قۇرىلىقتىق حوككەي ليگاسىنىڭ پلەي-وفف كەزەڭىندە استانانىڭ "بارىسى" چەليابىنىڭ "تراكتور" كومانداسىن قابىلداپ, 2:1 ەسەبىمەن باسىم ءتۇستى.
قوس كوماندا وسىمەن التىنشى كەزدەسۋىن وتكىزدى. جانكۇيەرلەر تارتىستى ويىننىڭ كۋاسى بولدى. قوس ۇجىم ماتچ باستالا سالا الما كەزەك قاۋىپتى شابۋىلدارىمەن كوزگە ءتۇسىپ جاتتى. كەزدەسۋدىڭ 10-مينۋتىندا ايدىن يەلەرىنىڭ ءبىر ويىنشىسى كەمدىگىن ءتيىمدى پايدالانعان "تراكتور" كيريلل كولتسوۆتىڭ كومەگىمەن ەسەپتە العا شىقتى.
ۇزىلىستە باس باپكەر ەدۋارد زانكوۆەتستەن جاڭا نۇسقاۋلار العان "بارىس" ويىنشىلارى ەكىنشى كەزەڭ باستالا سالا العا ۇمتىلدى. ناتيجەسىندە,23-مينۋتتا ۆلاديمير ماركەلوۆ تارازى باسىن تەڭەستىردى. ال سوڭعى 20 مينۋتتا جەرلەستەرىمىزدىڭ مەرەيى ۇستەم بولدى. 43-مينۋتتا كوماندانىڭ باس جۇلدىزدارىنىڭ ءبىرى داستين بويد جەڭىستى گولدىڭ اۆتورى اتاندى. قوس ۇجىم وسىدان كەيىن دە تابلوداعى ەسەپتى وزگەرتەتىن بىرنەشە مۇمكىندىكتەرى بولعان, بىراق ساتتىلىك جولداس بولا قويمادى.
وسىلايشا, التى ماتچتا "بارىس" 4:2 ەسەبىمەن كەلەسى راۋندقا جولداما الدى. قۇرلىقتىق حوككەي ليگاسى پلەي-وفف كەزەڭىنىڭ شيرەك فينالىندا ەلوردالىقتار قىتايدىڭ "كۋن لۋن رەد ستار" كومانداسىن جەڭگەن ماگنيتوگورسكىنىڭ "مەتاللۋرگىمەن" كۇش سىناساتىن بولادى.