتىنداي قىزىقتى وتكەنىن ايتۋ كەرەك. ماۋسىمنىڭ جاڭا باستالىپ جاتقانىنا قاراماستان, ەكى كوماندا دا جوعارى جىلدامدىققا ارقا سۇيەگەن كەستەلى ويىن ورنەگىن كورسەتتى.
جانكۇيەر قاۋىم بيىلعى ويىن دا تەڭ اياقتالىپ, ماتچ سوڭى پەنالتيگە ۇلاسا ما دەپ وتىرعاندا, كەزدەسۋدىڭ 77-مينۋتىندا ەسەپ تە اشىلدى. باۋىرجان يسلامحاننىڭ ايىپ الاڭىنا اۋەلەتە بەرگەن دوبىن قورعاۋشى سەزارا ارزو گولعا اينالدىرا ءبىلدىردى. قالت-قۇلت ەتكەن وسى ەسەپ ماتچتىڭ سوڭىنا دەيىن ساقتالدى. ال تورەشى قوسقان قوسىمشا ۋاقىتتا يسلامبەك قۋات شەبەرلىك تانىتىپ, ەسەپتى ەسەلەدى. ءسويتىپ, 2:0 ەسەبىمەن جەڭىسكە جەتكەن «قايرات» وسىمەن ەكىنشى جىل قاتارىنان قازاقستان سۋپەركۋبوگىنىڭ يەگەرى اتاندى.
الماتى. «استانا» – «كايرات» 0:2 (0:0);
گولدار: ارزو 77 (0:1), كۋات 90+3 (0:2);
ەسكەرتۋ: ماەۆسكي 57, شومكو 78, لوگۆينەنكو 84, قۋات 28, ارشاۆين 80, ماركوۆيچ 90+2;
الاڭنان قۋىلۋ: قۋات 90+3;
«استانا»: ەريچ, انيچيچ, شومكو, بەيسەبەكوۆ, لوگۆينەنكو, پوستنيكوۆ (شيتوۆ 83), مۋجيكوۆ, ماەۆسكي, تۆۋماسي (مۇرتازاەۆ 81), كابانانگا, لۋللاكۋ (جالمۇقان 72);
«قايرات»: پلوتنيكوۆ, احمەتوۆ, سۇيىمباەۆ, ماركوۆيچ, ارزو, باكاەۆ, قۋات, يسلامحان (رۋدوسەلسكي 90+2), ارشاۆين (يليچەۆيچ 72), يساەل (جۋكوۆ 89), گوۋ.
قايرات ءابىلدينوۆ,
«ەگەمەن قازاقستان»
استانا