الماتىدا ەۋرازيا تەحنولوگيالىق ۋنيۆەرسيتەتى جانىنان «Start-Up اكادەمياسى» اشىلدى, دەپ حابارلايدى قازاقستاننىڭ «دامۋ» قورىنىڭ ءباسپاسوز قىزمەتى.
«دامۋ» قورى مەن ەۋرازيا تەحنولوگيالىق ۋنيۆەرسيتەتى (ەتۋ) اراسىندا ءوزارا ارىپتەستىك پەن تۇسىنىستىك تۋرالى مەموراندۋمعا قول قويىلدى. اكادەميانىڭ اشىلۋ سالتاناتىنا ازيا دامۋ بانكى, ەۋروپا قايتا قۇرۋ جانە دامۋ بانكى, دۇنيەجۇزىلىك بانك, الماتى قالاسىن دامىتۋ ورتالىعى, قر قارجىگەرلەر قاۋىمداستىعى, MOST بيزنەس ينكۋباتورى, «الاتاۋ» اتپ, جانە ەكىنشى دەڭگەيلى بانك وكىلدەرى قاتىستى.
«بۇل - «دامۋ» قورىنىڭ سەرىكتەس جوعارى وقۋ ورنى جانىندا اشقان ءتورتىنشى «Start-Up اكادەمياسى». بۇعان دەيىن پاۆلودار, اتىراۋ مەن استانادا دا اشىلعان ەدى. اكادەميا ءىسىن جاڭا باستاعان كاسىپكەرلەرگە بيزنەس-يدەيادان باستاپ نارىققا شىققانعا دەيىنگى جولدا كەشەندى تەگىن قولداۋ كورسەتۋگە مۇمكىندىك بەرەدى. ياعني, كونسالتينگتىك, اقپاراتتىق قولداۋ عانا ەمەس, ينۆەستور تارتۋ, قوردىڭ قارجىلىق باعدارلامالارىنا قاتىسۋعا نەمەسە مەملەكەتتىك گرانتار الۋعا ءوتىنىش بەرۋگە دە قول ۇشىن سوزامىز»,- دەدى «دامۋ» قورىنىڭ باسقارما توراعاسى اباي سارقۇلوۆ.
ول الماتى قالاسىن ايماقتىق ستارتاپ-حاب رەتىندە قاراستىرۋعا بولاتىنىن ايتا كەلىپ, قالانى قازاقستاندا يننوۆاتسيالىق جاڭالىقتار اشۋعا مۇمكىندىگى مول مەگاپوليس ەكەنىن اتاپ ءوتتى.
«دامۋ» قورىنىڭ قولداۋىمەن ەتۋ جانىندا «Catapult» اتتى Start-Up اكادەميا قۇرۋ كاسىپكەرلەردىڭ جاڭا لەگىن دايارلاۋعا جانە وتاندىق جاڭا تەحنولوگيالىق ستارتاپ جوبالاردى دامىتۋعا جاسالعان جاڭا قادام. اكادەميا اقش ۇكىمەتى ءۇشىن دايارلانعان كوممەرتسياليزاتسيا باعدارلاماسىنىڭ اۆتورى توماس سەلۋچچيدىڭ ادىستەمەسى بويىنشا جاڭا ستارتاپتاردى ىزدەپ, تاڭداپ, دامىتۋمەن ماقساتتى تۇردە اينالىساتىن بولادى. Start-Up اكادەميا الماتى قالاسىندا smart-تەحنولوگيالار مەن يننوۆاتسيالاردىڭ جاسالۋىنا جانە كاسىپكەرلىك ورتانىڭ قالىپتاسۋىنا ءوز ۇلەسىن قوساتىن بولادى», - دەدى ەۋرازيا تەحنولوگيالىق ۋنيۆەرسيتەنىڭ رەكتورى نۇرجامال دۇيسەنقۇلوۆا.
شارا بارىسىندا «دامۋ» قورى مەن «بولاشاق» قاۋىمداستىعى اراسىندا ارىپتەستىك كەلىسىمگە قول قويىلدى. بۇل قۇجات بويىنشا قاۋىمداستىقتىڭ ءبىلىم بەرۋ, زياتكەرلىك, بيزنەس سەكىلدى كوپتەگەن باعىتتارداعى الەۋمەتتىك ماڭىزدى جوبالارىن بىرلەسىپ قولداۋ قاراستىرىلعان.
استانا, پاۆلودار, اتىراۋ قالالارىنداعى Start-Up اكادەميالاردا 2016 جىلدىڭ قىركۇيەك پەن جەلتوقسانى ارالىعىندا 102 ادام وقىپ, 17 جوبا اكسەلەراتسياعا (بيزنەس-يدەيا تابۋدان باستاپ جۇزەگە اسىرىلۋىنا دەيىنگى سۇيەمەلدەۋ) جەتكەن. ولاردىڭ ىشىندە 4 جوبا ينۆەستيتسيا الدى.