دەرەك بويىنشا, وتكەن جىلعى ەكونوميكالىق وسىمگە قۇرىلىس سەكتورى – 2,6 پايىز, كولىك جانە لوگيستيكا سالاسى – 3,8 پايىز جانە اۋىلشارۋاشىلىق سالاسى 5,5 پايىز ۇلەس قوسقان. سونداي-اق, ينۆەستيتسيالىق بەلسەندىلىك تە وڭ ىقپال ەتىپتى. نەگىزگى كاپيتالعا سالىنعان ينۆەستيتسيا كولەمى 5,1 پايىزعا ءوسىپ, 7,7 ترلن تەڭگەنى قۇراعان. باعانى تۇراقتاندىرۋعا قاتىستى قابىلدانعان شارالار ناتيجەسىندە جىلدىق ينفلياتسيا 8,5 پايىز شاماسىندا ساقتالعان. بۇل تۋرالى ۇلتتىق ەكونوميكا مينيسترلىگىنىڭ قورىتىندى ەسەبىندە ايتىلدى.
ماماندار پىكىرىنشە, بىلتىر ەكونوميكانىڭ ىشكى جانە سىرتقى جاعدايلارعا بەيىمدەلۋى قيىن بولعان كورىنەدى. ەنەرگيا رەسۋرستارىنىڭ باعاسى قۇبىلمالى جانە تۇتىنۋشىلىق بەلسەندىلىكتىڭ تومەندەۋىنە قاراماستان, داعدارىسقا قارسى شارالار مەن «نۇرلى جول» مەملەكەتتىك باعدارلاماسى 2016 جىلى 1 پايىز ءىجو ءوسىمىن قامتاماسىز ەتكەن.
ۇلتتىق ەكونوميكا ءمينيسترى تيمۋر سۇلەيمەنوۆ اعىمداعى جىلى ىشكى جانە سىرتقى جاعدايلاردىڭ بىرتىندەپ وڭالۋىنا بايلانىستى ەكونوميكانىڭ كەيبىر سالالارىنا قاتىستى كورسەتكىشتەردى قايتا قاراۋ جوسپارلانىپ وتىرعانىن ايتادى. «نەگىزگى باسىم باعىتتار – مۇناي ءوندىرىسىن قاشاعان ارقىلى 79,5-تەن 81 ملن تونناعا دەيىن ۇلعايتۋ; ونەركاسىپتە قايتا وڭدەۋ سالاسىن يدمب جوبالارى جانە «ن ۇلى جول» باعدارلاماسىن جالعاستىرۋ ارقىلى قايتا وڭدەۋدى 1,2 پايىزدان 2,6 پايىزعا ۇلعايتۋ; «نۇرلى جول» مەملەكەتتىك باعدارلاماسى ارقىلى ەلدىڭ ترانزيتتىك الەۋەتىنىڭ 4 پايىزعا ءوسۋىن قامتاماسىز ەتۋ ماڭىزدى», دەدى ول. اتالعان فاكتورلار ەكونوميكانىڭ دامۋ قارقىنىن ارتتىرادى جانە بيىلعى ءىجو ءوسىمىن 2 پايىزدان كەم تۇسىرمەك ەمەس.
بيىل ەكونوميكادا وڭ وزگەرىستەر, جۇمىسپەن قامتۋ ارقىلى ەلدەگى الەۋمەتتىك تۇراقتىلىقتى قامتاماسىز ەتۋ, حالىقتىڭ تابىس تابۋىنا جاعداي جاساۋ, ەكونوميكالىق ءوسىمدى ىنتالاندىرۋ جۇمىستارى جالعاسادى. «بيزنەستىڭ شىعىندارىن قىسقارتۋ, ونىڭ ىشىندە ەنەرگەتيكا, كولىك, لوگيستيكا جانە تۇكش بويىنشا كەشەندى جۇمىس اتقارۋ جوسپارلانعان. سونداي-اق, باسەكەلەستىككە كەدەرگى كەلتىرەتىن زاڭناما تولىق تەكسەرىلىپ, ولقىلىقتار انىقتالدى», دەپ اتاپ كورسەتتى ت.سۇلەيمەنوۆ.
اسحات رايقۇل,
«ەگەمەن قازاقستان»