كەشە ەنەرگەتيكا ءمينيسترى قانات بوزىمباەۆ ۇكىمەت ۇيىندە ءباسپاسوز ءماسليحاتىن وتكىزىپ, پرەزيدەنت نۇرسۇلتان نازارباەۆتىڭ قازاقستان حالقىنا ارناعان ءداستۇرلى جولداۋىنداعى باسىمدىقتاردى اڭگىمەلەدى. «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى باس قۇجاتتىڭ ماڭىزدى تۇستارىن اتاعان مينيستر مۇناي ءوندىرۋدى ارتتىراتىن ادىستەرگە ەرەكشە ءمان بەرۋ قاجەتتىگىن العا تارتتى. سوندا كەن ورىندارى ونىمدىلىگىن 5 پايىزدان 20 پايىزعا جەتكىزۋگە بولادى.
«مۇناي ءوندىرۋدى ارتتىرۋدا وڭتايلى تاجىريبەمىز بار. بۇل – كولدەنەڭ ۇڭعىمالاردى بۇرعىلاۋ مەن «ماڭعىستاۋمۇنايگاز» جانە «وزەنمۇنايگاز» اق -تىڭ بۇيىرلىك ۇڭعىلارى. ۇڭعىمالاردى ءبىر ۋاقىتتا جانە جەكە پايدالانۋعا بەرۋ تاجىريبەدە بار, ول – ءبىر ۇڭعىما ارقىلى ءارتۇرلى نىسانداردى پايدالانۋعا بەرە الاتىن الەۋەتتى تەحنولوگيا», دەدى ق.بوزىمباەۆ. ونىڭ ايتۋىنشا, بۇل باعىتتاعى جۇمىستاردى ۇيلەستىرەتىن ارنايى ورتالىقتىڭ بولعانى ابزال.
جيىندا قانات الدابەرگەن ۇلى جوعارىداعى مىندەتتى ۆەدومستۆوعا قاراستى ۇيىمداردىڭ بىرىنە جۇكتەيتىنىن ايتتى. «ءبىز ەلدەگى عىلىمي-زەرتتەۋ ينستيتۋتتارىنىڭ ءرولىن ارتتىرۋدى قاراستىرۋدامىز. قارقىنداتۋ ادىسىنە ءوتۋ – قازىرگى تاڭدا وتە ماڭىزدى. ويتكەنى, عىلىمنىڭ ءرولى جوعارى, شەتەلدىك كومپانيالاردى دا بىرگە جۇمىس ىستەۋگە تارتپاقپىز», دەدى مينيستر.
ەنەرگەتيكا ءمينيسترى ەلىمىزدەگى ەلەكتر ەنەرگەتيكاسى سالاسىندا ينتەللەكتۋالدى جۇيە قۇرىلاتىنىن ءمالىمدەدى. «بۇل – سمارت-جۇيە. ينتەللەكتۋالدى ەنەرگەتيكا ەنەرگيا جۇيەسىنىڭ بارلىق قۇرامدىق بولىكتەرىن تارتۋى ءتيىس. ول بىزگە جاھاندىق سىن-تەگەۋرىندەرگە دايىن بولۋعا جانە ەنەرگيانى رەزەرۆتەۋدىڭ قاۋىپسىزدىگىن, ترانزيتتىك جانە ەكسپورتتىق الەۋەتتى, جەك الەۋەتىن پايدالانۋدى, ەنەرگەتيكا قۇرىلىمىن وڭتايلاندىرۋدى, تيىمدىلىكتى, ۇنەمدەۋدى, يننوۆاتسيالىق جانە عىلىمي دامۋدى قامتاماسىز ەتۋگە مۇمكىندىك بەرەدى», دەدى ق.بوزىمباەۆ. سونداي-اق, ول جۇمىستىڭ ەكى كەزەڭ بويىنشا وتەتىنىن ايتتى. «ءبىرىنشى كەزەڭ – ەنەرگيا تاراتاتىن ۇيىمدار سانىن قىسقارتۋ, ەلەكتر جەلىلەرىن جاڭعىرتۋ, بارلىق دەڭگەيلەردە كوممەرتسيالىق ەسەپكە الۋدىڭ اۆتوماتتاندىرىلعان جۇيەلەرىن ەنگىزۋ. ەكىنشى كەزەڭ – ەلەكتر ەنەرگياسىنىڭ ساپا كورسەتكىشتەرىن باقىلاۋ جۇيەلەرىن ەنگىزۋ, اپاتقا قارسى اۆتوماتيكا جانە جيىلىك پەن قۋاتتىلىقتى رەتتەۋ جۇيەلەرىن جەتىلدىرۋ».
باسقوسۋ بارىسىندا قانات بوزىمباەۆ اعىمداعى جىلدىڭ ەكىنشى جارتىسىندا پاۆلودار مۇناي-حيميا زاۋىتىن جانە اتىراۋ مۇناي وڭدەۋ زاۋىتىن جاڭعىرتۋ جۇمىستارى اياقتالاتىنىن جەتكىزدى. ال شىمكەنت مۇناي وڭدەۋ زاۋىتىن جاڭعىرتۋ جۇمىستارىن كەلەسى جىلدىڭ ءبىرىنشى جارتىسىندا اياقتاۋ جوسپارلانعان. «ارينە, ءۇش زاۋىتتى جاڭعىرتۋ جۇمىستارىنا قىرۋار قارجى جۇمسالۋدا. الايدا, بۇلاردىڭ بيۋدجەتكە ەش قاتىسى جوق, نەسيە رەسۋرستارىن تارتۋ جانە اتالعان زاۋىتتاردىڭ ءوز قارجىسى ەسەبىنەن جۇرگىزىلۋدە. ناقتى سوماسى جۇمىستار بىتكەن سوڭ بەلگىلى بولادى», دەدى مينيستر.
قانات الدابەرگەن ۇلى جۋرناليستەردىڭ ساۋالدارىنا وراي جانار-جاعارمايعا دا قاتىستى پىكىرىن ءبىلدىردى. «بەنزين باعاسىن تومەندەتۋگە مۇمكىندىك بار. بىراق, بۇل تەك قانا 15-20 كۇنگە عانا سوزىلادى. ودان كەيىن جانارماي تاپشىلىعى ورىن الادى. ويتكەنى, ءبىز ىشكى نارىققا قاجەتتى بەنزيننىڭ 30 پايىزىن رەسەيدەن الىپ وتىرمىز. وتاندىق نارىقتاعى بەنزين باعاسىن تومەندەتسەك, رەسەيدەن ەشكىم دە بەنزين اكەلمەيدى.
وكىنىشكە قاراي, باعا كوتەرىلدى. بىراق, ءبىز ءۇش زاۋىتتى (پاۆلودار, شىمكەنت جانە اتىراۋ مۇناي وڭدەۋ زاۋىتتارى) جاڭعىرتۋدان وتكىزگەننەن كەيىن عانا كەنىشتەرىمىزدەن مۇناي الىپ, ونى وڭدەپ, ءوز باعامىزبەن وتاندىق نارىقتا ساتا الامىز», دەدى ول. ونىڭ ايتۋىنشا, ءبىر جىلدىڭ ىشىندە رەسەي بەنزينىنىڭ تونناسى 320 دوللاردان 515 دوللارعا دەيىن قىمباتتاعان.
اسحات رايقۇل,
«ەگەمەن قازاقستان»