مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» دەپ اتالاتىن بيىلعى جولداۋىنداعى «سوت جۇيەسىنە سەنىمنىڭ ارتۋىنا قول جەتكىزۋ
قاجەت», دەگەن ءبىر ءسوزىنىڭ استارىندا سوت جۇيەسىنە ارتىلىپ وتىرعان بارشا مىندەت پەن تاپسىرمانى ورىنداۋدىڭ سالماعى مەن جاۋاپكەرشىلىگى جاتىر.
جولداۋدا قويىلعان ءمىندەتتەردى جۇزەگە اسىرا وتىرىپ, سوت جۇيەسى جەكە مەنشىكتى قورعاۋعا, قۇقىق ۇستەمدىگى مەن بارشانىڭ زاڭ الدىنداعى تەڭدىگىن قامتاماسىز ەتۋگە باعىتتالعان جاڭعىرتۋ جۇمىستارىن ودان ءارى جالعاستىرىپ, جەكە جانە زاڭدى تۇلعالاردىڭ قۇقىقتارى مەن ءمۇددەلەرىن قورعاۋدىڭ كەڭ اۋقىمدى مۇمكىندىكتەرىن اشا ءتۇسۋدى كوزدەپ وتىر.
سوت تورەلىگىن جۇزەگە اسىرۋ بارىسىندا كۇندەلىكتى نەعۇرلىم ءجيى كەزدەسەتىن الەۋمەتتىك-ەكونوميكالىق ماسەلەلەردىڭ ءتىزىمى ايقىندالۋدا. سوتتار اۋەلگى كەزەكتە جەكە مەنشىكتى قورعاۋعا, بۇقارالىق كاسىپكەرلىكتى قولداۋعا, سالىق-بيۋدجەت ساياساتىن جاقسارتۋعا, بيۋدجەتتى وڭتايلى قولدانۋعا, ينۆەستيتسيالىق داۋلار بويىنشا ءبىركەلكى سوت پراكتيكاسىن قالىپتاستىرۋعا, اكىمشىلىك جانە قىلمىستىق زاڭنامانى ىزگىلەندىرۋگە, قوعامدىق قاۋىپتىلىگى تومەن ەكونوميكالىق قىلمىس قۇرامدارىن قىلمىسسىزداندىرۋعا قاتىستى ماسەلەلەرگە دەن قويىپ وتىر.
جوعارعى سوت جولداۋدىڭ باسىمدىقتارى بويىنشا سوت پراكتيكاسىنا قورىتۋ جۇرگىزىپ, زاڭنامانى قايتا تەكسەرىستەن وتكىزۋ جانە ءتيىستى ورگاندارعا كەشەندى ۇسىنىستار ازىرلەۋ جۇمىستارىن باستاپ تا كەتتى. قارجىلىق سەكتوردى «قايتا جۇكتەۋ» بولىگىندە كوللەكتورلىق قىزمەت تۋرالى زاڭ جوباسى بويىنشا جانە بانكتەرگە ارنايى تالاپ-ارىزداردىڭ ەسكىرۋ مەرزىمىنە قاتىستى بىرقاتار تۇزەتۋلەر ۇسىنىلدى. اكىمشىلىك جانە قىلمىستىق زاڭنامانى ىزگىلەندىرۋ ماسەلەسىنە ءجىتى نازار اۋدارىلۋدا.
شەتەلدىك ينۆەستورلار ءۇشىن قازاقستان ەكونوميكاسىنىڭ تارتىمدىلىعىن ارتتىرۋ جۇمىسىن كۇشەيتۋ باعىتىندا ينۆەستيتسيالىق داۋلار بويىنشا ءبىركەلكى سوت پراكتيكاسىن قورىتۋ, زاڭنامانى جەتىلدىرۋ ماسەلەلەرى قولعا الىنىپ جاتىر. سوتتار قوعامدىق قاۋىپتىلىگى تومەن ەكونوميكالىق قىلمىس قۇرامدارىن قىلمىسسىزداندىرۋ, مەملەكەتتىك ساتىپ الۋ سالاسىن جەتىلدىرە وتىرىپ, از كولەمدە ايىپپۇل سالۋ ينستيتۋتىن قايتا قالپىنا كەلتىرۋ ماسەلەلەرىنە نازار اۋدارىپ وتىر.
جولداۋدا ادامنىڭ ءوزىنىڭ بارۋىن قاجەتسىنبەيتىن تولىق ەلەكتروندى فورماتقا كوشىرۋ قامتاماسىز ەتىلۋى كەرەك ەكەندىگى ايتىلدى. مۇنداي جۇمىستاردىڭ مەملەكەتتىك بيلىكتىڭ سوت تارماعىندا بىركەلكى تابىستى جۇزەگە اسىرىلىپ جاتقانى بەلگىلى. جاڭا اقپاراتتىق تەحنولوگياعا نەگىزدەلگەن ەلەكتروندى باعدارلامالار ءوز ناتيجەسىن كورسەتە باستادى. ولاردىڭ قاتارىندا «تورەلىك», «سوت كابينەتى» جانە باسقا سەرۆيستەر بار.
پوشتا بايلانىستارىنىڭ ورنىن ەشبىر قاراجات شىعىندامايتىن ەلەكتروندى پوشتا, SMS حابارلاما, ەلەكتروندى باعدارلامالار مەن سەرۆيستەر, گيبريدتى ەلەكتروندى پوشتا جانە باسقالارى باستى. قازىر سوت پروتسەستەرىن قوسىمشا ۋاقىت پەن قاراجات شىعىنداماي-اق قاشىقتىقتان بەينەكونفەرەنتسبايلانىس ارقىلى ءوتكىزۋ قالىپتى قۇبىلىسقا اينالىپ بارادى. جولداۋ تالاپتارىن ءجۇزەگە اسىرۋ بارىسىندا بۇل جۇمىستار ودان ءارى دامىتىلا بەرەدى.
بەك امەتوۆ,
باتىس قازاقستان وبلىستىق سوتىنىڭ توراعاسى