اقتوبە ايماعىندا «ءبىز – بىرگەمىز!» اتتى الەۋمەتتىك-قايىرىمدىلىق تۇرعىسىنان ءمانى مەن ماڭىزى جوعارى اكتسيا وتكىزۋ ءىسى داستۇرگە اينالعان. ونىڭ باستى ماقساتى ءوز اتاۋىنان كورىنىپ تۇرعانىنداي – قوعام مۇشەلەرىن جۇمعان جۇدىرىقتاي ءبىر ارناعا توپتاستىرۋعا, مۇمكىندىگى شەكتەۋلى جانداردىڭ قارىم-قابىلەتىن كوتەرۋگە, ازاماتتىق باستامالاردى قولداۋعا, جانە وتانشىلدىق سەزىمدى تەرەڭدەتۋگە باعىتتالعان. كەشە وسى باعىتتاعى كەزەكتى كەزدەسۋ وبلىس ورتالىعىنداعى «اتامەكەن» مادەني-ورتالىعىندا وتكىزىلدى.
ءومىر كۇندە توي ەمەس, ونىڭ الدىن الا بولجاۋعا مۇلدەم كەلمەيتىن ءار ءتۇرلى سىناقتارى مەن توسىن جاعدايلارى دا جەتەرلىك. اششىسى مەن تۇششىسى الماسىپ كەلەتىن ومىردە اسۋ دا, تاسۋ دا, كۇيىنىش تە, ءسۇيىنىش تە بولماي تۇرمايدى. ويلاماعان جەردەن تاعدىردىڭ اۋىر تەپكىسىنە تاپ كەلەتىندەر دە بار. ولارعا ۇنەمى قولداۋ مەن قامقورلىق كورسەتۋ – ءبىزدىڭ اينىماس پارىزىمىز. الەۋمەتتىك بورىشىمىز. ءداستۇرلى اكتسيادا اقتوبە وبلىسىنىڭ اكىمى بەردىبەك ساپارباەۆ ءوز ءسوزىن وسى ارنادان ساباقتادى.
تۇتاستاي العاندا ءومىردە مۇگەدەك جاندارعا كورسەتىلىپ جۇرگەن قۇرمەت دەڭگەيى جوعارى. مۇندا ولاردى كولەڭكەسىمەن قورعاي جۇرەتىن ءمارت ازاماتتار لەگى دە مول. ءارىسىن ايتپاعاندا وتكەن جىلى وبلىستىق اكىمدىك تاراپىنان 32 مۇگەدەكتەر وتباسىنا جان-جاقتى جابدىقتالعان جايلى پاتەرلەر بەرىلگەن. بيىلعى جىلدىڭ وزىندە باسپاناعا مۇقتاج بەس مۇمكىندىگى شەكتەۋلى جەكە تۇلعالار ۋاقىتشا باسپاناعا ورنالاستىرىلعان. سونداي-اق, بيىلعى وتكىزىلگەن اكتسيا كەزىندە سال اۋرۋىنا ۇشىراعان ازاماتتاردى قولداۋ ورتالىعى قوعامدىق بىرلەستىگىنە ءبىر ميلليون بەس ءجۇز مىڭ تەڭگەنىڭ سەرتيفيكاتى بەرىلدى. ءارى مۇگەدەكتەرگە ارنالعان كولىك-تاكسيلەر سىيعا تارتىلدى.
تەمىر قۇسايىن,
«ەگەمەن قازاقستان»
اقتوبە