ەلباسى نۇرسۇلتان نازارباەۆ قاڭتار ايىندا بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى حالىققا ارناعان ۇندەۋى مەن بيىلعى جولداۋىندا بەدەلدى پارلامەنت پەن قۋاتتى ۇكىمەت قۇراتىن كەزدىڭ جەتكەنىن, سوندىقتان ءوزىنىڭ بىرقاتار وكىلەتتىكتەرىن پارلامەنت پەن ۇكىمەتكە بەرۋ جونىندە شەشىم قابىلداعانىن ايتقان بولاتىن.
«مەملەكەتتىڭ باسقارۋ جۇيەسىن جاڭعىرتاتىن كەز كەلدى. مەن ەلدىڭ مۇددەسى مەن زاماننىڭ تالابىن, ۇرپاقتىڭ بولاشاعىن ويلاي وتىرىپ, وسىنداي بايلام جاسادىم» دەگەن ەدى پرەزيدەنت ءوز ۇندەۋىندە. بۇل تەرەڭنەن ويلاستىرىلعان, ۋاقىت سۇزگىسىنەن وتكەن, دەر كەزىندە قابىلدانعان وتە دۇرىس شەشىم بولدى دەپ ويلايمىز. ويتكەنى, ەلىمىز دەموكراتيالىق, قۇقىقتىق مەملەكەت رەتىندە قالىپتاسۋ كەزەڭىنەن ءوتتى. مەملەكەتىمىز اياعىنان تىك تۇردى. حالىقتىڭ ءال-اۋقاتى جاقساردى. تاۋەلسىزدىكتىڭ 25 جىلىندا بىرلىگى جاراسقان قازاقستان حالقى ەلباسىمەن بىرگە قالىپتاسۋ مەكتەبىنەن ءساتتى ءوتىپ, بارلىق سالادا زور جەتىستىكتەرگە قول جەتكىزىپ, الەم ساناساتىن الەۋەتتى مەملەكەتكە اينالدى. شيرەك عاسىردا ەلىمىز الەمدەگى ەكونوميكاسى باسەكەگە قابىلەتتى 50 مەملەكەتتىڭ قاتارىنا ەندى. قازىرگى ۋاقىتتا الەمنىڭ دامىعان 30 ەلىنىڭ قاتارىنا ەنۋدى مەجەلەپ وتىرمىز. ەلباسىنىڭ بۇل شەشىمى ارقىلى ءبىز دەموكراتيالىق, قۇقىقتىق, زايىرلى مەملەكەت ەكەنىمىزدى تورتكۇل دۇنيەگە دالەلدەپ جاتىرمىز. ءسوز جۇزىندە ەمەس, ءىس جۇزىندە. مەملەكەت باسشىسى ءوز ەركىمەن پرەزيدەنتتىڭ بىرقاتار وكىلەتتىكتەرىن پارلامەنت پەن ۇكىمەتكە بەرۋ جونىندە شەشىم قابىلدادى. ءبىز ەل قامىن ويلاۋدان تۋعان وسىنداي باتىل بايلامى ءۇشىن نۇرسۇلتان ءابىش ۇلىنا العىس ايتۋىمىز كەرەك. ەلباسى مۇنداي شەشىمدى بۇدان ەرتەرەك قابىلداسا دا بولار ەدى. وعان ەشكىم دە قارسى بولماس ەدى. بىراق مەملەكەت باسشىسى بارلىعىن تەرەڭنەن, بايىپپەن, بايسالدىلىقپەن ساراپتاپ, بۇعان ءبىزدىڭ قوعامنىڭ, بيلىك قۇرىلىمدارىنىڭ قانشالىقتى دايىن ەكەندىگىن ەسكەرگەن سەكىلدى. قوعامنىڭ ءتۇبىرلى وزگەرىستەرگە ساقاداي-ساي بولۋىنا مۇمكىندىك بەرگەن سياقتى. ءبىز ءبىر نارسەنى انىق بايىپتاۋىمىز كەرەك. ەلباسى ءوزىنىڭ وكىلەتتىكتەرىنىڭ بىرقاتارىن پارلامەنت پەن ۇكىمەتكە بەرىپ, ولاردىڭ جاۋاپكەرشىلىگىن عانا ارتتىرىپ وتىرعان جوق. قوعامعا, ەلىمىزدىڭ بارشا ازاماتتارىنا مەملەكەت دامۋىنا بەلسەنە اتسالىسۋعا, بەلسەنە قاتىسۋعا مۇمكىندىك ۇسىنىپ وتىر. ويتكەنى, پارلامەنت دەگەنىڭىز – حالىق. پارلامەنتتى حالىق سايلايدى. پارلامەنت ارقىلى حالىق ءوز تىلەگىن, مۇڭ-مۇقتاجىن جەتكىزەدى. سوندىقتان بۇل ىسكە ءبىر اتانىڭ بالاسىنداي, ءبىر قولدىڭ سالاسىنداي قوعام بولىپ, ەل بولىپ, جۇدىرىقتاي جۇمىلا اتسالىسايىق.
سۇلتان كارتوەۆ,
حالىقارالىق «نەۆادا-سەمەي» انتيادرولىق قوزعالىسىنىڭ ۆيتسە-پرەزيدەنتى, «پاراسات», «قۇرمەت» وردەندەرىنىڭ يەگەرى
شىعىس قازاقستان وبلىسى