اتىراۋدا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن قىتايلىق «China Dragons» كوماندالارى قولعاپ ءتۇيىستىردى. ءۇشىنشى بولىپ رينگكە 64 كيلودا ءدىلمۇرات ءمىجيتوۆ پەن يان لو شىقتى.
ءبىرىنشى راۋندتا قوس بوكسشى ءبىر-ءبىرىن اڭدىسۋمەن بولدى. اشىق تۇردە ايقاسقا شىعا قويمادى. ەكەۋى دە سوققىلارىن وتكىزە ءبىلدى. بىراق تورەشىلەر ءدىلمۇراتتىڭ ونەرىن جوعارى باعالاپ, العا شىعاردى.
كەلەسى كەزەڭدە وتانداسىمىزدىڭ اسىرەسە, دجەب سوققىلارى ءدال ءتيىپ جاتتى. قورعانىستا ساق قيمىلداعانمەن, ازداپ سەنىمدىلىك جەتىسپەيتىندەي كورىندى. اياعى تايىپ جىعىلعان كەزى دە بولدى.
ءۇشىنشى راۋندتا ءمىجيتوۆ شارشى الاڭدى تولىعىمەن بيلەپ الدى دەۋگە بولادى. رينگ جاعاسىنا تاقاپ الىپ, تومپەشتەپ العان ساتتەرى دە بولدى. ەكى قولىمەن باعىتتاعان سوققىلارى ءدوپ ءتيىپ جاتتى. باستاپقى ءۇش راۋندتىڭ قورىتىندىسى بويىنشا الدا كەلدى.
ءتورتىنشى راۋند تا ءدىلمۇراتتىڭ ەنشىسىندە بولدى. بىرنەشە سوققىسىنان كەيىن يان لو ءتىپتى نوكداۋن الىپ قالدى. وتانداسىمىزدىڭ جويقىن سوققىلارىنان كەيىن قىتايلىق بوكسشى دەنەسىن ارەڭ كوتەرىپ, ورنىنان تۇرعان. قارقىنىن ۇدەتكەن سپورتشىمىز قىتايلىقتى ەكىنشى رەت نوكداۋنعا جىبەردى.
ۇزىلىستە ەس جيعان يان لو سوڭعى ءۇش مينۋتتى شيراق باستادى. بىراق وتانداسىمىز ونىڭ سوققىلارىنان سىتىلىپ شىعىپ, قارسى سوققىلارىمەن ايبارىن تاعى دا ءبىر مارتە كورسەتە ءتۇستى.
قورىتىندىسىندا ءدىلمۇرات ءمىجيتوۆ ءوزى عانا جەڭىسكە جەتىپ قويماي, «استانا ارلاندارىنىڭ» ۋاقىتىنان بۇرىنعى جەڭىسىنە دە سەبەپشى بولدى.