كونستيتۋتسياعا ەنگىزۋگە ۇسىنىلعان وزگەرىستەر قوعامدى دەموكراتيالاندىرۋدى ودان ءارى جالعاستىرا وتىرىپ, ەل ەكونوميكاسىنىڭ دامۋىن جەدەلدەتىپ, حالىقتىڭ ءال-اۋقاتىن ارتتىرۋعا باعىتتالعان.
جالپى, پرەزيدەنتتىڭ ءوزى باستاماشى بولا وتىرىپ, ءوز وكىلەتتىگىن بيلىك تارماقتارىنا ءبولىپ بەرۋى الەمدىك ساياساتتا وتە سيرەك. ەندىگى جەردە پارلامەنتتىڭ وكىلەتتىگى كۇشەيەدى, – ۇكىمەتتى جاساقتايدى, ونىڭ قىزمەتىنە باقىلاۋ جاسايدى. ال ەگەر سەنات دەپۋتاتتارىنىڭ باسىم كوپشىلىگى ايماقتاردان سايلاناتىنىن ەسكەرسەك, پارلامەنتتىڭ ءرولىن كۇشەيتۋ ارقىلى حالىق بيلىگىن كۇشەيتىپ وتىرمىز دەپ سەنىممەن ايتۋعا بولادى.
تاعى ءبىر وزگەرىس, 66-باپتىڭ 1-تارماعى بويىنشا رەسپۋبليكا پرەزيدەنتiنىڭ كەلىسىمىمەن مەملەكەتتىك باعدارلامالاردى ەندىگى جەردە ۇكىمەت بەكىتەدى جانە ولاردىڭ ورىندالۋىن قامتاماسىز ەتەدى. ۇكىمەت ءوزى بەكىتكەن باعدارلامالاردى قالاي ورىنداپ جاتقانى تۋرالى پارلامەنت الدىندا ەسەپ بەرەدى, ءسويتىپ, حالىق بيلىگى ۇكىمەتتىڭ جۇمىسىن باقىلاپ وتىراتىن بولادى.
جۋىردا ەل وڭىرلەرىنە شىققان ساپار بارىسىندا ءبىز مەملەكەتتىك بيلىك تارماقتارىنىڭ اراسىندا وكىلەتتىكتەردى قايتا بولۋگە قاتىستى بولاتىن كونستيتۋتسيالىق رەفورمالاردى بۇكىلحالىقتىق تالقىلاۋ تۋرالى مەملەكەت باسشىسىنىڭ باستاماسىن حالىقتىڭ وڭ تۇرعىدان قابىلداعانىنا كۋا بولدىق. تەك 26-باپقا قاتىستى الاڭداۋشىلىق بار ەدى. ەلباسى بۇل باپقا قاتىستى وتە كورەگەن شەشىم قابىلدادى.
سول سياقتى جەرگىلىكتى ءوزىن ءوزى باسقارۋ جۇيەسىن دامىتۋدىڭ ءبىر كورىنىسى – پرەزيدەنتتىڭ جەرگىلىكتى ءماسليحاتتاردى تاراتۋ ماسەلەسىن ۇكىمەتپەن, پارلامەنت پالاتالارى توراعالارىمەن كەلىسكەننەن كەيىن شەشۋى, اۋدان, قالا, اۋىل اكىمدەرىن تاعايىنداۋ نەمەسە سايلاۋدى ءتيىستى زاڭدارعا سايكەس جۇرگىزۋ تۋرالى وزگەرىستەر ەل اراسىندا قىزۋ قولداۋ تاۋىپ وتىر.
بۇل ورايدا دا پارلامەنت پالاتالارىنىڭ بىرلەسكەن وتىرىسىنداعى كونستيتۋتسيالىق رەفورما ءجونىندەگى جۇمىس توبىنىڭ حابارلاماسىندا كەلتىرىلگەن ۇسىنىستار ايماق تۇرعىندارىنىڭ ايتقان ۇسىنىستارىمەن سايكەس كەلەدى.
پارلامەنت پالاتالارىنىڭ بىرلەسكەن وتىرىسىندا كونستيتۋتسياعا وزگەرىستەر ەنگىزۋگە قاتىستى 6 مىڭنان استام ۇسىنىس-تىلەكتەر ءتۇسۋىنىڭ ءوزى ءبىزدىڭ حالقىمىزدىڭ قوعامدىق بەلسەندىلىگىنىڭ جوعارى ەكەندىگىن بايقاتتى.
ەندىگى جەردە «بيلىكتى دۇرىس پايدالانا ءبىلۋ دە ونەر» دەپ ەلباسى ايتقانداي, پارلامەنت پەن ۇكىمەت وزىنە بولىنگەن بيلىكتى تيىمدىلىكپەن پايدالانىپ, ەلىمىزدىڭ ستراتەگيالىق باعدارلامالارىنان تۋىندايتىن مىندەتتەردى ورىنداۋعا بار كۇش-جىگەردى جۇمىلدىرا ءبىلۋى اسا ماڭىزدى.
بەكمىرزا ەلامانوۆ,
سەنات دەپۋتاتى