سەمەيدە وبلىس اكىمى دانيال احمەتوۆتىڭ باستاماسىمەن وبلىستىق اكىمدىكتىڭ كوشپەلى وتىرىسى ءوتتى. جيىنعا قالانىڭ زيالى قاۋىمى, اۋدان, قالا اكىمدەرى, قوعامدىق ۇيىمدار مەن ءتۇرلى سالا مەكەمەلەرىنىڭ وكىلدەرى, كاسىپكەرلەر قاتىستى. قالا اكىمى ەرماك ءسالىموۆتىڭ ايتۋىنشا,بۇگىنگى تاڭدا سەمەيدى دامىتۋدىڭ 2017-2019 جىلدارعا ارنالعان اۋقىمدى جوباسى 4 سالانى قامتىپ وتىر. بۇل تۇرعىن ءۇي قۇرىلىسىن جاڭعىرتۋ, الەۋمەتتىك سالا, ينفراقۇرىلىم, كوممۋنالدىق شارۋاشىلىقتى رەتتەۋ ماسەلەلەرى. سوعان وراي بارلىق دەڭگەيلى بيۋدجەتتەن 113 ملرد تەڭگە قاراستىرىلعان. جىل سايىن سەمەيدىڭ جولدارىن جوندەۋگە 1 ملرد تەڭگە قاراجات بولىنەتىن بولدى. كوشپەلى وتىرىستا جاڭادان سالىناتىن «اباي ارەنا» كەشەنىنىڭ ۇلگىسىن سلايد ارقىلى كورسەتىپ تانىستىرعان وبلىس اكىمى دانيال احمەتوۆ بىلاي دەدى:
– ەلباسى نۇرسۇلتان نازارباەۆتىڭ بيىلعى جولداۋى حالىقتىڭ ەكونوميكالىق ءال-اۋقاتىن ارتتىرۋمەن قاتار, جاڭادان دامۋ, جاڭعىرتۋ جولدارىنا دا ارنالىپ وتىر. «اباي ارەنا» كەشەنى سەمەيدىڭ مادەني-سپورتتىق, ساۋىقتىرۋ باعىتىنداعى تىنىس-تىرشىلىگىنە ەرەكشە لەپ بەرمەك. بۇل حالىقارالىق تالاپقا ساي نىسان ءارى 5 مىڭ كورەرمەنگە ارنالعان ورنى بار. بىزدە وسى كەشەننىڭ تەحنيكالىق-ەكونوميكالىق جوباسى دايىن. قۇرىلىسى قاراعايلى شاعىن اۋدانىندا جۇرەدى. وسى كەشەن ارقىلى سەمەي ەلىمىزدىڭ وزگە قالالارىنان ەرەكشە بولىپ كورىنەتىن بولماق. بۇل سەمەي قالاسىنىڭ 300 جىلدىعىنا ارنالىپ وتىر. اۋماعى 14 مىڭ شارشى مەتردى قۇرايدى.
سەمەي ەكونوميكاسىنىڭ ماڭىزدى سالاسى اگروونەركاسىپ بولىپ تابىلعاندىقتان, اۋىلشارۋاشىلىق ءونىمدەرىن ءوندىرۋ 2016 جىلى 2015 جىلمەن سالىستىرعاندا 1 ملرد تەڭگەگە ارتقان. سالادا مال ءوسىرىپ, ەت وندىرۋدە اسىل تۇقىمدى مالداردى وسىرۋگە اسا زور ءمان بەرىلۋدە. «كوپەجان» شارۋا قوجالىعىندا تاۋارلى-ءسۇت فەرماسى قولدانىسقا بەرىلسە, «نۇر» شارۋاشىلىعىندا فەرما قۇرىلىسى اياقتالىپ قالدى. قالا تۇرعىندارى سەنبى سايىن تۇراقتى وتكىزىلەتىن اۋىلشارۋاشىلىق جارمەڭكەلەرىنەن, قۇنارلى ءارى ەكولوگيالىق تازا دەپ سانالاتىن جەرگىلىكتى ونىمدەردى قولجەتىمدى باعادا ساتىپ الىپ وتىر.
راۋشان نۇعمانبەكوۆا
سەمەي