قازاق ادەبيەتىندەگى cۇبەلى سانالاتىن تۋىندىلاردىڭ كوبى دەرلىك حح عاسىردىڭ ورتا شەنىنەن اسقان كەزەڭدە دۇنيەگە كەلگەنى راس. سول ۋاقىتتارى قالىڭ قازاقتىڭ ادەبيەت
الەمىنە دەگەن قىزىعۋشىلىعىن وياتىپ, رۋحاني مادەنيەتتىڭ اۋىر جۇگىن بيىك بەلەسكە سۇيرەپ شىعارعان كورنەكتى اقىن-جازۋشىلاردىڭ ەسىمىن ارداقتاپ, حالىق جادىندا جاڭعىرتىپ
وتىرۋ – ارقايسىمىزدىڭ دا بورىشىمىز. وسى تۇستا ۇلتتىق قۇندىلىقتار مەن مادەني مۇرانى كوزىنىڭ قاراشىعىنداي ساقتاپ كەلە جاتقان مۋزەي قىزمەتكەرلەرىنىڭ ەڭبەگىن اتاپ
وتپەۋگە بولماس.
مەملەكەتتىك ورتالىق مۋزەي باسشىلىعىنىڭ ۇيىمداستىرۋىمەن قازاقتىڭ كورنەكتى اقىن-جازۋشىلارى – مۇحتار اۋەزوۆتىڭ 120 جىلدىق, عابيت مۇسىرەپوۆ پەن عابيدەن مۇستافيننىڭ 115 جىلدىق, ديحان ابىلەۆ پەن عالي ورمانوۆتىڭ 110 جىلدىق, ءادي ءشارىپوۆتىڭ 105 جىلدىق جانە ءازىلحان نۇرشايىقوۆ پەن سافۋان شايمەردەنوۆتىڭ 95 جىلدىق مەرەيتويلارى قارساڭىندا «حالىق جۇرەگىندەگى قالامگەرلەر» اتتى كورمە اشىلدى.
م.اۋەزوۆتىڭ قازاقتىڭ تۇڭعىش ەپوپەياسى اتالعان «اباي جولىنان» باستاپ, ع.ءمۇسىرەپوۆتىڭ «قازاق سولداتى» (1945), «ويانعان ولكە» تاريحي رومانى (1953), ع.ءمۇستافيننىڭ سوعىستان كەيىنگى حالىق ومىرىندەگى ءوزگەرىستەردى بەينەلەۋگە ارنالعان «ميلليونەر» پوۆەسى (1948), «قاراعاندى» رومانى (1952), د.ابىلەۆتىڭ «قارۋلاس دوستار» (1948), «مايرا» (1954) دراماتۋرگيالىق ەڭبەكتەرى سياقتى قازاقي كوركەم پروزانى كلاسسيكالىق دەڭگەيگە كوتەرىپ, قازاق ادەبيەتىنىڭ التىن قورىنا قوسىلعان شوقتىعى بيىك تۋىندىلارمەن قاتار, مايدانگەر قالامگەرلەر – ع.ورمانوۆتىڭ «كوتەرمە» اتتى اڭگىمەلەر مەن وچەركتەر جيناعى, ءا.ءشارىپوۆتىڭ «پارتيزان قىزى» (1961) رومانى, ءا.نۇرشايىقوۆتىڭ «ماحاببات, قىزىق مول جىلدار», «اقيقات پەن اڭىز» شىعارمالارى – وقىرمانىن ەش جوعالتپايتىن مول مۇرا.
مۋزەيدەگى كورمەلەردىڭ كوكتەمدىك ماۋسىمىن اشۋعا ارقاۋ بولعان ايتۋلى كورمەگە ادەبيەتتىڭ ءتۇرلى جانرىنا قالام تارتقان اتالمىش اقىن-جازۋشىلاردىڭ قازاق جانە اراب ارپىمەن جازىلعان قولجازبالارى, وزدەرىنە تيەسىلى جەكە زاتتارى, ولاردىڭ ءومىرى مەن شىعارماشىلىعىنان سىر شەرتەتىن بىرەگەي جەكە مۇراعات ماتەريالدارى, سيرەك كەزدەسەتىن فوتو-قۇجاتتارى, قولجازبالارى مەن حاتتارى, ەڭبەكتەرى مەن ماراپاتتارى, ادەبي مۇرالارى مەن شىعارمالارى, سونىمەن قاتار, بيۋست, افيشا, پلاكاتتار مەن يلليۋستراتسيالار قويىلعان.
اشىلۋى اۋقىمدى ادەبي كەشكە اينالعان كورمەدە بەلگىلى جازۋشىلارمەن قاتار, ۇلى قالامگەرلەردىڭ كوزى ءتىرى ۇرپاقتارى – مۇرات اۋەزوۆ, جاميعا ورمانوۆا, جانار مۇستافينا, گۇلنار ءمۇسىرەپوۆا, جانار, جانات نۇرشايىقوۆالار, ينديرا شايمەردەنوۆا, سونداي-اق, سافۋان شايمەردەنوۆتىڭ جارى باعدات اپا ءوز ەستەلىكتەرىمەن ءبولىستى.
كورمەنىڭ سالتاناتتى اشىلۋىندا ءسوز العان مادەنيەتتانۋشى عالىم, مەملەكەت ءجانە قوعام قايراتكەرى مۇرات اۋەزوۆ: «قازاقتىڭ ءبىرتۋار جازۋشىلارىنىڭ مەرەيتويلارىنا ارنالعان شارالاردىڭ العاشقىسىن باستاپ, ءبىزدىڭ ۇرپاقتىڭ باسىن قوسىپ, اۋقىمدى شارا ۇيىمداستىرعان ورتالىق مۋزەي ۇجىمىنا العىس ايتامىن. مەرەيتويلىق شارالاردى قىتايدا, وزبەكستاندا دا اتاپ ءوتۋ تۋرالى ۇسىنىستار ءتۇسىپ جاتىر. كورمەنى تاماشالاپ, اكەلەرىمىزدىڭ رۋحىمەن تىلدەسىپ, ولار ۇستاعان زاتتار ارقىلى وتكەن شاقتى ەسىمىزگە ءتۇسىرىپ, تولقىپ تۇرمىز», دەپ اعىنان جارىلدى.
«2017 جىلدىڭ مامىر ايىنا دەيىن جالعاساتىن كورمەگە قىزىعۋشىلىق تانىتۋشىلار مەن كەلۋشىلەر قاتارى كوبەيە تۇسسە مەرزىمى ۇزارتىلادى», دەيدى كورمە قىزمەتكەرلەرى. كورمەگە بارلىعى 300 ەكسپونات قويىلعان.
ميرا بايبەك,
«ەگەمەن قازاقستان»
الماتى