اتىراۋدا ءوتىپ جاتقان دۇنيەجۇزىلىك بوكس سەرياسىندا (WSB) قازاقستاندىق «Astana Arlans» پەن قىتايلىق «China Dragons» كوماندالارى قولعاپ ءتۇيىستىردى. العاش بولىپ شارشى الاڭعا 49 كيلودا تەمىرتاس ءجۇسىپوۆ پەن دزيۋندزيۋن حە شىقتى.
ءبىرىنشى راۋندتا تەمىرتاس رينگ يەسى ەكەنىن بىلدىرگەندەي, العا ۇمتىلىپ, سوققىلارىن دارىتا ءبىلدى. قارسىلاسىنىڭ بىرنەشە شابۋىلدارىنان سىتىلىپ شىعىپ كەتىپ جاتتى. تورەشىلەر جەرلەسىمىزدىڭ شەبەرلىگىن نازارعا الا وتىرىپ, ءبىرىنشى راۋندتا ءبىراۋىزدان جەڭىستى بەردى.
كەلەسى كەزەڭدە ءجۇسىپوۆ شابۋىلعا ءجيى ۇمتىلعانمەن, سوققىلارىن ءدوپ تيگىزە المادى. ال قىتايلىق بوكسشى قايتا ۇرىمتال تۇستاردا مۇمكىندىگىن ءمۇلت جىبەرمەۋگە تىرىسىپ جاتتى. ءساتى كەلگەندە وتانداسىمىزدىڭ بۇيىرىنەن دە ۇرىپ جاتتى. وسىعان بايلانىستى بۇل كەزەڭنىڭ قورىتىندىسى بويىنشا حە دزيۋندزيۋن العا شىقتى.
ءۇشىنشى راۋندتا وتانداسىمىز ولقىلىقتارىنىڭ ورنىن تولتىرۋ ءۇشىن قارسىلاسىن قىسىمعا الىپ, قارسى سوققىلارىنان قۇتىلىپ كەتىپ ءجۇردى. تورەشىلەر دە سايكەسىنشە قازاقستاندىقتىڭ ونەرىنە وڭ باعاسىن بەردى.
ءتورتىنشى راۋندتا تەمىرتاستىڭ مىسى باسىپ, بىرنەشە سوققىلارىن ءدال تيگىزدى. جانكۇيەرلەرىنىڭ قولداۋىنان رۋحتانعان ول حە دزيۋندزيۋنگە ەش مۇمكىندىك بەرە قويمادى.
سوڭعى راۋندتا اسپاناستى ەلىنىڭ بوكسشىسى بارىن سالدى. ءتىپتى, جويقىن سوققىلارىن دا دارىتا ءبىلدى.
قورىتىندىسىندا تەمىرتاس ءجۇسىپوۆ جەڭىسكە جەتتى.