دەپۋتاتتار پرەزيدەنتتىڭ اتىنا ۇندەۋ جولداۋ ارقىلى مينيسترلەردى قىزمەتىنەن بوساتا الادى. ال سىرتقى ىستەر جانە قورعانىس مينيسترلەرىن پرەزيدەنت تاعايىندايدى. بۇل تۋرالى بۇگىن پارلامەنت پالاتالارىنىڭ بىلەسكەن وتىرىسىندا قازاقستان رەسپۋبليكاسى پرەزيدەنت اكىمشىلىگىنىڭ جەتەكشىسى ادىلبەك جاقسىبەكوۆ ايتتى.
ونىڭ ايتۋىنشا, بيلىك تارماقتارى اراسىندا وكىلەتتىكتەر قايتا بولىنگەننەن كەيىن پارلامەنتتىڭ جاڭا قۇرامى سايلانادى. سونىمەن قاتار ۇكىمەتتىڭ قۇرامى دا جاڭادان جاساقتالاتىن بولادى.
«ۇكىمەتتىڭ قۇرامىن جاساقتاۋ بارىسىندا پرەمەر-مينيستر مەملەكەت باسشىسىنىڭ قاراۋىنا ۇمىتكەرلەردىڭ ءتىزىمىن ۇسىنادى. بىراق الدىمەن پارلامەنتپەن كەڭەسىپ الادى. كونستيتۋتسيالىق رەفورمالار اياسىندا ماڭىزدى ءبىر نورما بار. وعان سايكەس, ۇكىمەت ءوز وكىلەتتىلىكتەرىن جاڭادان سايلانعان پرەزيدەنتتىڭ الدىندا ەمەس, جاڭادان سايلانعان پارلامەنتتىڭ الدىندا تاپسىرادى», - دەدى جاقسىبەكوۆ
وتىرىستا بەلگىلى بولعانداي, ءماجىلىس مۇشەلەرى ۇكىمەتتىڭ قۇرامىن جاساقتاۋعا اتسالىسىپ, مينيسترلەر كابينەتىنىڭ جۇمىسىن باقىلاي الادى.