قازاقستان رەسپۋبليكاسىنداعى ادام قۇقىقتارى جونىندەگى ۋاكىل اسقار شاكىروۆ جاقىندا تاعايىندالعان وشە/تمد بويىنشا بۇۇ بالالار قورىنىڭ (يۋنيسەف) ايماقتىق ديرەكتورى افشان حانمەن كەزدەستى, دەپ حابارلادى قازاقستان رەسپۋبليكاسىنداعى ادام قۇقىقتارى جونىندەگى ۋاكىل اپپاراتىنىڭ ءباسپاسوز قىزمەتى.
كەزدەسۋ بارىسىندا تاراپتار ومبۋدسمەن مەكەمەسى مەن بۇۇ-نىڭ بالالار قورى اراسىنداعى بالالارعا قاتىستى زورلىق-زومبىلىق جانە بالالارعا ارنالعان مەكەمەلەردە ولاردىڭ قۇقىقتارىن قورعاۋ جانە باقىلاۋ سالاسىنداعى ىنتىماقتاستىق, سونىڭ ىشىندە قولدانىستاعى بىرلەسكەن 2016-2017 جىلدارعا ارنالعان جۇمىس جوسپارىنىڭ شەڭبەرىندە الداعى ءىس-شارالاردى تالقىلادى.
اسقار شاكىروۆ ەلىمىزدەگى بالا قۇقىقتارىنىڭ ساقتالۋى تۋرالى جاعدايدى جانە قازاقستانداعى يۋنيسەف وكىلدەرىنىڭ قولداۋىمەن ءساتتى جۇزەگە اسىرىلعان, بالالاردىڭ جاعدايىن جەتىلدىرۋگە ۇلەس قوسقان جوبالار تۋرالى افشان حانعا ءمالىم ەتتى.
كەزدەسۋدىڭ قورىتىندىسىندا تاراپتار بالا قۇقىعىن قورعاۋ, ەكىجاقتى ىنتىماقتاستىقتى جالعاستىرۋ بويىنشا كەلىسىمگە كەلدى.