العىس ايتۋ كۇنىمەن باستالعان ناۋرىز باتىس قازاقستان وبلىسىندا «مەيىرىمدى كوكتەم» شاراسىنا جالعاستى. ارنايى قۇرىلعان قايىرىمدىلىق قىزمەتىن ۇيلەستىرۋ كەڭەسى تۇڭعىش رەت باس قوسىپ, كەڭەيتىلگەن وتىرىس وتكىزدى. وعان ءوڭىر باسشىسى التاي كولگىنوۆ جانە قايىرىمدىلىق ىستەرمەن اينالىسىپ جۇرگەن كاسىپكەرلەر, ەتنومادەني ورتالىق جەتەكشىلەرى قاتىستى.
– «العىس كۇنى» مەرەكەسىنىڭ اسسامبلەيانىڭ قۇرىلعان كۇنىمەن تۇسپا-تۇس كەلۋى تەگىن ەمەس. جۇك ۆاگوندارىنا تيەلىپ, ءبىر ءتۇننىڭ ىشىندە قازاق دالاسىنا اتتاندىرىلعان كوپتەگەن حالىقتىڭ تراگەدياسى ۇمىتىلمايدى. بىراق ول حالىقتار قازاق حالقىنىڭ كەڭپەيىلدىلىگى ارقاسىندا جاڭا مەكەنگە تەز جەرسىنىپ كەتتى. ۇرپاق ءوربىتىپ, سالت-ءداستۇرىن جاڭعىرتىپ, كوپ ۇلتتى قازاقستاننىڭ دامىپ-گۇلدەنۋىنە ءوز ۇلەسىن قوستى. بۇگىننەن باستاپ وبلىسىمىزدا «مەيىرىمدى كوكتەم» جوباسى باستاۋ الىپ جاتىر. بۇل ىستەن ءوڭىر كاسىپكەرلەرى قالىس قالمايدى دەپ سەنەمىن. مەملەكەت كاسىپكەرلىكتىڭ دامۋىنا بارىنشا جاعداي جاساۋدا. بيزنەس وكىلدەرى دە وزدەرىنىڭ الەۋمەتتىك جاۋاپكەرشىلىگىن جەتە سەزىنىپ, بۇل باعىتتاعى جۇمىستارعا قولداۋ بىلدىرەرىنە سەنىمىم مول», دەدى التاي سەيدىر ۇلى.
قايىرىمدىلىق قىزمەتىن ۇيلەستىرۋ كەڭەسىنىڭ نەگىزگى مىندەتى – مەملەكەت بارىنشا قولداپ وتىرعان بيزنەس وكىلدەرى مەن كومەككە مۇقتاج ورتالاردى بايلانىستىرۋ, قايىرىمدىلىق شارالارىنا مۇرىندىق بولۋ. ءبىرىنشى كەزەكتە مۇمكىندىگى شەكتەۋلى ازاماتتاردىڭ ەم-شارالارى مەن ارنايى اربالار ساتىپ الىپ بەرۋ جوسپارلانىپ وتىر. ماسەلەن, گۇلميرا باتپاقۇلوۆا جەتەكشىلىك ەتەتىن «اربا» قوعامدىق ۇيىمىنىڭ ون ادامدى ارنايى ورىنداردا ەمدەلۋگە جىبەرۋ ءوتىنىشى الدىمەن قارالاتىن بولدى.
«مەيىرىمدى كوكتەم» شاراسى ءۇش ايعا سوزىلماق.
قازبەك قۇتتىمۇرات ۇلى,
«ەگەمەن قازاقستان»
ورال